ក្រុងហែលស៊ិនគី៖ ខណៈកុមារសិស្សសាលាហ្វាំងឡង់ភាគច្រើន កំពុងសិក្សានៅតាមផ្ទះក្រោមការរឹតបន្តឹងកូរ៉ូណា សាលារៀននៅតែបន្ដផ្ដល់អាហារឥតគិតថ្លៃដល់សិស្ស ជាការអនុវត្ដដែលធ្លាប់ប្រណិប័តន៍រាប់ទសវត្សរ៍ ជាវប្បធម៌ចាក់ឫសគល់ក្នុងសង្គមហ្វាំងឡង់។
សិស្សប្រមាណ ២០០ នាក់ក្នុង ១ ថ្ងៃ នៅទីក្រុងហែលស៊ិនគី មិនអាចប្ដូរពីការសិក្សានៅផ្ទះមកសាលារៀនវិញ ដើម្បីទទួលបាននូវអាហារក្ដៅៗឥតគិតថ្លៃ។
សាលារៀនត្រូវបានបិទទ្វារចំពោះសិស្សអាយុចាប់ពី ១០ ឆ្នាំឡើង ខណៈច្បាប់បានចែងថា សាលារៀនត្រូវបន្ដទទួលសិស្សតូចៗ ទោះពួកគេត្រូវបានណែនាំឲ្យនៅតែក្នុងផ្ទះយ៉ាងណាក៏ដោយ។
ការរឹតបន្តឹងលើគម្លាតសង្គមនៅហ្វាំងឡង់ បានប៉ះពាល់ទៅលើរបបអាហារនៅតាមសាលារៀន។
អ្នកស្រី ហាន់ណា កៃសា តាល់វេនសាអារី មកពីនាយកដា្ឋនអប់រំក្រុងហែលស៊ិនគី បានប្រាប់ AFP ថា៖ «កុមារត្រូវរក្សាគម្លាតយ៉ាងតិច ១ ម៉ែត្រពីគ្នា ដោយពួកគេត្រូវលាងដៃក្រោមការត្រួតពិនិត្យត្រឹមត្រូវ ហើយកំហិតកុមារត្រឹម ១០ នាក់ មកញ៉ាំបាយម្ដង»។
ក្រោមការប្រកាសអាសន្នរបស់រដ្ឋាភិបាល ដើម្បីព្យាយាមទប់ស្កាត់ការរីករាលដាលវីរុសកូរ៉ូណា អាជ្ញាធរមូលដ្ឋានអាចធ្វើការសម្រេចចិត្ដថា តើសាលារៀននៅតែបន្ដបើកទ្វារផ្ដល់អាហារដល់សិស្សប្រមាណ ៨៥ ម៉ឺននាក់ទូទាំងប្រទេស ឬយ៉ាងណា។
យ៉ាងណាមិញ គ្មានទិន្នន័យច្បាស់លាស់ត្រូវបានប្រមូលថា តើមានសាលារៀនប៉ុន្មានបានចូលរួមនៅទូទាំងប្រទេសនោះទេ តែសមាគមរដ្ឋាភិបាលមូលដ្ឋានបានប្រាប់ AFP ថា ពួកគេមិនបានដឹងថា តំបន់ណាខ្លះមិនជ្រើសយកគោលនយោបាយនេះឡើយ៕ AFP/HR