.jpg)
រឿង «ទារុណកម្មខ្មោច» សម្ពោធជាផ្លូវការថ្ងៃទី ២៥ កុម្ភៈ ម្សិលមិញ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ចាងហ្វាងផលិតកម្មមាតុចក្រហ្វីម និងជាផលិតករដែលទទួលបានភាពល្បីនៃការផលិតកុនរឿង «វិកលចរិត» និងរឿង «ធ្មប់» លោក ហ៊ុយ យ៉ាឡេង មាននូវក្តីរំពឹងខ្ពស់ទទួលបានការគាំទ្រពីទស្សនិកជនខ្មែរទៅនឹងវណ្ណកម្មថ្មីគឺរឿង «ទារុណកម្មខ្មោច» ខណៈរឿងនេះត្រៀមចាក់បញ្ចាំងជាផ្លូវការនាថ្ងៃទី ២៨ ខែកុម្ភៈ ឆ្នាំ ២០១៩ ខាងមុខនេះ។
លោក ហ៊ុយ យ៉ាឡេង ប្រាប់ភ្នំពេញប៉ុស្តិ៍ថា៖ «រឿងនេះគឺពិបាកថតណាស់ តាំងពីដើមដល់ចប់ ជាពិសេសគឺខ្ញុំដែលត្រូវដើរតួត្រូវគេធ្វើទារុណកម្ម និងត្រូវលះបង់ខ្លួនពិតៗ។ ទី ១ ខ្ញុំត្រូវអត់បាយ សម្រកគីឡូជាង ១ ខែហូបតែបបរឲ្យស្គមដូចអ្វីដែលគេធ្វើទារុណកម្មមែនទែន និងទី ២ គឺការធ្វើទារុណកម្មរបស់ខ្មែរក្រហមដោយគេថតរូប ហើយគេចាក់ដោតលើសាច់គឺខ្ញុំត្រូវបានគេដោតមែនទែននៅលើត្រចៀករបស់ខ្ញុំ។ ទី ៣ គឺការចងព្យួរជ្រមុជទឹកគឺខ្ញុំធ្វើមែន!»។
ភាពយន្តមួយនេះត្រូវបានចំណាយពេលវេលាសរសេរប្រមាណជិត ៣ ខែដោយមិនចម្លងពីអ្នកដទៃ និងបានផ្សារភ្ជាប់នូវសារបែបអប់រំ និងបានបង្ហាញអំពីអត្តសញ្ញាណរបស់ខ្មែរដោយការឆ្លុះបញ្ចាំងនូវសម័យកាល ២ រួមគ្នាគឺរបបខ្មែរក្រហម និងសម័យបច្ចុប្បន្នក្នុងគោលបំណងឲ្យយុវវ័យខ្មែរបានស្គាល់ពីប្រវត្តិសាស្ត្ររបស់ខ្លួនឯង។
លោក ហ៊ុយ យ៉ាឡេង បន្តឲ្យដឹងពីការចំណាយផងដែរថា៖ «រឿងទារុណកម្មខ្មោចបានចំណាយទុនប្រមាណ ៧ ម៉ឺនដុល្លារច្រើនជាងរឿង «ធ្មប់» ដែលទទួលបានជោគជ័យនោះ ខណៈការចំណាយត្រឹមតែ ៥ ម៉ឺនដុល្លារ។ រឿងនេះគឺមានលក្ខណៈប្លែកពីរឿងដទៃដោយសារទាក់ទងនឹងរបបខ្មែរក្រហម ហើយជារឿងខ្មោចបែបរន្ធត់គឺថាមានឈុតឆាកបែប កម្សត់ សប្បាយ និងភ័យខ្លាចព្រឺសម្បុរទៀតផង»។
ជាមួយគ្នានេះលោក ទិត្យ ថារិទ្ធ ជាអនុរដ្ឋលេខាធិការនៃក្រសួងវប្បធម៌ និងវិចិត្រសិល្បៈក៏ទទូចឲ្យយុវជនខ្មែរងាកមកគាំទ្រជ្រោមជ្រែង ដើម្បីលើកស្ទួយវិស័យសិល្បៈខ្មែរផងដែរ ជាពិសេសនោះគឺខ្សែភាពយន្ត ព្រោះថាភាពយន្តខ្មែរអាចរីកចម្រើនបានគឺអាស្រ័យទៅលើការគាំទ្ររបស់ប្រជាជនទាំងអស់គ្នា ហើយនេះក៏ជាការលើកទឹកចិត្តដល់អ្នកផលិតកុនក្នុងស្រុកទាំងអស់ឲ្យពួកគាត់អាចបន្តការងាររបស់ខ្លួនតទៅមុខទៀតបើទោះបីជាភាពយន្តខ្មែរយើងហាក់នៅមានកម្រិតក៏ដោយ។
គួរបញ្ជាក់ដែរថាភាពយន្តរឿង «ទារុណកម្មខ្មោច» បានបើកសម្ពោធនៅថ្ងៃទី ២៥ ខែកុម្ភៈ និងគ្រោងលក់សំបុត្រជាផ្លូវការនៅថ្ងៃទី ២៨ កុម្ភ:ខាងមុខនេះ។
ខណៈកាលពីថ្ងៃទី ២២ ខែកុម្ភ: ឆ្នាំ ២០១៩ ក្នុងពិធីចាក់បញ្ចាំងរឿង «ទារុណកម្មខ្មោច» ក្រោមអធិបតីភាពចូលរួមពីមន្ត្រីជាន់ខ្ពស់នៃរាជរដ្ឋាភិបាល អង្គទូត និងឥស្សរជនមួយចំនួនបានទស្សនានាមុនកាលកំណត់ផងដែរ៕
