.jpg)
ពេលចាក់បញ្ចាំងស្នាដៃគំនូរជីវចលថ្ងៃប្រកាសលទ្ធផល។ សហការី
ភ្នំពេញ៖ កម្មវិធីការប្រកួតគំនូរជីវចលថ្នាក់ជាតិលើកទី៧ ឆ្នាំ ២០២០ ចាប់ផ្តើមហើយ ដែលរៀបចំដោយទូរទស្សន៍ជាតិកម្ពុជា សម្រាប់ប្អូនៗដែលស្រឡាញ់គំនូរជីវចល អាចចងក្រងក្រុមដើម្បីផលិតគំនូរជីវចលខ្នាតខ្លី ឬផលិតដោយខ្លួនឯងមកចូលរួមប្រកួតប្រជែងពានរង្វាន់ ខណៈជយលាភីនឹងក្លាយជាតំណាងកម្ពុជាចូលរួមការប្រកួតគំនូរជីវចលអន្តរជាតិ DigiCon6 Asia នៅប្រទេសជប៉ុន នាចុងឆ្នាំនេះផងដែរ។
កម្មវិធីការប្រកួតប្រជែងគំនូរជីវចលថ្នាក់ជាតិលើកទី៧ ឆ្នាំ ២០២០ របស់ទូរទស្សន៍ជាតិកម្ពុជា គឺជាកម្មវិធីសម្ព័ន្ធភាពរបស់កម្មវិធីប្រកួតប្រជែងគំនូរជីវចលអន្តរជាតិ DigiCon6 Asia ផងដែរ ខណៈបណ្តាប្រទេសជាសមាជិកទាំងអស់ក៏កំពុងតែស្វែងរកស្នាដៃគំនូរជីវចល ដើម្បីជ្រើសរើសស្នាដៃឆ្នើមប្រចាំជាតិរៀងៗខ្លួន។
អ្នកគ្រប់គ្រងនៃការរៀបចំកម្មវិធីប្រកួតគំនូរជីវចលនៅទូរទស្សន៍ជាតិកម្ពុជា លោក ប៉ាង ចំណាន បានបង្ហើបឲ្យដឹងថា៖ «ដោយសារតែមានការគាំទ្រពីក្រសួងព័ត៌មាននោះ ទូរទស្សន៍ជាតិកម្ពុជាបានរៀបចំកម្មវិធីការប្រកួតគំនូរជីវចលថ្នាក់ជាតិលើកទី៧ (Cambodia DigiCon6 ) ហើយនៅឆ្នាំ ២០២០ សម្រាប់ប្អូនៗដែលស្រឡាញ់គំនូរជីវចលអាចចងក្រងជាក្រុមផលិតគំនូរជីវចលខ្នាតខ្លីចូលរួមប្រកួតប្រជែងពានរង្វាន់បាន។ ជយលាភីឆ្នាំនេះ នឹងក្លាយជាតំណាងឲ្យកម្ពុជាទៅចូលរួមការប្រកួតគំនូរជីវចលអន្តរជាតិ DigiCon6 Asia នៅប្រទេសជប៉ុន ចុងឆ្នាំផងដែរ។កម្មវិធី DigiCon6 Asia គឺជាកម្មវិធីប្រកួតប្រជែងគំនូរជីវចលខ្នាតខ្លី សម្រាប់តំបន់អាស៊ី ដែលបង្ហាញពីគំនិត និងស្នាដៃរបស់ប្រទេសតំបន់អាស៊ី»។
បេក្ខជនជយលាភីផ្សេងៗទៀត ក្នុងការប្រកួតគំនូរជីវចលថ្នាក់ជាតិឆ្នាំ ២០១៩។ រូបថត សហការី
លោក ប៉ាង ចំណាន បានបន្តថា៖ «ប្អូនៗ ដែលមានចំណាប់អារម្មណ៍ អាចនិពន្ធសាច់រឿង ដែលមានខ្លឹមសារអប់រំសង្គម និងផលិតចេញជាគំនូរជីវចលជា Stop Motion ឬ 2D ឬ 3D ដែលមានរយៈពេលមិនលើសពី ៥ នាទី ឬចន្លោះពី ៣ ទៅ ៥ នាទី ដើម្បីមកដាក់ចូលរួមប្រកួតប្រជែងបាន ខណៈថ្ងៃផុតកំណត់នៃការទទួលពាក្យត្រឹមពីថ្ងៃទី ១៥ ខែ សីហា ឆ្នាំ ២០២០។ ហើយស្នាដៃទាំងអស់របស់បេក្ខជននឹងត្រូវចាក់បញ្ចាំង និងប្រកាសលទ្ធផលថ្ងៃទី ២៨ ខែ សីហា ឆ្នាំ ២០២០ នៅស្ថានីយ៍ទូរទស្សន៍ជាតិកម្ពុជា ក្រោមអធិបតីភាពឯកឧត្តមខៀវ កាញារីទ្ធ ដែលជារដ្ឋមន្រ្តីក្រសួងព័ត៌មាន។
ចំពោះពានរង្វាន់ជយលាភីលេខ ១ ថ្នាក់ជាតិនឹងក្លាយជាតំណាងកម្ពុជាចូលរួមប្រកួតអន្តរជាតិនៅប្រទេសជប៉ុន ក្នុងកម្មវិធី DigiCon6 Asia នាចុងឆ្នាំ ២០២០។ ដោយឡែកក៏មានពានរង្វាន់កិត្តិយសផ្សេងៗដែរ ដូចជាជយលាភីកិត្តិយសផ្នែករូបភាព ផ្នែកសាច់រឿង ផ្នែកគំនិត និងផ្នែកប្រជាប្រិយភាព»។
គួរបញ្ជាក់ដែរថា បេក្ខជនភេទទី៣ កៅ សេងហ៊ួ និងស្នាដៃគំនូរជីវចលចំណងជើង Colors ដែលជានិស្សិតមកពីសាលាហ្វារពន្លឺសិល្បៈ នៅខេត្តបាត់ដំបង បានឈ្នះជយលាភីលេខ ១ ក្នុងការប្រកួតគំនូរជីវចលថ្នាក់ជាតិលើកទី៦ ឆ្នាំ ២០១៩ (Cambodia DigiCon6 2019 ) និងបានក្លាយជា តំណាងឲ្យកម្ពុជាសម្រាប់ការចូលរួមក្នុងកម្មវិធីប្រកួតគំនូរជីវចលអន្តរជាតិ DigiCon6 Asia 2019 នៅទីក្រុងហុងកុង ប្រទេសចិន កាលពីខែវិច្ឆិកា ឆ្នាំ ២០១៩ កន្លងមក៕
ឆ្នាំ ២០១៩ កៅ សេងហ៊ួ (កណ្តាល) និងស្នាដៃគំនូរជីវចលឈ្មោះ Colors។ សហការី
