The Phnom Penh Post Search

Search form




Logo of Phnom Penh Post newspaper Phnom Penh Post - ការ​ប្រគំ​តន្ត្រី​តូ​យ៉ូតា​ក្លា​ស៊ិក​លើក​ទី ៤ នៅ​កម្ពុជា​ស្វែង​រក​ថវិកា​ជួយ​គន្ធ​បុប្ផា​




ការ​ប្រគំ​តន្ត្រី​តូ​យ៉ូតា​ក្លា​ស៊ិក​លើក​ទី ៤ នៅ​កម្ពុជា​ស្វែង​រក​ថវិកា​ជួយ​គន្ធ​បុប្ផា​

Content image - Phnom Penh Post
បុគ្គលិក​ និង​ថ្នាក់​ដឹកនាំ​ក្រុម​ហ៊ុន​តូយ៉ូ​តា ថ្ងៃ​ប្រកាស​ពីការ​ប្រគំ​តន្ត្រី​តូយ៉ូតា​ក្លា​ស៊ិក។ ឈឹម ស្រីនាង

ការ​ប្រគំ​តន្ត្រី​តូ​យ៉ូតា​ក្លា​ស៊ិក​លើក​ទី ៤ នៅ​កម្ពុជា​ស្វែង​រក​ថវិកា​ជួយ​គន្ធ​បុប្ផា​

ភ្នំពេញ: រួម​សហ​ការ​ជាមួយ​ក្រុម​តន្ត្រី The Baltis Neopolis Orchestra ក្រុម​ហ៊ុន​តូយ៉ូតា​ នឹង​ប្រារ​ព្ធ​កម្មវិធី​តន្ត្រី​សប្បុរស​ធម៌​តូ​យ៉ូតា​ក្លា​ស៊ិក​ឆ្នាំ ២០១៦ របស់​ខ្លួន​នៅ​កម្ពុជា​នា​ពេល​ខាង​មុខ​នេះ។

តូយ៉ូតា​ក្លា​ស៊ិក ជា​កម្មវិធី​សប្បុរស​ធម៌​ដែល​ផ្តួច​ផ្តើម​ឡើង​ក្នុង​គោល​បំណង​ចូល​រួម ចំណែក​ជួយ​ទៅ​ដល់​សកម្មភាព​សង្គម​នៅ​តាម​តំបន់ និង​ទីកន្លែង​ផ្សេងៗ តាម​រយៈ​ថវិកា​ដែលជា​ចំណូល​បាន​ពី​ការលក់​សំបុត្រ​ចូល​ទស្សនា។

តន្ត្រី​សប្បុរស​ធម៌​នេះ​ត្រូវ​បាន​រៀបចំ​ឡើង​ជា​រៀង​រាល់​ឆ្នាំ​ចាប់​តាំង​ពី​ឆ្នាំ ១៩៩០ មក​ម្ល៉េះ ហើយ​ឆ្នាំនេះ​ជា​លើក​ទី២៧ ដែល​ក្រុម​ហ៊ុន​តូយ៉ូតា​និង​ប្រគំ​តន្ត្រី​តូយ៉ូតា​ក្លា​ស៊ិក​នៅ​ក្នុង​តំបន់​អាស៊ី​ចំនួន ៩ ប្រទេស​ដូចជា ប្រ៊ុយ​ណេ ឥណ្ឌូ​នេស៊ី ម៉ាឡេ​ស៊ី សិង្ហបុរី​ ហ្វីលី​ពីន ថៃ កម្ពុជា ឡាវ និង​វៀត​ណាម ផ្តើម​ចាប់ពី​ខែ​តុលា រហូត​ដល់​ខែ​វិច្ឆិកា ឆ្នាំ ២០១៦។

