The Phnom Penh Post Search

Search form




Logo of Phnom Penh Post newspaper Phnom Penh Post - កិច្ចការ​ជួសជុល​ថែទាំ​ចម្លាក់​អប្សរា ១២០០ រូប រួម​ចំណែក​ធំ​ពី​ប្ដីប្រពន្ធ​អាល្លឺម៉ង់ ចំនួន ២ ទសវត្សរ៍

កិច្ចការ​ជួសជុល​ថែទាំ​ចម្លាក់​អប្សរា ១២០០ រូប រួម​ចំណែក​ធំ​ពី​ប្ដីប្រពន្ធ​អាល្លឺម៉ង់ ចំនួន ២ ទសវត្សរ៍

Content image - Phnom Penh Post
លោក ហានស៍ ឡីសេន ជា​ភូគព្ភវិទូ និង​ភរិយា​លោកស្រី​បណ្ឌិត អេស្ទឺ វន់ ភ្លីហវី ឡីសេន​។ គាំ ច័ន្ទរស្មី

កិច្ចការ​ជួសជុល​ថែទាំ​ចម្លាក់​អប្សរា ១២០០ រូប រួម​ចំណែក​ធំ​ពី​ប្ដីប្រពន្ធ​អាល្លឺម៉ង់ ចំនួន ២ ទសវត្សរ៍

សៀមរាប: ក្នុង​រយៈពេល ២០ ឆ្នាំ​មក​នេះ យ៉ាង​ហោច​ណាស់ រូប​ចម្លាក់​អប្សរា​ចំនួន ១២០០ ក្នុង​ចំណោម​ជិត ២០០០ រូប នៅ​ប្រាសាទ​អង្គរវត្ត ត្រូវ បាន​សង្គ្រោះ ខណៈ​ចម្លាក់​អប្សរា​ជាង ៣០០ ទៀត ត្រូវ​បាន​កំណត់​ថា ស្ថិត​ក្នុង​ដំណាក់កាល​សង្គ្រោះ​បន្ទាន់។

កិច្ចការ​ជួលជុល​ចម្លាក់​អប្សរា ការ​បណ្តុះ​បណ្តាល​ធនធាន​មនុស្ស​រាប់រយ​នាក់ និង​ការ​អភិរក្ស​នៅ​តាម​បណ្តា​ប្រាសាទ​នានា​ដូចជា បាគង ព្រះគោ ព្រះខ័ន ស្រះដំរី កោះ​កេរ និង​ក្រុម​ប្រាសាទ​សំបូរ​ព្រៃគុក ជា​ដើម នាំ​ឲ្យ​គម្រោង​អភិរក្ស​ទេព​អប្សរា​អាល្លឺម៉ង់ (GACP) ដែល​ជា​គម្រោង​ដ៏លេច​ធ្លោ​មួយ​នៅ​តំបន់​អភិរក្ស​អង្គរ ត្រូវ​បាន​ចុះ​អនុស្សណៈ​យោគ​យល់​គ្នា​កាល​ពី​ថ្ងៃ​ទី ១៥ ខែ​ធ្នូ កន្លង​មក​នេះ ដើម្បី​ត្រៀម​ផ្ទេរ​កិច្ច​ប្រតិបតិ្តការ​ទាំងមូល​ទៅ​ឲ្យ អាជ្ញាធរ​អប្សរា​គ្រប់គ្រង​បន្ត ក្លាយជា​របត់​ថ្មី​របស់​គម្រោង​មួយ​នេះ។

ប្រធាន​គ្រប់គ្រង​គម្រោង លោក​បណ្ឌិត​សាស្ត្រ​ចារ្យ ហានស៍ ឡីសេន (Hans Leisen) ជា​ភូគព្ភវិទូ បាន​ថ្លែង​ប្រាប់​ភ្នំពេញ​ប៉ុស្តិ៍ ឲ្យ​ដឹង​ក្នុង​ដំណើរ​ទស្សនកិច្ច​ទៅ​មើល​ការ​ជួសជុល​ថែទាំ​ប្រាសាទ​អង្គរវត្ត​ថា៖ «យើង​បាន​ចាប់ផ្តើម​គម្រោង​នេះ​ជាមួយ​នឹង​មនុស្ស​តែ ៣ នាក់​ប៉ុណ្ណោះ ហើយ​ពួកគេ​សុទ្ធ​តែ​មាន​ជំនាញ​នេះ​ខ្លះៗ​ពី​មុន​រួច​មក​ហើយ​ដែរ។ លើស​ពី​នេះ​យើង​បាន​បំពាក់​បំប៉ន​ពួកគាត់​បន្ថែម​អំពី​បច្ចេកទេស​ថែទាំ​របស់​យើង ហើយ​វា​គឺជា​វិធីសាស្ត្រ​របស់​យើង ក្នុង​ការ​ធ្វើ​ឲ្យ​ប្រាកដ​ថា​យើង​អាច​ផ្ទេរ​ចំណេះ​ដឹង​របស់​យើង​បាន​ល្អ​បំផុត សំដៅ​ក្នុង​ការ​រក្សា​បាន​គុណភាព​អភិរក្ស​របស់​យើង​ឲ្យ​ខាង​តែ​បាន»។

