.jpg)
ក្រុមរបាំសហសម័យកញ្ញា Belle ពេលសម្តែងរបាំសហសម័យកន្លងមក។ រូបថត សហការី
ភ្នំពេញៈ នាថ្ងៃទី ២៧ ខែធ្នូ ឆ្នាំ ២០២០ ខាងមុខនេះ នឹងមានការបង្ហាញពីការសម្តែងរបាំសហសម័យមួយ ក្រោមប្រធានបទថា «កំណប់បំបាំងភ្នែក» ដែលបកស្រាយពីអត្ថន័យ ដោយនាដកា កញ្ញា ជុំវណ្ណ សូដាជីរី ហៅកញ្ញា Belle ដែលរៀបចំដោយកម្មវិធី TEDxRUPP 2020។
បើតាមសេចក្តីប្រកាសព័ត៌មានពីគេហទំព័រឈ្មោះ TEDx RUPP បានបង្ហោះសារឱ្យដឹងថា៖ «ឆ្លងកាត់បទពិសោធជាអ្នករបាំដ៏ល្បី និងជោគជ័យម្នាក់កញ្ញា Belle នឹងឡើងមកពន្យល់ទស្សនិកជនអ្នកស្តាប់ឱ្យស្គាល់ និងយល់កាន់តែច្បាស់ពីគុណប្រយោជន៍របស់របាំ និងរបាំសហសម័យ។
ក្រោមប្រធានបទ «កំណប់បំបាំងភ្នែក» របស់កម្មវិធី TEDxRUPP 2020 របស់យើង កញ្ញា ជុំវណ្ណ សូដាជីវី នឹងបកស្រាយអំពី «ការវិវត្តរបាំខ្មែរ និងស្ត្រីជានាដកា (From Traditional to Contemporary Dance Form) ផងដែរ»។
កញ្ញា ជុំវណ្ណ សូដាជីរី សាស្ត្រាចារ្យរបាំប្រពៃណីខ្មែរ និងសហសម័យ។ រូប សហការី
តាមគេហទំព័រនេះដដែលបានបន្តរំឭកឱ្យដឹងអំពីប្រវត្តិនាដកខ្មែររូបនេះថា គាត់បានចាប់ផ្តើមហ្វឹកហាត់ រាំរបាំព្រះរាជទ្រព្យតាំងពីអាយុ ៩ ឆ្នាំមក។ តែពេលគាត់មានអាយុ ១៦ ឆ្នាំគាត់បានស្វែងយល់ និងស្គាល់ពីទម្រង់នៃរបាំសហសម័យ ជាមួយនឹងភាពងាយស្រួលក្នុងការកែច្នៃរបាំច្រើន។ ដោយសារតែជាការស្រឡាញ់ និងចង់អភិវឌ្ឍភាពច្នៃប្រឌិតផ្នែករបាំសហសម័យនោះ កញ្ញា Belle ត្រូវបានទទួលឱ្យចូលសិក្សាសម្រាប់កម្មវិធីមួយឈ្មោះ Robert Wilson''s Watermill Center 2006 International Summer Arts Program ដែលបានដឹកនាំដោយអង្គការ Amrita Performing Arts របស់កម្ពុជា។
ចាប់តាំងពីពេលនោះមក កញ្ញា Belle បានក្លាយទៅជាអ្នកបង្កើតក្បាច់រាំម្នាក់ និងបានចូលរួមសិក្ខាសាលារបាំសហសម័យ ជាច្រើននៅទូទាំងពិភពលោក។ ក្នុងដំណើរជាអ្នករបាំរបស់គាត់ កញ្ញា Belle បានបង្កើត និងអភិវឌ្ឍក្បាច់រាំជាច្រើនដែលលើសពីនេះទៅទៀតនោះ កញ្ញា Belle ក៏បានបង្កើតក្រុមរបាំផ្ទាល់ខ្លួនមួយមានឈ្មោះថា «SilverBell» នៅឆ្នាំ ២០០៣ ដែលជាស្នាដៃផ្ទាល់ខ្លួនរបស់គាត់ផងដែរ។ បច្ចុប្បន្នគាត់ក៏ជាសាស្ត្រាចារ្យផ្នែករបាំប្រពៃណីខ្មែរ និងរបាំសហសម័យនៃមហាវិទ្យាល័យនាដសាស្ត្រនៃសាកលវិទ្យាល័យភូមិន្ទវិចិត្រសិល្បៈ។
សម្រាប់ការទស្សនាសម្តែងរបាំសហសម័យនាថ្ងៃទី ២៧ ខែធ្នូ ឆ្នាំ ២០២០ នាពេលចុងក្រោយនេះនឹងចាប់ផ្តើមពីម៉ោង ១ រសៀលដល់ទៅម៉ោង ៥ ល្ងាចខណៈសំបុត្រ ១ សន្លឹក តម្លៃ ៧ ដុល្លារសម្រាប់សិស្សនិស្សិតសំបុត្រ ១ សន្លឹក ១០ ដុល្លារ សម្រាប់សាធារណជន និង ១ សន្លឹក ៣ ដុល្លារ សម្រាប់អ្នកទស្សនាតាមប្រព័ន្ធអនឡាញដែលអាចចូលរួមតាមតំណរបស់កម្មវិធីនេះបានគឺ bit.ly/35poSZI៕
កញ្ញា ជុំវណ្ណ សូដាជីរី សាស្ត្រាចារ្យរបាំប្រពៃណីខ្មែរ និងសហសម័យ។ រូប សហការី
