ភ្នំពេញ៖ ក្រោយពីការប្រកួតបវរកញ្ញាភេទទី៣ កម្ពុជា ឆ្នាំ ២០២០ (Miss Queen Cambodia 2020) ទទួលបានជោគជ័យនៃដំណាក់កាលប្រកួតនៅក្នុងប្រទេស ដែលបញ្ចប់កាលពីចុងសប្តាហ៍មុននេះ រកឃើញជយលាភីកំពូលទាំង ៥ (Top5) ដោយម្ចាស់មកុដបានទៅលើកញ្ញាឯកភេទទី៣ ឈ្មោះកញ្ញា សុខ ប៉ូលីន ហៅ Sai Fhon។
ចំពោះបវរកញ្ញាភេទទី៣ កម្ពុជាប្រចាំឆ្នាំ ២០២០ កញ្ញា សុខ ប៉ូលីន ឬហៅ Sai Fhon សព្វថ្ងៃមានវ័យ ២២ ឆ្នាំ កម្ពស់ ១,៧៧ ម៉ែត្រ ហើយក៏មានមុខរបរបើកគ្លីនិកផ្នែកសម្រស់មានឈ្មោះថា Queen S Beautiful & Academy ផងដែរ។
ជយលាភីបវរកញ្ញាភេទទី៣ កម្ពុជាឆ្នាំ ២០២០ ជាម្ចាស់មកុដបានបាច់ផ្កាពិសេសពី Jolie Boutique ទទួលបានរង្វាន់ពីក្រុមហ៊ុន Obsidian ពីក្រុមហ៊ុន Proda ពីក្រុមហ៊ុន Elixir Cambodia ដែលជា Voucher ទឹកប្រាក់ ៣ ០០០ ដុល្លារ សម្រាប់ថែរក្សាសម្រស់នៅ U2BE បានពានកិត្តិយស ខ្សែឆៀង និងមកុដមានតម្លៃ ១ ម៉ឺនដុល្លារ ពីហាងលក់គ្រឿងអលង្ការឈ្មោះ CSN.J។ ចំពោះតំណែងរងទី១ ទទួលបានបាច់ផ្កាពិសេសពី Jolie Boutique ទទួលបានរង្វាន់ពីក្រុមហ៊ុន Obsidian ក្រុមហ៊ុន Proda ក្រុមហ៊ុន Elixir Cambodia បានខ្សែឆៀង និងបានមកុដពីហាងលក់គ្រឿងអលង្ការ CSN.J។
ចំណែកឯតំណែងរងទី២ រងទី៣ និងរងទី៤ ទទួលបានបាច់ផ្កាពិសេសពី Jolie Boutique ទទួលបានរង្វាន់ពីក្រុមហ៊ុន Obsidian ពីក្រុមហ៊ុន Proda និងពីក្រុមហ៊ុន Elixir Cambodia បានខ្សែឆៀង និងមកុដ។
ខណៈក្រុមអ្នករៀបចំកម្មវិធី Miss Queen Cambodia ក៏បានបង្ហាញពីភាពរីករាយ និងសប្បាយចិត្តដោយការប្រកួតបវរកញ្ញាភេទទី៣ កម្ពុជាដំបូងទទួលបានផ្លែផ្កាលើសពីការរំពឹងទុកនោះ លោក ម៉ែន និមលរតន៍ អ្នករៀបចំកម្មវិធី Miss Queen Cambodia បញ្ជាក់ថា៖ «យើងមិនរំពឹងថា អាចមានលទ្ធផលខ្ពស់បែបនេះទេ ព្រោះអីគ្រាន់តែប្រកាសរៀបចំភ្លាម ផ្ទុះកូវីដ ១៩ ភ្លែត ធ្វើឱ្យខ្ញុំស្រងាកចិត្តជាខ្លាំង។
