ក្រុងអ៊ីស្លាម៉ាបាដ៖ មូហាមេដ អ៊ិក្រាម ដែលកើតមកអត់មានដៃ ចូលក្លិបលេងស្នុកឃ័រ ដោយប្រើចង្កាជាមធ្យោបាយបុកគ្រាប់ឃ្លីពណ៌សបញ្ជូនទៅរុញគ្រាប់ក្រហមឲ្យចូលរន្ធ។
កីឡាបែបនេះហាក់មិនសមនឹងបុរសអាយុ ៣២ ឆ្នាំនោះទេ តែកីឡាករប៉ាគីស្ថានរូបនេះ បានចំណាយពេលជាច្រើនឆ្នាំសំលៀងជំនាញរបស់ខ្លួន រហូតដល់អ្នកខ្លះប្រចាំភូមិអស់លុយពីហោប៉ាវមិនតិចទេ។
លោក អ៊ិក្រាម បានប្រាប់ AFP អំឡុងពេលចូលលេងស្នុកឃ័រក្នុងក្រុងសាមុនទ្រី ខេត្ដពុនចាប ភាគខាងជើងប្រទេសថា៖ «វាជាការងារដ៏លំបាកដែលទាមទារការខិតខំប្រឹងប្រែងខ្លាំង។ បើមានអ្នកលេងដូចរូបខ្ញុំ ខ្ញុំត្រៀមខ្លួនប្រយុទ្ធជាស្រេច»។
កើតក្នុងគ្រួសារក្រីក្រ លោក និងបងប្អូន ៨ នាក់ របស់លោកមិនអាចចូលសាលារៀននោះទេ ហើយលោកចំណាយពេលកុមារភាពរស់នៅយ៉ាងឯកា។ ជាយុវជនម្នាក់ លោកចាប់ផ្ដើមឈរមើលមិត្ដភក្ដិលេងស្នុកឃ័រ និងមានបំណងចង់លួចសាកល្បងលេងស្ងាត់ៗ។
លោក អ៊ិក្រាម និយាយថា៖ «ដំបូង ខ្ញុំធ្លាប់វាយគ្រាប់ឃ្លីស្នុកឃ័រម្នាក់ឯងនៅលើតាបទទេ។ បន្ទាប់មក ខ្ញុំអភិវឌ្ឍខ្លួនបន្ដិចម្ដងៗ រួចក៏ផ្ដើមលេងជាមួយគូប្រកួត»។
លោក អ៊ិក្រាម អាចប្រកួតប្រជែងជាមួយដៃគូខ្លាំងៗប្រចាំក្រុងថែមទៀត។ លោកមានសមត្ថភាពរុញគ្រាប់ឃ្លីបញ្ចូលរន្ធ ដែលទាក់ទាញចំណាប់អារម្មណ៍មហាជនជាច្រើន។
ពេលកីឡាករអត់ដៃ លោក អ៊ិក្រាម វាយមិនចូលរន្ធអ្នកឈរមើលម្នាក់បានបន្លឺសំឡេងឡើងថា៖ «ខាត់ចង្កាមួយសិនទៅ»។
ដោយបារម្ភថា លោកអាចធ្វើឲ្យរបួសខ្លួនឯង ឪពុកម្ដាយរបស់លោក អ៊ិក្រាម តែងតែរារ៉ាំងលោកពីល្បែងស្នុកឃ័ររយៈពេលជាច្រើនឆ្នាំមកហើយ តែកាលពីឆ្នាំមុន ពួកគេព្រមឲ្យបុរសអត់ដៃទាំងគូរូបនេះចូលលេងឡើងវិញ។
ជំនាញស្នុកឃ័ររបស់លោកបានរុញច្រានប្រជាប្រិយភាពលើអនឡាញក្នុងចំណោមជើងខ្លាំងប៉ាគីស្ថានដទៃទៀត។
លោក អ៊ិក្រាម បាននិយាយថា៖ «ខ្ញុំកាន់តែល្បី»។
ល្បែងស្នុកឃ័រត្រូវបាននាំមកកាន់ប៉ាគីស្ថានដោយមន្ដ្រីចក្រភពអង់គ្លេស នាសម័យអាណានិគមនិយមលើឧបទ្វីបឥណ្ឌា ហើយស្ថាបនិកជនជាតិប៉ាគីស្ថាន លោក មូហាមេដ អាលី ជីនណា ក៏ជាអ្នកលេងស្នុកឃ័រពូកែម្នាក់ផងដែរ។
ប៉ាគីស្ថានមិនបានធ្វើបច្ចុប្បន្នភាពស្ថិតិលើអ្នកមានពិការភាពនោះទេ តែអង្គការក្រៅរដ្ឋាភិបាលប៉ាន់ប្រមាណថា មានចំនួនជាង ៣០ លាននាក់លើប្រជាជនសរុប ២២០ លាននាក់៕ AFP/HR