.jpg)
យុវតី ផេង ឆដា សប្បាយចិត្តនឹងស្លៀកឈុតប្រពៃណីសម័យលង្វែក។ យូសុះ អាប់ឌុលរ៉ាស់ហ៊ីម
ភ្នំពេញ: ទិដ្ឋភាពខាងមុខជាហាងកាហ្វេ ដែលមានតែរទេះតូចមួយដ៏សាមញ្ញ តែក្រឡេកមើលទៅក្រោយ រួចឈានជើងចូលក្នុងបន្ដិច អ្នកនឹងឃើញមនុស្សម្នាកំពុងមមាញឹកចងក្បិន ពាក់ឆៀងបែបប្រពៃណី ហាក់ដូចជាក្រុមរបាំត្រៀមឡើងសម្ដែងដូច្នោះដែរ។
ហាងកាហ្វេវប្បធម៌ ដូចតាមឈ្មោះ ជាទីកន្លែងបង្ហាញពីទម្រង់សម្លៀកបំពាក់សម័យបុរាណ ដែលប្រជាជនខ្មែរគ្រងជាប្រចាំតាំងពីសតវត្សរ៍ទី ១៦ និង ១៧ ដល់កូនខ្មែរជំនាន់ថ្មីនេះឲ្យបានស្គាល់ និងទទួលបទពិសោធពីការស្លៀកពាក់ ព្រមទាំងថតរូបបង្ហោះផ្សព្វផ្សាយលើបណ្ដាញសង្គម។ សម្លៀកបំពាក់សម័យលង្វែក និងឧដុង្គ ដែលមានរាជធានីក្រុងលង្វែក និងឧដុង្គមានជ័យ ស្ថិតក្នុងខេត្ដកំពង់ស្ពឺ ចម្ងាយប្រមាណជាង ៤០ គីឡូម៉ែត្រពីរាជធានីភ្នំពេញបច្ចុប្បន្ន។
ជាមួយការបើកសម្ពោធ ១០ ខែមុន អ្នកស្រី ស្រាន់ វ៉ាន់ណេត ជាអ្នកគ្រប់គ្រង និងប្អូនស្រីអាចារ្យធំ ម្ចាស់ហាងកាហ្វេវប្បធម៌ បាននិយាយប្រាប់ថា៖ «នៅទីនេះ យើងមានលក់កាហ្វេ និងភេសជ្ជៈដទៃទៀត ជាពិសេសការស្លៀកពាក់បែបបុរាណ សម្រាប់បងប្អូនមានចំណាប់អារម្មណ៍សម្លៀកបំពាក់សម័យកាលលង្វែក ឧដុង្គ ប្រមាណ ៣០ ឈុត និងឈុតអប្សរាមួយ ព្រមទាំងសម្ភារតាំងបង្ហាញបែបបុរាណផ្សេងៗទៀត»។
សិស្សនិស្សិតត្រូវបង់មូលនិធិតែ ៥ ពាន់រៀល។ យូសុះ អាប់ឌុលរ៉ាស់ហ៊ីម
ដោយមើលឃើញការគាំទ្រពិសេសពីសិស្សនិស្សិត អ្នកគ្រប់គ្រងរូបនេះបន្ដថា៖ «តាមខ្ញុំស៊ើបសួរមតិយុវវ័យ ពួកគាត់ក៏ចង់ស្លៀកពាក់បែបបុរាណនេះពីមុនៗមកដែរ ប៉ុន្ដែពេលខ្លះ គាត់អត់ដឹងទៅរកនៅឯណា។ ដល់ពេល ពួកគាត់ឃើញយើងបង្ហោះក្នុងវេបសាយ គាត់ក៏មានការចាប់អារម្មណ៍»។
កំពុងតែគ្រងឈុតសម័យលង្វែក យុវតី ផេង ឆដា រៀនថ្នាក់ទី ១១ បានប្រាប់ថា៖ «ខ្ញុំចូលចិត្ដឈុតបែបបុរាណ ពីព្រោះខ្ញុំមិនចង់បាត់បង់សម្លៀកបំពាក់ដូនតាយើង។ ខ្ញុំចង់ឲ្យអ្នកក្រោយៗដឹងថា សម្លៀកបំពាក់ខ្មែរមានរចនាប័ទ្មរបៀបម៉េច។ ខ្ញុំសប្បាយចិត្ដ និងរំភើប ព្រោះអីខ្ញុំចង់ស្លៀកពាក់បែបនេះយូរហើយ»។
ឆ្លើយតបនឹងយុវវ័យមួយចំនួន ដែលបានហៅសម្លៀកបំពាក់បុរាណខ្មែរជាឈុត «ការកេត» ជាឈ្មោះតួសម្ដែងល្ខោនភាគថៃ អ្នកស្រី វ៉ាន់ណេត បានពន្យល់ថា៖ «ខ្ញុំនិយាយថា វាមិនមែនទេ។ កុំនិយាយអ៊ីចឹង វាមិនមែនជារបស់ថៃទេ។ វាជារបស់ខ្មែរ។ ថៃគេផ្សព្វផ្សាយជារឿងរបស់គេ តែសម្លៀកបំពាក់ដែលយើងកំពុងតែគ្រងនេះគឺសម្លៀកបំពាក់សម័យកាលលង្វែក»។
ទិដ្ឋភាពខាងក្រៅហាងកាហ្វេវប្បធម៌។ យូសុះ អាប់ឌុលរ៉ាស់ហ៊ីម
អ្នកស្រីទទូចថា៖ «ខ្ញុំតែងសំណូមពរថា ចង់ឲ្យប្រជាជនខ្មែរយើងស្គាល់ខ្មែរឲ្យច្បាស់ នូវអ្វីដែលជារបស់ខ្មែរយើង។ កុំប្រៀបធៀបថា យើងដូចនេះដូចនោះ។ តាមការពិតវាជារបស់យើងទេ តែយើងអត់ទាន់ស្គាល់ខ្លួនឯង»។
ចំពោះការស្លៀកសម្លៀកបំពាក់សម័យបុរាណ សមាជិកហាងកាហ្វេវប្បធម៌ជួយស្លៀកពាក់ និងថតរូបអនុស្សាវរីយ៍ពីកាមេរ៉ាឌីជីថលជូនភ្ញៀវ។ ភ្ញៀវ ទូទៅ ត្រូវចំណាយថ្លៃមូលនិធិ ៥ ពាន់រៀលម្នាក់ និង ២ ម៉ឺនរៀលសម្រាប់ការគ្រងឈុតបុរាណ រួមទាំងការថតរូប។ សម្រាប់សិស្ស និស្សិត ពួកគេគ្រាន់តែជួយផ្ដល់ប្រាក់មូលនិធិ ៥ ពាន់រៀល ដើម្បីជួយលើសកម្មភាពមនុស្សធម៌ និងការអភិវឌ្ឍហាងកាហ្វេវប្បធម៌។
កាហ្វេវប្បធម៌ ស្ថិតនៅផ្ទះលេខ ២២២៨ សង្កាត់គីឡូម៉ែត្រលេខ ៦ ខណ្ឌឫស្សីកែវ ឬទាក់ទងតាមទូរស័ព្ទលេខ ០៦៩ ៨៣៨ ៩៨៩៕
