.jpg)
បារ៍រថយន្តធ្លាប់ជាកន្លែងដែលពលរដ្ឋក្រេបភេសជ្ជៈសន្ទនាគ្នាលេង។ រូបថត AFP
ក្រុងប៉ារីស: ហាងកាហ្វេបារាំងបែបបុរាណជាទីជំនួបរវាងមនុស្សម្នាមកពីគ្រប់ជាតិសាសន៍កំពុងតែក្លាយជាទិដ្ឋភាពដ៏កម្រក្នុងភូមិឋាននានា តែបុរសម្នាក់ជាមួយរថយន្ដវ៉ែន និងកាន់អាជ្ញាប័ណ្ណលក់ភេសជ្ជៈបានដុតដៃដុតជើងជួយស្រោចស្រង់ប្រពៃណីអ្នកជនបទនេះឲ្យរស់ឡើងវិញ។
គ្រាដ៏មមាញឹកកាលពីថ្ងៃសុក្រលោក សេបាស្ទែន ឈើរីយើរ ជាអតីតបុគ្គលិកផ្នែកអប់រំអាយុ ៤៤ ឆ្នាំកំពុងបម្រើភេសជ្ជៈ និងបង្ហាញភាពរួសរាយរាក់ទាក់ពីក្រោយបារ៍ «Bar Truck» ក្នុងឃុំ Villequiers ដែលមានប្រជាជន ៤៨៣ នាក់។
មេឃុំ V llequiers លោកប៉ាស្កាល់ មែរូ ដែលជាគ្រូបង្រៀនម្នាក់ក្នុងភូមិផងនោះបាននិយាយថា៖ «ហាងកាហ្វេចុងក្រោយនៅទីនេះបានបិទទ្វារកាលពីជាង ១ ឆ្នាំមុន តែហាងចុងក្រោយបំផុតតាំងពីឆ្នាំ ១៩៨៥ យើងឃើញមានតែ ៤ ប៉ុណ្ណោះ»។
រថយន្តមានតង់សំចតបម្រើភេសជ្ជៈ ផ្ដល់ឱកាសឲ្យអតិថិជនជជែកគ្នា។ រូបថត AFP
ទំនោរនេះបានចូលរួមចំណែកបំបែកគម្លាតកាន់តែដាច់ឆ្ងាយរវាងក្រុងប៉ារីស និងទីក្រុងនានា។ បារាំងមានហាងកាហ្វេប្រមាណ ២០ ម៉ឺនទីតាំងក្នុងឆាំ្ន ១៩៦០ ដែលរមែងមានមុខងារជាមជ្ឈមណ្ឌលតំបន់ប្រជុំជនទូទាំងប្រទេស តែនៅឆ្នាំ ២០១៥ ចំនួនហាងកាហ្វេបានធ្លាក់ចុះមកត្រឹម ៣៦ ០០០ ដោយភាគច្រើនបិទទ្វារនៅតាមទីជនបទ។
សិប្បករអាយុខ្ទង់ ៥០ អូលីវើ រស់នៅក្នុងឃុំ Villequiers បាននិយាយថា៖ «មនុស្សម្នានាំគ្នាជក់ចិត្ដនឹងទូរទស្សន៍ ថេប្ល៊ិត និងទូរស័ព្ទដៃ។ លែងមានការប្រាស្រ័យទាក់ទងគ្នាតទល់ដូចមុនទៀត ហើយក៏មិនសូវសម្បូរទីកន្លែងជជែកគ្នាដែរ»។
ទំព័រហ្វេសប៊ុករបស់លោកអនុញ្ញាតឲ្យអតិថិជនដឹងអំពីទីកន្លែងលោក សំចតបារ៍រថយន្ត ដើម្បីប្រោសឲ្យវប្បធម៌កាហ្វេបារាំង និងការសន្ទនាសហគមន៍រស់ឡើងវិញ៕ HR