តែទោះយ៉ាងណា យើងពិតជាសប្បាយចិត្តដោយឃើញអ្នកឈ្នះក្នុងកម្មវិធីនេះ សុទ្ធសឹងតែជាអ្នកមានសមត្ថភាពខ្ពស់។ ចំពោះការរៀបចំការប្រកួតបវរកញ្ញាភេទទី៣ ដំបូងនេះ ខ្ញុំក៏ព្រួយបារម្ភដែរ ដោយសារខ្លាចរងការរើសអើងនានា តែទីបំផុតការរៀបចំរបស់យើងបែរជាទទួលបានការគាំទ្រច្រើនទៅវិញ។ ព្រោះស្ថានភាពកូវីដ ១៩ នាពេលនេះ ការប្រកួតអន្តរជាតិក៏យើងនៅពុំទាន់ទទួលបានការកំណត់ពីខាងអ្នករៀបចំអន្តរជាតិនៅឡើយដែរ»។
ម្ចាស់ជយលាភីបវរកញ្ញាភេទទី៣ កម្ពុជា ឆ្នាំ ២០២០ ទាំង ៣ រូប គឺមានជយលាភីលេខ ១ បានទៅលើកញ្ញាឯកភេទទី៣ ឈ្មោះកញ្ញា Sai Fhon ខណៈជយលាភីរងទី១ កញ្ញា Hani ចំណែកជយលាភីរងទី២ កញ្ញា Anna ។ ខណៈជយលាភីកំពូលទាំង ៥ រូប ក៏នឹងចុះហត្ថលេខានៅលើកិច្ចសន្យាជាមួយក្រុមហ៊ុន CAMBODIA INTERNATIONALMODELS សម្រាប់រយៈពេល ២ ឆ្នាំ។
ក្រោយពីការរៀបចំលើកទី១ ឆ្នាំ ២០២០ ដែលទើបតែបានប្រគល់ពានរង្វាន់កាលពីថ្ងៃទី ១៩ ខែ កុម្ភៈ ឆ្នាំ ២០២១ កន្លងមកនោះ កម្មវិធីប្រកួតបវរកញ្ញាភេទទី៣ លើកទី២ នៅឆ្នាំ ២០២១ ក៏កំពុងតែរៀបចំប្រកាសជ្រើសរើសទទួលយកបេក្ខភាពនៅតាមតំបន់ខេត្ត-ក្រុងនានាផងដែរ។
អ្នករៀបចំកម្មវិធីប្រកួតប្រជែង Miss Queen Cambodia រូបនេះក៏បានបង្ហើបឱ្យដឹងពីដំណើរការជ្រើសរើសបេក្ខភាពនៅក្នុងរដូវកាលទី២ នេះថា៖ «យើងកំពុងចាប់ផ្តើមទទួលបេក្ខភាពជាបណ្តើរហើយ ខណៈគម្រោងសម្រាប់ឆ្នាំ ២០២១ នេះ យើងនឹងធ្វើតាមរបៀបរក្សាគម្លាតគ្នា ដោយជ្រើសយក ១០ រូបម្តង។
បេក្ខនារីភេទទី៣ ទាំងអស់នឹងត្រូវផូស្តរូប បន្ទាប់ពីជ្រើសវគ្គទី១ តាមរយៈរូបថតដាក់ពាក្យរួចហើយត្រូវឆ្លងកាត់វគ្គទី២ គឺការប្រកួតរ៉ូបលើ ៤ ឈុតផ្សេងគ្នា ដើម្បី Vote តាម Facebook និងការដាក់ពិន្ទុពីគណ:កម្មការ ទើបអាចជាប់ទៅវគ្គពាក់កណ្តាលផ្តាច់ព្រ័ត្រ ខណៈការប្រកួតចុងក្រោយគ្រោងនឹងធ្វើនៅចុងឆ្នាំតែម្តង»។
សម្រាប់ការទំនាក់ទំនងដាក់ពាក្យប្រកួតតាមឆាត Inbox មកកាន់ FB Page: Miss Queen Cambodia និងសាកសួរព័ត៌មានមកតាមលេខទូរស័ព្ទ ០៧០ ៥៩១ ៧៧៧៕