ភ្នំពេញ៖ ដោយមានបរិវេណនៃទីលានធំជាង និងហ្គោលស្រដៀងនឹងបាល់ទាត់ ដែលមានសំណាញ់ខុសពីប្រភេទកីឡាបាល់ឱប មានតែបង្គោល ២ ខ្ពស់ បាល់លេងបែបសេរីហ្គែលីក ឬក៏ Gaelic Football ជាកីឡាច្របាច់បញ្ចូលគ្នារវាងបាល់ទាត់ និងបាល់ឱប ដែលអាចប្រើបានទាំងដៃ និងជើងរួមគ្នា។
ស្រដៀងនឹងទីលាន Gaelic Football ហើយឧបករណ៍លេងប្រហាក់ប្រហែលនឹងកីឡាហុកគី កីឡាប្រពៃណីអៀរឡង់ ១ ប្រភេទទៀត គឺ Hurling ដែលកីឡាករទាំងសងខាងប្រើទំពក់ឈើវាយបាល់មូលតូច។
Gaelic Football និង Hurling ត្រូវបាននាំយកមកកម្ពុជាដោយក្លិប Cairde Khmer GAA Club - Cambodia ក្នុងឆ្នាំ ២០១៧ ដោយជនជាតិអៀរឡង់ ៣ នាក់ រួមទាំងលោក ផេតដ្រេក ខែមប៊ែល (Padraig Campbell) និងមានសមាជិកចម្រុះជាតិសាសន៍។
លោក រ៉ូណាន់ ស្ហ៊ីហាន់ ជាប្រធានក្លិបពេលបច្ចុប្បន្នប្រាប់ ភ្នំពេញ ប៉ុស្ដិ៍ថា៖ «សមាជិកដែលបានចូលរួមក្លិបមិនទាមទារអ្វីច្រើនទេ។ សំណូមពររបស់យើង គឺសូមឱ្យតែពួកគាត់រីករាយ។ គ្រប់គ្នាមិនចាំបាច់មានការព្រួយបារម្ភពីសមត្ថភាពខ្លួនឯងទេ ពួកយើងមានគ្រប់កម្រិត»។
លោកបានបន្ដថា៖ «គ្រប់គ្នាសុទ្ធតែអាចចូលរួមបានដោយរាល់ការហាត់សមតម្រូវឱ្យបង់តែម្នាក់ ៣ ដុល្លារ។ សម្រាប់កីឡាករខ្មែរគឺ លេងដោយឥតគិតថ្លៃ ហើយយើងទទួលខុសត្រូវលើថ្លៃធ្វើដំណើរ និងការស្នាក់នៅរបស់ពួកគេនៅពេលយើងលេងក្រៅប្រទេស ឬធ្វើដំណើរក្នុងប្រទេស»។
បើទោះបីជាកីឡាប្រពៃណីអៀរឡង់ Gaelic Football ទាមទារកាយសម្បទារឹងមាំ ការហ្វឹកហាត់ និងភាពប៉ិនប្រសប់នៅលើទីលានយ៉ាងណាក៏ដោយ ក៏វាផ្ដោតចម្បងលើសាមគ្គីភាពមិត្ដភាព និងជួយយកអាសាគ្នា។
លោក រ៉ូណាន់ បន្ដថា ចំណុចសំខាន់នៃកីឡា Gaelic Football ជាកន្លែងបង្កើតមិត្តភាពជាកន្លែងជួយគ្នាទៅវិញទៅមក និងចំណាយពេលជាមួយគ្នា បន្ទាប់ពីបញ្ចប់ការប្រកួតក៏ដូចជាអ្នកដែលមិនមែនជាកីឡាករ ដែលអាចបង្កើតទំនាក់ទំនងតាមរយៈការជួយគាំទ្រគ្នា។
«Cairde Khmer» ជាពាក្យបញ្ចូលគ្នារវាងភាសាអៀរឡង់ និងខ្មែរមានន័យថា «មិត្ដសម្លាញ់កម្ពុជា» ដែលទទួលបានការចាប់អារម្មណ៍ពីប្រជាជនកម្ពុជាពិសេសស្ដ្រីខ្មែរ។
