.jpg)
អង្គការបណ្តុះបណ្តាលថ្នាក់មូលដ្ឋាន(OBT) ដែលស្ថិតនៅឃុំជីរោទ៍ទី១ ស្រុក និងខេត្តត្បូងឃ្មុំ។ រូបថត សហការី
ខេត្តត្បូងឃ្មុំ៖ បច្ចុប្បន្ននេះមានសិស្សានុសិស្សក្រីក្រ និងខ្វះឱកាសបានការអប់រំសរុបប្រមាណ ៣០០ នាក់ មកពីភូមិចំនួន ៩ ក្នុងឃុំជីរោទ៍ទី១ ស្រុក និងខេត្តត្បូងឃ្មុំ កំពុងតែទទួលបានការបណ្តុះបណ្តាលបំណិនជីវិតឥតគិតថ្លៃពីអង្គការបណ្តុះបណ្តាលថ្នាក់មូលដ្ឋាន (OBT) ហើយក៏មានអ្នកចេញធ្វើការងារចិញ្ចឹមជីវិតខ្លួនចំនួន ៤៦ នាក់ផងដែរ ក្រោយពីបានបង្កើតតាំងពីឆ្នាំ ២០០៩ មក។
លោក ប៉ត សុផល វ័យ ៤៦ ឆ្នាំ ជាស្ថាបនិកអង្គការបណ្តុះបណ្តាលថ្នាក់មូលដ្ឋាន ដែលបានបង្កើតតាំងពីឆ្នាំ ២០០៩ មកនៅក្នុងភូមិជីរោទ៍ក្រោម ២ ឃុំជីរោទ៍ទី១ ស្រុក និងខេត្តត្បូងឃ្មុំ នៅលើផ្ទៃដីជាង ១ ហិកតា។ ខណៈគោលបំណងដ៏សំខាន់ផ្តល់ការអប់រំ ចំណេះដឹងបំណិនជីវិត និងផ្សព្វផ្សាយការយល់ដឹងពីបរិស្ថានទៅដល់សិស្សតាំងពីកម្រិតថ្នាក់បឋមសិក្សាដល់ថ្នាក់វិទ្យាល័យសម្រាប់សិស្សក្រីក្រ ទៅតាមគម្រោងផ្សេងៗ ខណៈអង្គការនេះ ទើបតែត្រូវមជ្ឈដ្ឋានប្រជាពលរដ្ឋខ្មែរមានទំនុកចិត្ត និងទទួលស្គាល់នៅឆ្នាំ ២០១៤។ បច្ចុប្បន្ន អង្គការ OBT ក៏មានកម្មវិធីសិក្សាជាគោលផ្ទាល់ខ្លួន ដើម្បីបង្រៀនសិស្សនូវជំនាញនានាដូចជាភាសាអង់គ្លេស ភាសាខ្មែរ ចំណេះបំណិនជីវិត និងបន្ថែមកម្មវិធីថ្មីមួយទៀតថ្នាក់ត្រៀមសាលាជំនាញ ដែលមានដៃគូសហការច្រើននៅខេត្តសៀមរាប។
សិស្សានុសិស្សក្រីក្រ ពេលមករៀនភាសាអង់គ្លេសនៅអង្គការ OBT។ រូបថត សហការី
ស្ថាបនិកអង្គការលោក ប៉ត សុផល ឲ្យដឹងថា៖ «កម្មវិធីនេះ ជួយសិស្សពីវ័យ ១៧ ឆ្នាំ ដល់ ២៤ ឆ្នាំ មានឱកាសទទួលការបណ្តុះបណ្តាលបន្ថែមសម្រាប់អាជីព ដែលយើងមានដៃគូចំនួន ៥ សហការគ្នានៅខេត្តសៀមរាប។ ដោយឡែកចាប់តាំងពីឆ្នាំ ២០០៩ មកដល់ឆ្នាំ ២០២០ នេះ មានសិស្សចេះជំនាញបំណិនជីវិតនៅអង្គការ OBT និងមានការងារធ្វើតាមក្រុមហ៊ុន ឬទីកន្លែងនានា មានចំនួន ៤៦ នាក់ហើយ»។
