ភ្នំពេញៈ ការបណ្តុះពន្លកតារាកម្ពុជា តាមរយៈកម្មវិធីប្រកួតប្រជែងរើសរកស្រីស្អាត និងប្រុសស្អាត ឬ Freshie Girls & Boys នោះបានឈានមកដល់រដូវកាលជំនាន់ទី ១៧ ហើយនៅក្នុងឆ្នាំ ២០១៨ នេះក្រោមការរៀបចំដោយក្រុមហ៊ុន BKA ENTERTAINMENT បានចម្រាញ់ និងជម្រុះជ្រើសរកឃើញបេក្ខជន-បេក្ខនារី ដើម្បីត្រៀមបណ្តុះនូវគ្រាប់ពូជសិល្បករ-សិល្បការិនីជំនាន់ក្រោយ។
កម្មវិធីប្រកួតប្រជែងរើសរកស្រីស្អាត និងប្រុសស្អាត ឬ Freshie Girls & Boys ជំនាន់ទី ១៧ នៅក្នុងឆ្នាំ ២០១៨ នេះមានលក្ខណពិសេសជាងឆ្នាំមុនៗ ដោយសារតែមានការបន្ថែមនូវកម្មវិធី ២ ផ្សេងទៀតគឺកម្មវិធីប្រកួត Khmer Super Model ជំនាន់ទី ៩ និងកម្មវិធី Mister Cambodia ជំនាន់ទី ២។
ថ្លែងប្រាប់នៅចំពោះមុខបណ្តាអ្នកសារព័ត៌មានជាច្រើននាថ្ងៃកម្មវិធីបើកសន្និសីទសារព័ត៌មានកាលពីថ្ងៃទី ៩ ខែមេសា ឆ្នាំ ២០១៨ នៅឯសណ្ឋាគារជូលីណា លោក ប៊ុនកើដ អាំងអាំនួយសិរី ជាម្ចាស់គម្រោងនៃកម្មវិធី Freshie Girls & Boys កម្មវិធី Khmer Super Model កម្មវិធី Mister Cambodia និងកម្មវិធីប្រកួត Miss Grand Cambodia និងអ្នកគ្រប់គ្រងនៃក្រុមហ៊ុន BKA ENTERTAINMENT បានឲ្យដឹងថា៖ «យើងសូមថ្លែងអំណរគុណជាពន្លឹក ដោយថ្នាក់ដឹកនាំ តាមរយៈក្រសួងវប្បធម៌ និងវិចិត្រសិល្បៈនៃប្រទេសកម្ពុជា បានផ្តល់នូវអាជ្ញាប័ណ្ណ ក៏ដូចជាការមើលខុសត្រូវ ចង្អុលបង្ហាញជាទីប្រឹក្សា ផ្តល់នូវក្រុមសាស្ត្រាចារ្យជំនាញហ្វឹកហាត់ ផ្ទេរចំណេះដឹងផ្នែកសិល្បៈខ្មែរ សម្រាប់បេក្ខជន-បេក្ខនារី នៅគ្រប់កម្មវិធីប្រកួតជារៀងរាល់ឆ្នាំ។ តាមរយៈកម្មវិធីនេះដែរក៏ជាថ្នាល ឬមាគ៌ាមួយក្នុងការចម្លងក្តីស្រមៃនៃយុវជន យុវតីខ្មែរបានសម្រេចនូវគោលដៅ និងក្តីបំណងប្រាថ្នារបស់ពួកគេនៅក្នុងសង្គមសិល្បៈ ដោយបានក្លាយជាសិល្បករ និងសិល្បការិនី ឆ្នើមនៅលើវិថីសិល្បៈកម្ពុជានាពេលអនាគត»។
លោកបន្តថា៖ «ឆ្នាំ ២០១៨ នេះ ជាលើកទី ១ ដែលរៀបចំកម្មវិធី ៣ ក្នុងថ្ងៃតែមួយ ដើម្បីជាវេទិកាកិត្តិយសមួយទុកឲ្យយុវជន យុវតីកម្ពុជា អាចបង្ហាញសមត្ថភាព និងទេពកោសល្យរបស់ពួកគេ ជាមួយនឹងរូបសម្បត្តិស្រស់សោភា និងស្រស់សង្ហា»។
កម្មវិធី ៣ រួមគ្នា ដែលមានកម្មវិធី Freshie Girls & Boys ជំនាន់ទី ១៧ កម្មវិធី Khmer Super Model ជំនាន់ទី ៩ និងកម្មវិធី Mister Cambodia ជំនាន់ទី ២ មានបេក្ខជន និងបេក្ខនារីចូលរួមដាក់ពាក្យប្រកួតសរុបចំនួន ៣០០០ នាក់ មកពីបណ្តាវិទ្យាល័យ និងមហាវិទ្យាល័យនានាទូទាំងប្រទេសកម្ពុជា ក្រោយពីជ្រើសរើសមកកម្មវិធី Freshie Girls & Boys រកឃើញស្រីស្អាត ២៥ រូប និងបេក្ខជន ១៦ រូប ខណៈបេក្ខនារីនៃកម្មវិធី Khmer Super Model បាន ១២ រូប និង Mister Cambodia បានបេក្ខជន ១០ រូប។
ការប្រកាសម្ចាស់ជយលាភីទាំង ៣ នឹងធ្វើនៅក្នុងខែកក្កដា ឆ្នាំ ២០១៨ ខាងមុខ ខណៈកម្មវិធី Freshie Girls & Boys នឹងចាក់ផ្សាយនៅបុស្តិ៍ MyTv ថ្ងៃទី ២០ ខែមេសា នេះ៕