ភ្នំពេញ៖ ដើម្បីចូលរួមលើកកម្ពស់វិស័យអក្សរសាស្ត្រ អក្សរសិល្ប៍ជាតិ ក៏ដូចជាលើកទឹកចិត្តដល់កវី អ្នកនិពន្ធវ័យក្មេងពុំធ្លាប់ដាក់ស្នាដៃចូលរួមប្រកួតប្រជែង គណៈកម្មការរៀបចំពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៣ ក្រោមប្រធានបទថា «ទោសនៃសុរា» ដែលនឹងឈប់ទទួលស្នាដៃចូលរួមប្រកួតនៅត្រឹមថ្ងៃទី ៣១ ខែឧសភា ប្រចាំឆ្នាំ ២០២០ នេះ។
បើតាមលោក ស សុខនី ជាប្រធានវិទ្យាស្ថានពុទ្ធសាសនបណ្ឌិត្យបានឲ្យដឹងថា៖ «នេះជាការប្រកួតផ្នែករឿងខ្លី និងកំណាព្យ សម្រាប់ពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី៣ សម្រាប់ឆ្នាំ ២០២០ ហើយប្រធានបទសំខាន់លើកនេះ គឺមានឈ្មោះថា «ទោសនៃសុរា» ដោយមានលក្ខខណ្ឌសម្រាប់ការចូលរួមចំពោះបេក្ខជនម្នាក់អាចដាក់ស្នាដៃបានតែ ១ គត់ និងមិនមែនជាស្នាដៃដែលធ្លាប់ទទួលបានចំណាត់ថ្នាក់នៅពានរង្វាន់ណាមួយពីមុនទេ។ ស្នាដៃរឿងខ្លីត្រូវវាយជាអត្ថបទដោយប្រើយូនីកូដខ្មែរក្នុងកុំព្យូទ័រ ទំហំអក្សរ ១២ ពុម្ព Khmer OS Siemreap ខ្នាតក្រដាស A4 ដែលមានចំនួនពី ១០-១៥ ទំព័រ។ ចំណែកឯកំណាព្យវិញពី ៥ ទៅ ១០ ទំព័រ (មានគំរូជូន) ព្រមទាំងត្រូវគោរពអក្ខរាវិរុទ្ធតាមវចនានុក្រមខ្មែរ បោះពុម្ពផ្សាយដោយពុទ្ធសាសនបណ្ឌិត្យគ្រាទី ៥ ជាចាំបាច់ (ផ្តល់ពិន្ទុជាពិសេស)។ បេក្ខជនត្រូវបញ្ជាក់ពីអាសយដ្ឋាន លេខទូរស័ព្ទ និងអ៊ីមែលឲ្យបានច្បាស់លាស់ ដើម្បីងាយស្រួលគណៈកម្មការរៀបចំធ្វើការទាក់ទង។ ស្នាដៃប្រកួតនឹងបន្តទទួលរហូតដល់ថ្ងៃទី ៣១ ខែ ឧសភា ឆ្នាំ ២០២០»។
លោក ស សុខនី បានបន្តថា៖ «វិទ្យាស្ថានពុទ្ធសាសនបណ្ឌិត្យបានរៀបចំការប្រកួតប្រជែងតែងនិពន្ធអក្សរសិល្ប៍លើផ្នែករឿងខ្លី និងកំណាព្យនេះ នៅក្នុងគោលបំណងលើកតម្កើងស្នាដៃអក្សរសាស្ត្រខ្មែរឡើងវិញ។ សម្រាប់ជយលាភីរឿងខ្លី នឹងផ្តល់ចំណាត់ថ្នាក់លេខ ១ លេខ ២ និងលេខ ៣ ខណៈជយលាភីផ្នែកកំណាព្យវិញនោះ ក៏មានផ្តល់ចំណាត់ថ្នាក់លេខ ១ លេខ ២ និងលេខ ៣ ផងដែរ»។
គួររំឭកដែរថា ការប្រកួតប្រជែងពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី១ ប្រចាំឆ្នាំ ២០១៨ ផ្នែករឿងខ្លី និងកំណាព្យ ក្រោមប្រធានបទថា «សុខដុមនីយកម្មក្នុងសង្គមតាមរយៈសាសនា» ហើយសម្រាប់អ្នកឈ្នះក្នុងការប្រកួតនេះ លេខ ១ ទទួលបានទឹកប្រាក់ចំនួន ៥ លានរៀល លេខ ២ ទទួលបានទឹកប្រាក់ចំនួន ៣ លានរៀល និងលេខ ៣ ទទួលបានទឹកប្រាក់ចំនួន ២ លានរៀល។ ចំពោះបេក្ខជនបេក្ខនារី ដែលទទួលជយលាភីនៃពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី១ ឆ្នាំ ២០១៨ មានលេខ ១ អ្នកនិពន្ធ រ៉េត សារ៉ុន លេខ ២ អ្នកនិពន្ធ រ៉ា ឡៃហួរ លេខ ៣ អ្នកនិពន្ធ ហុង វ៉ាន់សុធីរ។
ចំណែកជយលាភីពានរង្វាន់អក្សរសិល្ប៍ពុទ្ធសាសនបណ្ឌិត្យលើកទី២ ឆ្នាំ ២០១៩ រួមមានលេខ ១ អ្នកនិពន្ធ ទៀង ពិសិដ្ឋ លេខ ២ អ្នកនិពន្ធ លីម ដារ៉ា លេខ ៣ អ្នកនិពន្ធ លឹម ផាន់ណា និងកំណាព្យលេខ ១ អ្នកនិពន្ធ សាម សុនិត លេខ ២ អ្នកនិពន្ធ រ៉េត សារ៉ុន និងលេខ ៣ អ្នកនិពន្ធ ទី លីឈៀង។
ប្រធានវិទ្យាស្ថានពុទ្ធសាសនបណ្ឌិត្យលោក ស សុខនី ក៏បានឲ្យដឹងដែរថា កម្ពុជាបានខកខាននូវការរៀបចំកម្មវិធីប្រកួតប្រជែងអក្សរសិល្ប៍ប្រលោមលោកពានរង្វាន់អក្សរសិល្ប៍ពុទ្ធសាសនបណ្ឌិត្យនេះ ចាប់តាំងពីឆ្នាំ ១៩៩៣ មក ខណៈការចាប់ផ្តើមឡើងវិញ លើកទី១ បានប្រារព្ធធ្វើនៅឆ្នាំ ២០១៨ កន្លងមកនេះ៕