លោកបន្តថា៖ «ចំពោះកម្មវិធីអប់រំនៅអង្គការយើងប្រចាំថ្ងៃនោះ គឺមានបង្រៀនភាសាអង់គ្លេសចំនួន ២ ថ្ងៃ សិល្បៈភាសាខ្មែរចំនួន ២ ថ្ងៃ និងរៀនពីបំណិនជីវិត ១ ថ្ងៃ នៅក្នុង ១ សប្តាហ៍ ខណៈឯថ្នាក់ត្រៀមសាលាជំនាញ យើងគ្រោងនឹងបង្រៀននៅថ្ងៃសៅរ៍-អាទិត្យ ដែលនឹងចាប់ផ្តើមនៅក្នុងកម្មវិធីសិក្សាប្រចាំឆ្នាំ ២០២០ តែម្តងដោយមិនគិតថ្លៃពីពួកគេឡើយ។ ទន្ទឹមនឹងការផ្តល់ការអប់រំជំនាញនានាដល់សិស្សនោះ យើងក៏ត្រូវការពីពួកគាត់មកវិញដែរ គឺសុំសំរាមប្លាស្ទិកពីពួកគាត់»។
សិស្សានុសិស្សក្រីក្រ ពេលមករៀនជំនាញកុំព្យូទ័រនៅអង្គការ OBT។ រូបថត សហការី
អង្គការ OBT កំពុងតែបន្តសក្ដានុពលខ្លួន ក្នុងនាមជាអង្គការក្រៅរដ្ឋាភិបាល ដែលមានស្ថាបនិកជាខ្មែរ និងអាចផ្គត់ផ្គង់ខ្លួនឯងចន្លោះ ៧០-៨០ ភាគរយ ដោយគ្រាន់តែទទួលជំនួយក្រៅត្រឹមតែ ២០-៣០ ភាគរយ ដើម្បីចាត់ចែងនៅអង្គការ និងផ្សព្វផ្សាយការយល់ដឹងពីបរិស្ថានដល់សិស្សមានបុគ្គលិកចំនួន ១៤ រូប ខណៈសិក្ខាកាមមកហាត់រៀនធ្វើការងារចំនួន ៤ រូប។
លោក ប៉ត សុផល ពន្យល់លម្អិតថា៖ «រាល់គម្រោងនានារួមមានដូចជាគម្រោងទឹកស្អាត ដំណាំសុវត្ថិភាព ឬសិប្បកម្មជាដើម ដែលជាប្រភពរកប្រាក់ចំណូលសម្រាប់ផ្គត់ផ្គង់និរន្តរភាពអង្គការ។ ខណៈថ្មីៗនេះ យើងក៏មានគម្រោងច្នៃប្រេងម៉ាស៊ូត ចេញពីសំរាមប្លាស្ទិក ដោយមានលោក ឃុន ស៊ីវ ជាអ្នកបង្កើតគម្រោងនេះ។ ហើយយើងក៏គ្រោងពង្រីកឲ្យធំជាងមុន ដើម្បីបង្កើតនូវផលិតផលលក់។ យើងក៏មានសេវាកម្ម-ទេសចរណ៍ដែរគឺជាផ្ទះស្នាក់ និងបាងហ្គាឡូ ដោយយើងមានដៃគូសហការភ្នាក់ងារទេសចរណ៍មួយចំនួន នាំភ្ញៀវបរទេសមកកម្សាន្ត ឬទស្សនាសហគមន៍យើង គឺភាគច្រើនសម្បូរភ្ញៀវជាតិបារាំង អង់គ្លេស និងអាល្លឺម៉ង់ ដោយពួកគាត់មកលេងនាពេលវិស្សមកាល។ យើងក៏មានផ្ទះស្នាក់ចំនួន ៤ ដែលផ្ទះស្នាក់ ១ កន្លែងអាចឲ្យភ្ញៀវមានគ្នាចំនួន ២ នាក់ និងបាងហ្គាឡូចំនួន ៩ ហើយបាងហ្គាឡូខ្នាតតូចអាចស្នាក់បានចំនួន ៤-៥នាក់ ខណៈខ្នាតធំសម្រាប់ភ្ញៀវដែលមានគ្នាច្រើនប្រមាណ ១០ នាក់»៕
ក្រុមកុមារាក្រីក្រ ពេលមកហាត់រៀនសិល្បៈកីឡាល្បុក្កតោនៅអង្គការ OBT។ រូបថត សហការី
