.jpg)
ខ្លាឃ្មុំ ជាសត្វដែលគេនិយមប្រើសាច់ជ្រូក ៣ ជាន់ និងនំដូណាត់ ធ្វើជានុយ។ រូបថត AFP
ក្រុងឡូសអេនជឺលេស៖ ការដាក់នុយសាច់ជ្រូក ៣ ជាន់ និងនំដូណាត់ ទាក់ទាញខ្លាឃ្មុំ ការប្រើភ្លើងហ្វាបញ្ចាំងភ្នែក និងការប្រមាញ់កូនចចកដល់ទីជម្រក ក្លាយជាទង្វើស្របច្បាប់នៅទូទាំងរដ្ឋអាឡាស្កា ក្រោមច្បាប់សហព័ន្ធថ្មី ក្រោយដកបម្រាមដែលធ្លាប់តែខុសច្បាប់ក្នុងរបបដឹកនាំរបស់លោក បារ៉ាក់ អូបាម៉ា។
ទិចនិកប្រមាញ់សត្វព្រៃដ៏ចម្រូងចម្រាស រួមទាំងការប្រើឆ្កែតាមដានខ្លាឃ្មុំ និងប្រមាញ់ក្ដាន់ហែលទឹកពីលើម៉ូតូទឹក រងនូវការរិះគន់ដោយក្រុមបរិស្ថាននិយម តែត្រូវបានសាទរដោយកុលសម្ព័ន្ធប្រមាញ់សត្វដ៏សម្បូរបែបជាអាហារ។
ក្រោយទីភ្នាក់ងារសេវាកម្មឧទ្យានជាតិរបស់អតីតប្រធានាធិបតី បារ៉ាក់ អូបាម៉ា ក្នុងឆ្នាំ ២០១៥ បានហាមឃាត់ដល់ការបរបាញ់ សម្រាប់ទុកអភិរក្សក្នុងរដ្ឋអាឡាស្កា។
អ្នកប្រមាញ់នៅអាឡាស្កា និងមន្ដ្រីមូលដ្ឋានបានប្រឆាំងនឹងបម្រាមនេះ ដោយចាត់ទុកជាការបង្កើនឱកាសឲ្យសត្វព្រៃអាចឈ្លានពានដែនដីមនុស្ស និងប៉ះពាល់សន្ដិសុខស្បៀង។
លោក អេដឌី ក្រាសសឺ នាយកអង្គការអភិរក្សសត្វព្រៃនៅនាយកដ្ឋានជលផលរដ្ឋអាឡាស្កា បានប្រាប់ New York Times មុននេះថា៖ «ការរស់នៅដាច់ពីដីគោក គឺជាកត្តាដ៏ងាយរងគ្រោះសម្រាប់អ្នកជនបទអាឡាស្កា»។
ប៉ុន្ដែក្រុមធម្មជាតិនិយម និងអង្គការសិទ្ធិសត្វ បានរិះគន់ការសម្រេចរបស់រដ្ឋបាលលោក ត្រាំ ក្នុងការលើកបម្រាមចាស់ ដោយចោទប្រកាន់សេតវិមាន ពីការបង្ហិនបង្ហោចសត្វព្រៃជាថ្នូរនឹងសេដ្ឋកិច្ច និងបម្រើចំណូលចិត្ដនៃការប្រមាញ់។
ពលរដ្ឋខ្លះលើកឡើងថា ការប្រមាញ់ជារឿងចាំបាច់កុំឲ្យសត្វព្រៃឈ្លានពានជម្រក។ រូបថត AFP
លោក ចេមី រ៉េផាផត ក្លាក ប្រធាន និងអគ្គនាយកអង្គការ Defenders of Wildlife បាននិយាយថា៖ «រដ្ឋបាលលោក ត្រាំ បានដើរថយក្រោយចំពោះការអភិរក្សសត្វព្រៃ»។
លោកបន្តថា៖ «ការអនុញ្ញាតឲ្យមានការប្រមាញ់កូនខ្លាឃ្មុំ និងកូនចចក ក្នុងដែនជម្រក ពិតជាទង្វើអមនុស្សធម៌ និងឃោរឃៅ»។
សភាអាមេរិកកាលពីខែមេសា ឆ្នាំ ២០១៧ បានដកបម្រាមលើការបរបាញ់ខ្លាឃ្មុំពីឧទ្ធម្ភាគចក្រ ឬយន្ដហោះ ក្នុងរដ្ឋអាឡាស្កា។ កូនប្រុសច្បងរបស់លោក ដូណាល់ ត្រាំ ឈ្មោះ ដូណាល់ ជេអ គឺជាអ្នកបានធ្វើដំណើរប្រមាញ់សត្វទៅកាន់អាឡាស្កាជាច្រើនលើកច្រើនសា។
កាលពីដើមឆ្នាំ Safari Clubជាអ្នកគាំទ្រការបរបាញ់សត្វព្រៃ មានមូលដ្ឋាននៅអាមេរិក ដែលធ្វើយុទ្ធនាការឲ្យដកបម្រាមនេះ បានបង្កើតឆ្នោតរៃអង្គាសប្រាក់ ដើម្បីធ្វើជារង្វាន់ធំ ដែលរ៉ាប់រងការចំណាយលើការបរបាញ់ជាមួយកូនប្រុសរបស់លោក ត្រាំ៕ AFP/HR