ឈិត កានីកា ជាកីឡាការិនីម្នាក់ធ្លាប់បានប្រាប់ ភ្នំពេញ ប៉ុស្ដិ៍ ក្រោយក្លិបបង្កើតបាន ១ ឆ្នាំថា កញ្ញាដឹងការបង្កើតក្លិបតាមរយៈមិត្ដភក្ដិម្នាក់ ដែលពេលនោះ ខ្លួនមិនដឹងថា អ្វីទៅជា Gaelic Football។
កញ្ញានិយាយថា៖ «វាពិតជាអស្ចារ្យណាស់ ដោយសារតែយើងត្រូវប្រើជំនាញទាំង ២ គឺបាល់ទាត់ និងបាល់ឱបក្នុងកីឡានេះតែ។ ពេលហាត់ដំបូង ខ្ញុំហាក់មានអារម្មណ៍ប្លែក និងងាយស្រួលលេង»។
ជាសហគមន៍ដែលបោះបានទីតាំងហ្វឹកហាត់នៅរាជធានីភ្នំពេញ និងមូលដ្ឋាននៅសៀមរាប ក្លិបមិត្ដសម្លាញ់កម្ពុជា ដែលបានសាងកេរ្ដិ៍ឈ្មោះដ៏ល្អនៅលើឆាកអន្ដរជាតិតាំងពីចាប់កំណើតភ្លាមៗបានបង្កើតកម្មវិធីមនុស្សធម៌ជាហូរហែក្នុងការចូលរួមជួយសង្គម។
លោក រ៉ូណាន់ វ័យ ៣៤ ឆ្នាំ ឱ្យដឹងថា៖ «យើងបានបរិច្ចាគឈាមជាមួយអង្គការសប្បុរសធម៌ Voice ចូលរួមជួយសម្អាតសំរាមតាមសហគមន៍ជាមួយ Gogreen Cambodia និងផ្តល់សិក្ខាសាលាសម្រាប់សាលារៀន អង្គការសង្គ្រោះកុមារក្រីក្រនៅអាស៊ី (SCAO) អង្គការ SCOOP ជាដៃគូយើង។ មិនត្រឹមតែជាកីឡាក្លិបបង្ហាញពីរបៀបរស់នៅបង្រៀនទាំងការផ្ដល់ឱ្យ និងការទទួល»។
ដោយសារតែវិបត្ដិកូវីដក្នុងប្រទេសសកម្មភាពផ្សេងៗត្រូវបានផ្អាកសមាជិកចម្រុះជាតិសាសន៍ រួមមានខ្មែរអៀរឡង់ អង់គ្លេស កូឡុំប៊ី ប៉ូឡូញ អាមេរិក កាណាដា និងអូស្ត្រាលី នៅតែអាចរក្សាទំនាក់ទំនង និងបន្ដការហ្វឹកហាត់នៅតាមផ្ទះ។
ប្រធានក្លិបរូបនេះ និយាយថា៖ «យើងនឹងធ្វើដំណើរប្រកួតជាអន្តរជាតិពេលដំណើរការបើកឡើងវិញ។ យើងនឹងព្យាយាមហាត់ឱ្យបានកាន់តែល្អ ហើយសង្ឃឹមថា យើងអាចនាំពានរង្វាន់មកកម្ពុជាវិញ»។
លោកនៅបន្ដលើកទឹកចិត្ដឱ្យមានអ្នកចូលរួមហ្វឹកហាត់កីឡាទាំង ២ នេះឱ្យបានច្រើន ដោយកុំបារម្ភពីជាតិសាសន៍ ទំហំមាឌ និងសមត្ថភាព។
លោកអះអាងថា៖ «អ្នកនឹងបង្កើតមិត្តភាព និងការចងចាំដ៏ល្អ។ វាប្រៀបដូចជាការនាំឱ្យយើងស្គាល់មនុស្សថ្មី វប្បធម៌ និងអរិយធម៌ថ្មី»។
សម្រាប់ពត៌មានលម្អិត សុំចូលទៅកាន់ទំព័រហេ្វសប៊ុក @CairdeKhmer៕