យ៉ាង​ណាមិ​ញ នៅ​ប្រទេស​កម្ពុជា ការប្រគំ​តន្ត្រី​តូយ៉ូតា​ក្លា​ស៊ិក​ ជា​លើក​ទី ៤ នៅ​ឆ្នាំ​នេះ​នឹង​មានការ​ចូលរួម​ជា​កិត្តិយស​ ក្រោម​ព្រះរា​ជាធិ​បតី​ភាព​ដ៏​ខ្ពង់ខ្ពស់​របស់​ព្រះ​ករុណា ព្រះបាទ​សម្តេច ព្រះ​បរម​នាថ នរោ​ត្តម សីហ​មុនី ព្រះម​ហា​ក្សត្រ នៃ​ព្រះ​រាជា​ណាចក្រ​កម្ពុជា។ រឹតតែ​ពិសេស​នោះ​ឆ្នាំ​នេះ​ក៏មាន​ការចូល​រួម​សម្តែង​ពី​ក្រុម​តន្ត្រី​បទ​ភ្លេង​ខ្មែរ ដែល​ជា​ព្រះ​រាជ​ស្នាដៃ​និ​ពន្ធ​របស់ ព្រះ​មហា​វីរក្សត្រ ព្រះបាទ​នរោត្តម សី​ហនុ ព្រះ​បរម​រតន​កោដ្ឋ។

ការ​ប្រគំ​ស្ថិត​នៅ​ក្រោម​ការ​ដឹកនាំ​ដោយ លោក Vasko Vassilev និង​លោក​ស្រី Pa-mela Tan Nicholson ដែល​ជា​តន្ត្រីករ និង​ជា​អ្នក​និពន្ធ​ដ៏​ល្បី​ល្បាញ​ពី​ប្រទេស​ប៉ូឡូញ ដែល​ធ្លាប់​ឈ្នះ​នូវ​ពាន​រង្វាន់​សិល្បៈ​ល្បីៗ​ជាច្រើន និង​មាន​ការ​បង្ហាញ​ចម្រៀង​ជា​ក្រុម​របស់​យុវជន​ដែល​ប្រកប​ដោយ​ទេ​ពកោ​សល្យ​រស់រវើក​មកពី​សាលា​តន្ត្រី​ Hosanna។

តន្ត្រី​តូយ៉ូតា​ក្លា​ស៊ិក​ជា​លើក​ទី៤ នេះ​នឹង​ប្រព្រឹត្ត​នៅ​ថ្ងៃទី៦ ខែ​វិច្ឆិកា​ឆ្នាំ២០១៦ នៅ​សាល​មហោ​ស្រព​ចតុមុ​ខ ចាប់ពី​ម៉ោង ៧ ដល់​ម៉ោង៩ យប់​ ដើម្បី​ស្វែងរក​ថវិកា​បរិច្ចាគ​បន្ថែម​ទៅកាន់​មន្ទីរ​ពេទ្យ​គន្ធបុ​ប្ឋា ដោយ​ការ​ប្រគំ​តន្ត្រី​ឆ្នាំ​មុន ថវិកា ៤០១៣០ ដុល្លារ​ត្រូវ​បាន​ផ្ដល់​ទៅ​មន្ទីរ​ពេទ្យ​នេះ។​

លោក គង់ នួន​ ប្រធាន​ក្រុម​ហ៊ុន​តូយ៉ូ​តា (ខេ​មបូឌា) បញ្ជាក់​ថា៖ «​ថវិកា​ទាំង​អស់​ដែល​បាន​មក​ពី​ការ​លក់​សំបុត្រ តន្ត្រី​តូយ៉ូតា​ក្លាស៊ិក​ទៅ​មន្ទីរ​ពេទ្យ​គន្ធ​បុប្ឋា ហើយ​សង្ឃឹម​ថា ​មាន​អ្នក​ចូល​រួម​ទស្សនា​កាន់តែ​ច្រើន​ជាង​ឆ្នាំ​មុន»។

សំបុត្រ​ចូលរួម​ទស្សនា​តន្ត្រី​នេះនឹង​ចាប់​ផ្តើម​លក់​ចាប់​ពី​ថ្ងៃទី១២ ខែកញ្ញា​ ឆ្នាំ ២០១៦ តទៅ ដោយ​តម្លៃ​សំបុត្រ​មួយ​ត្រឹម​តែ ៣៥ ដុល្លារ​។ ការ​ជាវ​ អា​ចធ្វើ​បាន​នៅ​ការិយា​ល័យ​កណ្តាល និង គ្រប់​សាខា ក្រុមហ៊ុន​តូយ៉ូតា (ខេម​បូ​ឌា) បណ្ណាគារ​ ម៉ូ​ញូ​មិន​ប៊ុកស៍ ព្រះ​នរោត្តម និង​សាខា​ផ្សារ​ទំនើប​អ៊ីអន​ម៉ល​ ឬ​ទូរស័ព្ទ​លេខ ០១៧​ ៣៣៣ ៥០៣៕

អត្ថបទគួរចាប់អារម្មណ៍