.jpg)
យន្តហោះដឹកក្រូចឃ្វិច ជាការតបស្នងនឹងកាដូផ្សិត។ AFP
ក្រុងសេអ៊ូល: ក្រុងសេអ៊ូលបានឲ្យដឹងកាលពីថ្ងៃចន្ទថា កូរ៉េខាងត្បូងបានបញ្ជូនក្រូចឃ្វិច ២០០ តោនទៅកាន់កូរ៉េខាងជើង ខណៈខាងជើងជូនខាងត្បូងវិញនូវផ្សិត ២ តោន ដែលក្រុងព្យុងយ៉ាងបានបញ្ជូនជាអំណោយកាលពីដើមខែ។
ក្រុងសេអ៊ូលកំពុងជំរុញល្បឿននៃកិច្ចព្រៀមព្រៀងនុយក្លេអ៊ែរជាមួយកូរ៉េខាងជើង ខណៈអាមេរិកបានទទូចថា ការដាក់សម្ពាធលើក្រុងព្យុងយ៉ាងគួរតែរក្សាទុកដដែលរហូតកូរ៉េខាងជើងធានាពីការបញ្ឈប់មហិច្ឆតានុយក្លេអ៊ែរ។
ក្រូចឃ្វិច ជាផ្លែឈើកម្រនៅកូរ៉េខាងជើង ត្រូវបានដឹកតាមផ្លូវអាកាស ៤ ជើងយន្តហោះ ទៅកាន់ក្រុងព្យុងយ៉ាង ពីភាគខាងត្បូងកោះជេជូ ដោយជើងចុងក្រោយធ្វើឡើងនៅរសៀលថ្ងៃចន្ទ។ ការប៉ាន់ស្មានតម្លៃក្រូចឃ្វិចក្នុងស្រុក ជាអំណោយនេះអាចមានតម្លៃពី ៤០០ ទៅ ៥០០ លានវ៉ុន (៣៥ ម៉ឺន ទៅ ៤៤ ម៉ឺនដុល្លារ)។
ជាថ្នូរមកវិញជាមួយផ្សិត ២ តោន ត្រូវបានបញ្ជូនដោយប្រមុខដឹកនាំកូរ៉េខាងជើង លោក គីម ជុងអ៊ុន អំឡុងពេលកិច្ចប្រជុំកំពូលកាលពីខែកញ្ញាជាមួយប្រធានាធិបតីកូរ៉េខាងត្បូង មូន ជេអ៊ីន។
ផ្សិត ជាអាហារឈ្ងុយឆ្ងាញ់ដែលត្រូវបានចាត់ទុកថាអាចជួយទប់ទល់ជំងឺបេះដូង និងទឹកនោមផ្អែម និងជាផលិតផលនាំចេញចម្បងរបស់កូរ៉េខាងជើងទៅកាន់ទីផ្សារចិន ត្រូវបានចែកជូនក្រុមគ្រួសារកូរ៉េខាងត្បូង ដែលបានបែកបាក់ពីគ្នា។
អ្នកនាំពាក្យរបស់លោក មូន ជេអ៊ីន បានឲ្យដឹងថា៖ «ក្រូចឃ្វិចមានលក្ខណពិសេសប្រចាំកូរ៉េខាងត្បូង ដែលពលរដ្ឋកូរ៉េខាងជើងធម្មតាគ្មានវាសនាបានហូប»៕
