.jpg)
ទិដ្ឋភាពនៃការប្រកួតប្រជែង Miss Grand International កាលពីឆ្នាំមុន។ រូបថត ហ្វេសប៊ុក
ភ្នំពេញ៖ ខណៈការប្រកាសជ្រើសរើសបេក្ខនារីឲ្យចូលរួមការប្រកួតសម្រស់នារី Miss Grand Cambodia ឆ្នាំ ២០២០ បានចាប់ផ្តើមតាំងពីចុងឆ្នាំ ២០១៩ មកហើយ មានបេក្ខនារីដាក់ពាក្យចូលរួមជាង ៣០០ រូប តាមរយៈការប្រកួតជម្រុះជាហូរហែ នៅសល់ត្រឹមចំនួន ៥០ រូប ដែលនឹងត្រូវប្រកួតប្រជែងបន្តនៅវគ្គពាក់កណ្តាលផ្តាច់ព្រ័ត្រនាថ្ងៃទី ១៤ ខែ សីហា ឆ្នាំ ២០២០ ស្អែកនេះ។
ក្នុងវគ្គពាក់កណ្តាលផ្តាច់ព្រ័ត្រនេះ មានភាពអស្ចារ្យ ក្នុងផ្សារទំនើបអ៊ីអនម៉ល ២ ចាប់ពីម៉ោង ២ និង ៣០ នាទី នាថ្ងៃសុក្រ ទី ១៤ ខែ សីហា ឆ្នាំ ២០២០ មានផ្សាយផ្ទាល់ពីផេចហ្វេសប៊ុកផ្លូវការ Miss Grand Cambodia និងអ្វីកាន់តែពិសេសជាងនេះទៀត ក៏មានវត្តមានតារាចម្រៀងស្រីអូរីជីណល ដ៏ល្បីឈ្មោះម្ចាស់បទ «នៅទីនេះកំពុងតែមានមនុស្សខូចចិត្ត» អ្នកនាង អេដា ចូលរួមញ៊ាំងកម្មវិធីកាន់តែសប្បាយរីករាយផងដែរ។
បើតាមលោក អ៊ិន សុភិន អគ្គនាយកផលិតកម្មមហាហង្ស ដែលក្រុមហ៊ុនរបស់លោក ក៏ទទួលបានសិទ្ធិរៀបចំកម្មវិធីប្រកួត Miss Grand Cambodia ឆ្នាំ ២០២០ នេះផងដែរ ក្រៅពីសិទ្ធិរៀបចំការប្រកួត Miss Supranational ថ្មីសន្លាងមួយសម្រាប់កម្ពុជានោះ បង្ហើបប្រាប់ថា៖ «កម្មវិធី Miss Grand Cambodia ឆ្នាំ ២០២០ ដំណើរការមកដល់វគ្គពាក់កណ្ដាលផ្ដាច់ព្រ័ត្រហើយ ដែលត្រូវធ្វើឡើងនៅថ្ងៃទី ១៤ ខែ សីហា ឆ្នាំ ២០២០ ចាប់ពីម៉ោង ២ និង ៣០ នាទីរសៀល នៅទីតាំងផ្សារទំនើបអ៊ីអនម៉ល ២។ យើងបានធ្វើការជម្រុះយកបេក្ខនារីពីចំនួនជាង ៣០០ រូប មករហូតសល់ត្រឹមចំនួន ៥០ រូប ឲ្យបន្តចូលរួមប្រកួតវគ្គពាក់កណ្តាលផ្តាច់ព្រ័ត្រ ហើយយើងនឹងចម្រាញ់យកចំនួន ២៥ រូប ដើម្បីបានបេក្ខនារីជាតំណាងឲ្យ ២៥ ខេត្ត-ក្រុងផងដែរ សម្រាប់បើកយុទ្ធនាការឲ្យបេក្ខនារីជាប់វគ្គពាក់កណ្តាលផ្តាច់ព្រ័ត្រនេះ ដែលជាការប្រកួតប្រជែងសន្សំពិន្ទុ ដើម្បីការប្រកួតចុងក្រោយនៅវគ្គផ្តាច់ព្រ័ត្រ ដែលយើងនឹងធ្វើនៅចុងខែកញ្ញា ឆ្នាំ ២០២០។ ហើយសម្រាប់វគ្គផ្តាច់ព្រ័ត្រនោះ យើងនឹងជ្រើសរើសយកបេក្ខនារីជយលាភីចំនួន ៥ រូប ឬហៅថា បេក្ខនារី Top5។ ក្រៅពីនេះយើងក៏មានរៀបចំឲ្យមានជយលាភីផ្សេងៗទៀតដែរ ដូចជាបេក្ខនារីមានស្នាមញញឹមស្រស់ បេក្ខនារីមានដំណើរស្អាត ឬបេក្ខនារីមានសម្រស់ស៊ីកាមេរ៉ា សម្រាប់ការថតកុនជាដើម ដែលទាំងនេះ គឺជាការធ្វើឡើងដើម្បីលើកទឹកចិត្តដល់បេក្ខនារី មិនបានជាប់ក្នុងបេក្ខនារី Top5 នោះ»។
លោក អុិន សុភិន ពេលទទួលសិទ្ធិរៀបចំMiss Grand Cambodia 2020។ ហ្វេសប៊ុក
លោក អ៊ិន សុភិន បានបន្តឲ្យដឹងទៀតថា៖ «កម្មវិធី Miss Grand Cambodia 2020 ក្នុងឆ្នាំនេះ ជាឆ្នាំដែលអស្ចារ្យ ១ ដែរ ដោយកម្មវិធីមិនត្រឹមតែប្រកាសស្វែងរកបេក្ខនារីទូទាំង ២៥ ខេត្ត-ក្រុង ទទួលពាក្យសុំចូលរួមប្រកួតនោះទេ តែកម្មវិធីក៏បានបើកឱកាសឲ្យប្រជាជនខ្មែរ ដែលមានចំណេះជំនាញ ឬមានទេពកោសល្យផ្នែករចនាម៉ូដ អាចមកដាក់ពាក្យចូលរួមប្រកួតយកជយលាភីផងដែរ។
សូមរង់ចាំទស្សនាទាំងអស់គ្នា ថាតើបេក្ខនារីរូបស្រស់ និងឈ្លាសវៃ រូបណាដែលជាបេក្ខនារីស័ក្តិសមបំផុត សម្រាប់តំណាងខេត្តរបស់អ្នក និងសូមរង់ចាំមើលថា តើសម្លៀកបំពាក់តំណាងឲ្យខេត្ត សម្លៀកបំពាក់ក្នុងរាត្រីសមោសរសម្លៀកបំពាក់បុរាណខ្មែរ និងសម្លៀកបំពាក់ផ្សេងៗទៀត ដែលទទួលបានជយលាភីនៅក្នុងកម្មវិធី។
អ្វីដែលយើងកំពុងតែទន្ទឹងរង់ចាំខ្លាំងទៀតនោះ ថាតើបេក្ខនារីរូបណា ដែលនឹងក្លាយជាបេក្ខនារីដ៏ស័ក្តិសមបំផុត និងអាចគ្រងមកុដក្នុងកម្មវិធីប្រកួត Miss Grand Cambodia 2020 នៅកម្ពុជា ដែលខ្លួននឹងត្រៀមបន្តទៀត ដើម្បីបានជាតំណាងប្រទេសទៅចូលរួមប្រកួតនៅក្នុងកម្មវិធីអន្តរជាតិ Miss Grand International ប្រារព្ធធ្វើ្វនៅប្រទេសវេណេស៊ុយអេឡា។
គួរបញ្ជាក់ផងដែរថា កម្មវិធីប្រកួតប្រជែងរកម្ចាស់មកុដផ្នែកសម្រស់ Miss Grand Cambodia 2020 នេះ ត្រូវផលិតកម្មមហាហង្សភាពយន្ត បានទិញសិទ្ធិមកពីប្រទេសថៃ និងបានប្រកាសទទួលពាក្យបេក្ខនារីទូទាំងប្រទេសចំនួន ២៥ ខេត្ត-ក្រុង ខណៈពេលនេះបានឈានមកដល់វគ្គពាក់កណ្តាលផ្តាច់ព្រ័ត្រនៅថ្ងៃទី ១៤ ខែសីហា នេះ៕
