.jpg)
ផ្ទាំងផ្សព្វផ្សាយពីតន្ត្រីកាបារ៉េតនៅលើរ៉ឺម៉កម៉ូតូ។ រូបថត Phnom Penh Players
ភ្នំពេញ: ដោយយកលំនាំតាមតន្ដ្រីកាបារ៉េត និងសៀវភៅ Berlin Stries របស់កវី Christopher Isherwood គួបផ្សំនឹងរូបភាពផ្ទៃក្រោយអាណានិគមជប៉ុន ក្រុម Phnom Penh Players នឹងរៀបចំការសម្ដែង Shanghai Cabaret នៅភោជនីយដ្ឋាន ផ្ទះចិន (Chinese House) និងបរិច្ចាគប្រាក់ចំណូលដល់គ្លីនិកក្នុងស្រុកមួយដើម្បីគាំពារដល់ក្រុមអ្នកស្រឡាញ់ភេទដូចគ្នាក្នុងការជោះឈាមរកមេរោគហ៊ីវ និងសេវាព្យាបាលដោយឥតគិតថ្លៃ។
Shanghai Cabaret សម្ដែងដោយក្រុម Phnom Penh Players ដែលតែងតែធ្វើការសម្ដែងតាមសាច់រឿងជាច្រើនរៀងរាល់ឆ្នាំ និងបានបរិច្ចាគប្រាក់ជាអំពើមនុស្សធម៌សង្គម និងធ្វើការបរិច្ចាគដល់គ្លីនិក ឈូកស សម្រាប់ថ្លៃជួសឈាម និងព្យាបាលក្រុមបុរសស្រឡាញ់ភេទដូចគ្នាដែលផ្ទុកមេរោគហ៊ីវ។
លោក ឆាស ហាមីតតុន ជានាយក Phnom Penh Players បាននិយាយថា៖ «យើងមានមោទនភាពដែលបានយកសិល្បៈបង្កើតសកម្មភាពមនុស្សធម៌។ ក្រុមបុរសវ័យក្មេងស្រឡាញ់ភេទដូចគ្នាទៅធ្វើតេស្ដឈាមនៅគ្លីនិកមានចំនួន ១៥ ភាគរយដែលយោងតាមទិន្នន័យពីគ្លីនិកឈូកស។ ប្រាក់ចំណូលពីការសម្ដែងនឹងអាចជួយគ្លីនិកផ្ដល់សេវាកម្មជូនពួកគេដោយឥតគិតថ្លៃ»។
សហគមន៍ពាណិជ្ជកម្ម LGBT ក្នុងស្រុកមានបំណងចង់ឧបត្ថម្ភកម្មវិធីសម្ដែង និងបង្ហាញការគាំទ្រដល់សេវាកម្មតេស្ដឈាមរកមេរោគហ៊ីវ និងសុខភាពផ្លូវភេទផងដែរ។
ការហាត់សមសម្រាប់ Shanghai Cabaret ដែលនឹងធ្វើឡើងនៅភោជនីយដ្ឋាន ផ្ទះចិន។ រូបថត Phnom Penh Players
ក្នុងនាមជាក្រុមសម្ដែងក្រៅផ្លូវការដែលរីករាយរួមគ្នាក្នុងការផលិតទម្រង់សិល្បៈនានា Phnom Penh Players តែងតែសម្លឹងរកក្រុមសម្ដែងអ្នករៀបចំឆាក តន្ដ្រីករ អ្នករៃអង្គាសប្រាក់ អ្នកជួលសម្លៀកបំពាក់ និងក្រុមការងារផ្សេងៗដោយសារអ្នកសម្ដែងក៏អាចក្លាយជាទស្សនិកជនដោយទុកឱកាសឲ្យតួថ្មីមកបន្ត។
តាំងពីដើមមក Phnom Penh Players ដែលមានឈ្មោះបោះសំឡេងក្នុងចំណោមសហគមន៍ជនបរទេសជាជាងពលរដ្ឋខ្មែរ រមែងរៃអង្គាសប្រាក់ជួយក្នុងទង្វើមនុស្សធម៌ជាហូរហែនៅកម្ពុជា។
រយៈពេលជាង ៧០ ឆ្នាំតាំងពីបង្កើតតន្ដ្រី Shanghai Cabaret ដំបូងហើយក្រុម Phnom Penh Players បានលើកយកមកសម្ដែងដើម្បីនាំអារម្មណ៍ទស្សនិកជនវិលទៅកាន់ទសវត្សរ៍ឆ្នាំ ១៩៤០ កាលគ្រាក្រុងស៊ាងហៃស្ថិតក្រោមនឹមត្រួតត្រាជប៉ុន ដោយលោក ឆាស ហាមីតតុន បានឲ្យដឹងថា៖ «វាជាអវសាននៃរជ្ជកាលរឿងរ៉ាវស្នេហា»។
ទោះស្ថិតក្រោមអាណានិគមជប៉ុន ទីក្រុងស៊ាងហៃជាតំបន់អន្ដរជាតិ ដែលមានសេរី និងឯករាជ្យ តែក្រោយមកវាបានដល់ទីបញ្ចប់ក្រោយពីការវាយប្រហារកំពង់ផែគជ់ (Pearl Harbor)។
ពិភពលោករាត្រីបែបស្រើបស្រាលក្នុងទីក្រុងត្រូវបានបញ្ចប់ពេលជប៉ុនគ្រប់គ្រងតំបន់អន្ដរជាតិទាំងស្រុងក្នុងឆ្នាំ ១៩៤១។ នោះជាទីអវសាននៃរជ្ជកាលស្នេហារោលរាល។
ការសម្ដែង Shanghai Cabaret បើកសម្ពោធនៅថ្ងៃទី ១៣ ខែមីនាដែលមានរយៈពេល ៤ រាត្រីនៅភោជនីយដ្ឋាន ផ្ទះចិន រាជធានីភ្នំពេញ។
ចំពោះព័ត៌មានលម្អិតអ្នកអាចទាក់ទងក្រុមការងារ Phnom Penh Players តាមរយៈអ៊ីមែល arttu.karppanen@gmail.com៕
