.jpg)
កីឡាករ និងគ្រូបង្វឹកអបអរពេលលើកពានជើងឯក។ ហ៊ាន រង្សី
ភ្នំពេញ៖ នេះជាដំណឹងដ៏ល្អមួយសម្រាប់ក្រុមអ្នកថតកីឡា អាចមានឱកាសបង្ហាញថ្វីដៃថតរូបរបស់ខ្លួន តាមរយៈការដាក់ពាក្យចូលរួមប្រកួតប្រជែងរូបភាពព្រឹត្តិការណ៍ប្រកួតកីឡា នៅក្នុងប្រទេសកម្ពុជា ប្រចាំឆ្នាំ ២០២០ ដែលរៀបចំដោយគណៈកម្មការប្រកួតបាល់ទាត់កម្ពុជា (CNCC) សហការជាមួយនឹងមូលនិធិជប៉ុននៃមជ្ឈមណ្ឌលអាស៊ី ( JFAC-The Japan Foundation)។
ខណៈការប្រកួតរូបថតកីឡា ដែលរៀបចំដំបូង ដោយគណៈកម្មការប្រកួតបាល់ទាត់កម្ពុជា នឹងផ្តល់រង្វាន់លើកទឹកចិត្តចំនួន ៣ នៃម្ចាស់ជយលាភីរូបភាពស្អាតបំផុត ហើយស្នាដៃនោះទៀតសោត ក៏នឹងត្រូវយកទៅដាក់តាំងពិព័រណ៍ផងដែរ ក្រោយពីប្រកាសលទ្ធផលអ្នកទទួលជ័យជម្នះពីការប្រកួត។
បើតាមគេហទំព័រផ្លូវការ CNCC បានឱ្យដឹងពីលក្ខខណ្ឌនៃការប្រកួតនេះថា៖ «ចំពោះអ្នកថតរូបដែលចង់ដាក់ប្រកួតនោះត្រូវបំពេញនូវលក្ខខណ្ឌមួយចំនួន គឺត្រូវជាក្រុមអ្នកថតរូបដែលផ្តល់សិទ្ធិ ឬមានកាតអ្នកសារព័ត៌មានផ្តល់ដោយ CNCC ជាអ្នកថតរូបផ្លូវការរបស់ក្លិបបាល់ទាត់អាជីព ឬរបស់ក្រុមបាល់ទាត់ទាំងអស់នៃក្របខ័ណ្ឌលីគកំពូលកម្ពុជា (MCL) និងការប្រកួតពានរង្វាន់សម្តេចហ៊ុនសែន (HSC) និងជាអ្នកថតរូបដែលរកចំណូលបានដោយការថតរូបកីឡា (Freelancer)។ ចំណែកឯរូបភាពដាក់ប្រកួតវិញនោះ ត្រូវមានចំនួន ៥ សន្លឹក ដែលជាប្រភេទ File.-JPG ជារូបពណ៌ (តែរូបមានការកែសម្រួល ឬរូបដាក់បន្ថែមអ្វីមិនមែនជាការពិតចូល គឺមិនទទួលយកនោះទេ) ត្រូវធ្វើការដាក់អត្ថន័យឱ្យរូបទាំង ៥ នោះ (មិនកំណត់ចំនួនអក្សរនៃការសរសេរទេ) តែកុំខ្លីខ្លាំងពេក។ អាចទទួលយកបាននោះ គឺការសៀរ៉េទំហំពិតរបស់រូបថត តែទោះបីជាយ៉ាងណាសូមធ្វើវាឱ្យបានល្អ និងធានាឱ្យមានភាពច្បាស់ ឬក៏មិនមានប៉ះពាល់ដល់គុណភាពរូបពេលធ្វើការព្រីនលើទំហំក្រដាស A2 (ជាទំហំរូបដាក់តាំងពិព័រណ៍)»។
ពានរង្វាន់សម្តេចហ៊ុនសែន សម្រាប់ព្រឹត្តិការណ៍ប្រកួតកីឡាបាល់ទាត់ឆ្នាំ ២០២០។ហ៊ាន រង្សី
ប្រភពដដែលនៃគេហទំព័រ CNCC ក៏បន្តឱ្យដឹងទៀតថា៖ «ចំពោះរូបភាពវិញ ត្រូវតែថតដោយខ្លួនឯង ហើយជាការថត នាអំឡុងពេលនៃការប្រកួតកីឡាបាល់ទាត់ពានរង្វាន់លីគកំពូលកម្ពុជា ឬពានរង្វាន់មិត្តហ្វូន ខេមបូឌានលីគ (MCL) និងពានរង្វាន់សម្តេចហ៊ុនសែន ក្នុងរដូវកាលឆ្នាំ ២០១៩ និងឆ្នាំ ២០២០»។
ឯការប្រកាសលទ្ធផលអ្នកឈ្នះនឹងជូនដំណឹងទៅថ្ងៃក្រោយ ខណៈការចាប់ផ្តើមទទួលពាក្យចូលរួមប្រកួតវិញចាប់តាំងពីថ្ងៃទី ៥ ខែ វិច្ឆិកា ឆ្នាំ ២០២០ និងបន្តទទួលពាក្យរហូតដល់ថ្ងៃទី ១៩ ខែ វិច្ឆិកា ឆ្នាំ ២០២០ ហើយអាចផ្ញើតាមរយៈអ៊ីមែល: info.cnccstaff@gmail.com៕
ក្រុមកីឡាបាល់ទាត់វិសាខាឈ្នះពានជើងឯកឆ្នាំ ២០២០។ហ៊ាន រង្សី