Content image - Phnom Penh Post
លោក ហានស៍ បង្ហាញ​ពី​កិច្ចការ​ជួសជុល​ថែទាំ​ប្រាសាទ​អង្គរវត្ត​។ គាំ ច័ន្ទរស្មី

ចក្ខុវិស័យ​មួយ​របស់ GACP គឺ​ធ្វើ​យ៉ាង​ណា​ឲ្យ​ប្រជាជន​កម្ពុជា​ធ្វើការ​ដោយ​ផ្ទាល់​ខ្លួនឯង​ក្នុង​ជំនាញ​បែប​វិទ្យាសាស្ត្រ​ថែទាំ​អភិរក្ស​ប្រាសាទ​បុរាណ ហើយ​បច្ចុប្បន្ន GACP មាន​សមាជិក ១៧ នាក់​កំពុង​ធ្វើការ​នៅ​ការដ្ឋាន​អង្គរ ដែល​ពួកគេ​មួយ​ចំនួន​ជា​កសិករ និង​ត្រូវបាន​ណែនាំ​ឲ្យ​មក​ចូលរួម​ក្នុង​ក្រុម​ការងារ​ដោយ​ផ្តើម​ពី​ចំណូលចិត្ត និង​ក្តី​ស្រឡាញ់​បេតិកភណ្ឌ​មិន​អាច​កាត់​ថ្លៃ​បាន​របស់​ខ្លួន។ បន្ទាប់​ពី​ទទួល​បាន​ការ​បំពាក់​បំប៉ន​ហ្មត់ចត់ ពួកគេ​អាច​បន្ត​ការងារ​នេះ​ដោយ​ខ្លួនឯង​បើ​ទោះបី​ជា​មិន​មាន​អ្នកជំនាញ​ការបរទេស​នៅ​ជាមួយ។

លោក ហូ សុភ័ស អាយុ ៥២ ឆ្នាំ ជំនួយការ​អ្នកគ្រប់គ្រង​ការដ្ឋាន​នៃ​ក្រុម​ការងារ​អភិរក្ស​ខ្មែរ-អាល្លឺម៉ង់ និង​ជាអ្នក​ចាប់ផ្តើម​ជាមួយ​ក្រុម​ការងារ​តាំង​ពី​ថ្ងៃ​ដំបូង លើក​ឡើង​ថា៖ «ថ្វី​ដ្បិត​ខ្ញុំ​ពុំមាន​សញ្ញាបត្រ​ពី​សាកល​វិទ្យាល័យ​ណាមួយ ប៉ុន្តែ​ខ្ញុំ​ជឿជាក់​ថា អ្វី​ដែល​ខ្ញុំ​បាន​ខិតខំ​ប្រឹង​ប្រែង​កន្លង​មក​ជាមួយ​នឹង​គម្រោង​នេះ នឹង​អាច​ឲ្យ​ខ្ញុំ​នៅ​បន្ត​ការងារ និង​ផ្ទេរ​ចំណេះ​ដឹង​ខ្ញុំ​ទៅ​ឲ្យ​អ្នក​ជំនាន់​ក្រោយ​បាន ដោយសារ​តែ​យើង​នៅ​មាន​ការងារ​ជាច្រើន​ទៀត​ត្រូវធ្វើ ដើម្បី​ធានា​ឲ្យ​ប្រាសាទ​យើង​នៅ​រឹងមាំ​ជា​សក្ខីកម្ម​ប្រវត្តិសាស្ត្រ​ដល់​កូនចៅ​ជំនាន់​ក្រោយ»។

ប្រាសាទ​អង្គរវត្ត​ត្រូវបាន​ចុះបញ្ជី​បេតិកភណ្ឌ​ពិភពលោក ឆ្នាំ ១៩៩២ ហើយ​ភាព​ល្បី​សុស​សាយ​នៃ​សំណង់​អច្ឆរិយ​នេះ​បាន​នាំ​លោក ហានស៍ មក​ដល់​កម្ពុជា អំឡុង​ឆ្នាំ ១៩៩៥។ លោក​បាន​បាក់ចិត្ត​ស្រឡាញ់​ការ​រចនា​ដ៏​ផ្ចិតផ្ចង់​លើ​ជញ្ជាំង​ប្រាសាទ ហើយ​រឹត​តែ​មាន​អារម្មណ៍​ខ្លោចផ្សា​នៅ​ពេល​សម្លឹង​ឃើញ​ចម្លាក់​អប្សរា​ទាំង​នោះ​បាន​រង​របួស​តាម​កាល​វេលា ដែល​ទាមទារ​រូបមន្ត​វិទ្យាសាស្ត្រ​ដ៏​សុក្រឹត ដើម្បី​ព្យាបាល​បន្ត​អាយុ​ចម្លាក់​ស្រី​សួគ៌ា​ឲ្យ​គង់​វង្ស​យូរអង្វែង។

