.jpg)
ក្រុមសិស្សានុសិស្សវិទ្យាល័យជាបេក្ខជនប្រឡងផលិតរឿងខ្លីសម្រាប់សិស្សវិទ្យាល័យកាលពីឆ្នាំ ២០១៨។ រូបថត សហការី
ភ្នំពេញៈ ស្ថានទូតជប៉ុនប្រចាំនៅប្រទេសកម្ពុជារួមសហការជាមួយនឹងក្រសួងអប់រំ យុវជន និងកីឡានឹងរៀបចំការប្រកួតវគ្គពាក់កណ្តាលផ្តាច់ព្រ័ត្រក្នុងប្រទេសកម្ពុជាជាលើកទី ១១ ឬជាការប្រឡងផលិតរឿងខ្លីសម្រាប់សិស្សវិទ្យាល័យឆ្នាំ ២០១៩ ក្រោមប្រធានបទថា «តើអ្នកយល់យ៉ាងណាចំពោះការបង្កបញ្ហាដល់អ្នកដទៃ? តើត្រឹមត្រូវទេសម្រាប់តែផលប្រយោជន៍ផ្ទាល់ខ្លួន? តើអ្នកអាចគិតដល់អ្នកដទៃដែរឬទេ?»។
ការប្រឡងផលិតរឿងខ្លីសម្រាប់សិស្សកំពុងតែរៀននៅវិទ្យាល័យនានា តាមរយៈកម្មវិធីមហោស្រពភាពយន្តអន្តរជាតិអាស៊ីលើកទី ១១ ប្រចាំឆ្នាំ ២០១៩ នេះបានចាប់ផ្តើមទទួលពាក្យបេក្ខភាពចូលរួមប្រកួតហើយ ដើម្បីជ្រើសរើសក្រុមសិស្សដែលមានស្នាដៃផលិតរឿងល្អចំនួន ៣ ក្រុមទៅចូលរួមមហោស្រពភាពយន្តកុមារអន្តរជាតិអាស៊ីឆ្នាំ ២០១៩ ដែលនឹងប្រព្រឹត្តទៅនៅថ្ងៃទី ៧ ខែធ្នូ ឆ្នាំ ២០១៩ នៅទីក្រុងមីណាមីអាវ៉ាជី ខេត្តហ្យូហ្គុ ប្រទេសជប៉ុន។
បើតាមសេចក្តីប្រកាសព័ត៌មានរបស់ស្ថានទូតជប៉ុននៅកម្ពុជាបានជូនដំណឹងថា៖ «សិស្សវិទ្យាល័យថ្នាក់ទី ១០ និងថ្នាក់ទី ១១ ជាទីមេត្រី តោះចូលរួមការប្រឡងផលិតរឿងខ្លី ដើម្បីចូលរួមការប្រកួតថ្នាក់តំបន់នៅប្រទេសជប៉ុន!ការដាក់ពាក្យលើការប្រឡងផលិតរឿងខ្លី សម្រាប់សិស្សវិទ្យាល័យ។ នៅក្នុងវគ្គពាក់កណ្តាលផ្តាច់ព្រ័ត្រក្នុងប្រទេសកម្ពុជាលើកទី ១១ នឹងចាប់ផ្តើមទទួលពាក្យចាប់ពីថ្ងៃទី ៨ ខែកក្កដានេះរហូតដល់ថ្ងៃទី ២៣ ខែសីហា ឆ្នាំ ២០១៩។ សូមអញ្ជើញសិស្សវិទ្យាល័យថ្នាក់ទី ១០ និង ទី ១១ ទាំងអស់ចូលរួមការប្រឡងកុំបីខាន។ ដោយឡែកក៏មានការធ្វើបទបង្ហាញណែនាំចូលរួមប្រកួតផលិតរឿងខ្លីសម្រាប់សិស្សវិទ្យាល័យនឹងធ្វើឡើងនៅថ្ងៃអាទិត្យ ទី ១៤ ខែកក្កដា ឆ្នាំ ២០១៩ ដែរនៅវេលាម៉ោង ១៤-១៥ នៅបន្ទប់លេខ ៩ នៃមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC)»។
ក្រុមគណៈកម្មការ និងសិស្សានុសិស្សចូលរួមការប្រកួតឆ្នាំ ២០១៨។ រូបថត សហការី
គួររំឭកដែរថាការប្រឡងផលិតរឿងខ្លីសម្រាប់សិស្សវិទ្យាល័យឆ្នាំ ២០១៨ ក្រោមប្រធានបទថា «ការទទួលខុសត្រូវផ្ទាល់ខ្លួន (Self-resposibility)» កម្មវិធីប្រកួតតម្រូវឲ្យមានបេក្ខជនចូលរួមប្រកួតប្រជែងគឺសុទ្ធតែជាក្រុមសិស្សានុសិស្សកំពុងតែរៀននៅថ្នាក់វិទ្យាល័យដែលរៀនថ្នាក់ទី ១០ និងថ្នាក់ទី ១១ ខណៈការទទួលពាក្យចូលរួមប្រកួតឆ្នាំនេះត្រូវដាក់ពាក្យនៅឯនាយកដ្ឋានមធ្យមសិក្សាចំណេះទូទៅ។
ចំណែកការប្រកួតវគ្គពាក់កណ្តាលផ្តាច់ព្រ័ត្រនៃកម្មវិធីមហោស្រពភាពយន្តអាស៊ីអន្តរជាតិលើកទី ១១ នៅក្នុងប្រទេសកម្ពុជានឹងធ្វើនៅថ្ងៃទី ១៦ ខែកញ្ញា ឆ្នាំ ២០១៩ នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) វេលាម៉ោង ២ រសៀល និងក្រោយមកជ្រើសរើសយកចំនួន ៣ ក្រុមដើម្បីយកទៅចូលរួមមហោស្រពភាពយន្តកុមារអន្តរជាតិអាស៊ីឆ្នាំ ២០១៩ ដែលនឹងប្រព្រឹត្តទៅនៅថ្ងៃទី ៧ ខែធ្នូ ឆ្នាំ ២០១៩ នៅទីក្រុងមីណាមីអាវ៉ាជីនៃខេត្តហ្យូហ្គុប្រទេសជប៉ុន។
កម្មវិធីប្រកួតតម្រូវឲ្យមានបេក្ខជនចូលរួមប្រកួតប្រជែងគឺសុទ្ធតែជាក្រុមសិស្សានុសិស្សកំពុងតែរៀននៅថ្នាក់វិទ្យាល័យដែលរៀនថ្នាក់ទី ១០ និងថ្នាក់ទី ១១ ខណៈការទទួលពាក្យ ដើម្បីចូលរួមប្រឡងផលិតរឿងខ្លីនេះគឺអាចរកបានតាមរយៈគេហទំព័រស្ថានទូតជប៉ុន៖ https://www.kh.emb-japan.go.jp/itpr_en/00_000145.html៕