Content image - Phnom Penh Post
សមាជិក​ក្រុម​ការងារ​ខ្លះ​ជា​កសិករ​មាន​ចំណូល​ចិត្ត និង​ក្ដី​ស្រឡាញ់​បេតិកភណ្ឌ។ គាំ ច័ន្ទរស្មី

លោក​សាស្ត្រាចារ្យ​បញ្ជាក់​ថា៖ «វា​គឺ​ដូចជា​វេជ្ជបណ្ឌិត ដែល​ត្រូវ​ព្យាបាល​អ្នកជំងឺ​អ៊ីចឹង​ដែរ ដំបូង​យើង​ត្រូវ​កំណត់​ឲ្យ​បាន​ថា​តើ​អ្នក​ជំងឺ​មាន​បញ្ហា​អ្វី? ហើយ​យើង​នឹង​ផ្តល់​ការ​ព្យាបាល​ដោយ​ប្រយ័ត្ន​ប្រយែង​បំផុត»។

លោក ហានស៍ បាន​លើក​ឡើង​ថា ថ្វី​ដ្បិត​គម្រោង​នេះ​គឺ​បាន​ទាក់ទាញ​ការ​ចាប់​អារម្មណ៍​ខ្លាំង​ពី​រដ្ឋាភិបាល​អាល្លឺម៉ង់ ដោយ​បាន​ផ្តល់​ការគាំទ្រ​ផ្នែក​ហិរញ្ញវត្ថុ​ប្រមាណ ៤ លាន​អឺរ៉ូ​ក្នុង​រយៈពេល ២០ ឆ្នាំ​នេះ​ក្តី ក៏​គម្រោង​ពុំមាន​ធនធាន​គ្រប់​គ្រាន់​ក្នុងការ​បំពេញ​ការងារ​ដ៏​សំខាន់​នេះ​ដែរ។

លោក​បាន​បញ្ចុះបញ្ចូល​លោកស្រី​បណ្ឌិត អេស្ទឺ វន់ ភ្លីហវី ឡីសេន ជា​ភរិយា​របស់​លោក​ឲ្យ​ចូលរួម​ដោយ​ពឹង​ផ្អែក​លើ​ថវិកា​បដិភាគ​ពី​សាកល​វិទ្យាល័យ TH Keoln- University of Applied Sciences និង​មូលនិធិ ប្រមូល​បាន​ពី​សាស្ត្រាចារ្យ​សាកល​វិទ្យាល័យ​របស់​លោក ដែល​ត្រូវ​បែង​ចែក​ទៅ​បុគ្គលិក​ខ្មែរ និង​ការ​ចំណាយ​ទូទៅ ដើម្បី​ពង្រឹង​ការ​អនុវត្ត​គម្រោង​ទាំងមូល​ឲ្យ​ទៅ​មុខ​បាន​រលូន។

លោកស្រី​បណ្ឌិត អេស្ទឺ អ្នក​វិទ្យាសាស្ត្រ​អភិរក្ស​បាន​លើក​ឡើង​ថា៖ «GACP បាន​ធ្វើការ​ចែក​រំលែក​ចំណេះដឹង​ដ៏​ជោគជ័យ​របស់​ខ្លួន​រួច​មក​ហើយ​ជាមួយ​នឹង​ក្រុម​ការងារ​អភិរក្ស​មក​ពី​ប្រទេស​មួយ​ចំនួន ហើយ​សង្ឃឹម​អ្នក​អភិរក្ស​មក​ពី​ប្រទេស​ផ្សេង​ទៀត​នឹង​យក​ចំណេះ​ដឹង និង​បទពិសោធ ដែល​ប្រជាជន​ខ្មែរ​នៅ​ទីនេះ​បាន​ប្រឹងប្រែង​ធ្វើ យក​ទៅ​បន្ត​អនុវត្ត​សំដៅ​បាន​ដល់​ជា​ប្រយោជន៍​ពិត​ប្រាកដ​ដល់​បេតិកភណ្ឌ​ផ្ទាល់»៕

អត្ថបទគួរចាប់អារម្មណ៍