.jpg)
កុមារី សុខឡា គេងឱបម្ដាយមីងកុមារីវ័យ ៧ ឆ្នាំរូបនេះតែងពោលពីក្ដីប្រាថ្នាការសិក្សា។ ហ្វេសប៊ុក
ក្រុងច្បារមន: វេលាសាច់ឈាមស្បែកដណ្ដប់ឆ្អឹងរបស់អាណាព្យាបាលចុងក្រោយប្រែជាផេះផង់ ក្ដីរំពឹងកុមារីកំព្រាមេបា ក៏ប្រែអស់ក្ដីទីពឹង នៅសល់តែបងប្អូន ៧ នាក់ ជ្រកទ្រនំទីទៃ គ្មានឱកាសផ្ដល់ភាពកក់ក្ដៅឲ្យគ្នាបន្ដិចសោះឡើយ។
កុមារី ធំ សុខឡា អាយុ ៧ ឆ្នាំ បានព្រាត់ពីដើមទ្រូងដ៏សែនកក់ក្ដៅរបស់ម្ដាយតាំងពីអាយុ ៣ ខែ និងឪពុកត្រូវជាប់ខ្នោះឃ្នាងនៅស្រុកថៃ ព្រោះតែធ្វើកម្មករខុសច្បាប់តាំងពីកូននៅបាតជើងក្រហមរងាល មិនទាន់ដឹងដំណឹងស្លាប់ ឬរស់ រីឯ បងប្អូន ៦ នាក់ផ្សេងទៀតជ្រកក្រោមដំបូលផ្ទះខុសៗគ្នាជាមួយឪពុកម្ដាយចិញ្ចឹម។
កូនពៅរូបនេះ ត្រូវបានម្ដាយមីង ដែលប្រកបរបរស៊ីឈ្នួលគេយកមកចិញ្ចឹមតាំងពីម្ដាយបង្កើតស្លាប់ ទាំងនាងពុំស្គាល់ភក្ដ្រអ្នកម្ដាយយ៉ាងដូចម្ដេច។
ថ្មីៗនេះ បណ្ដាញសង្គមហ្វេសប៊ុកបានផ្ទុះឡើងនូវព័ត៌មានកុមារីកម្សត់រស់នៅជាមួយម្ដាយមីងជរាដែលបានធ្លាក់ខ្លួនឈឺលើកន្ទេលក្រោមដំបូលខ្ទមធ្លុះធ្លាយ ស្ថិតក្នុងភូមិដូង ឃុំក្រាំងដីវ៉ាយ ស្រុកភ្នំស្រួច ខេត្ដកំពង់ស្ពឺ ដង្ហោយហៅសប្បុរសជនជួយបន្ដជីវិត។
ជាអកុសល កាលពីថ្ងៃចន្ទនេះ ម្ដាយមីងឈ្មោះ មុត យីម អាយុ ៥២ ឆ្នាំបានឃ្លាតចាកលោកទៅ ដោយបន្សល់នូវជីវិតក្មេងស្រីវ័យ ៧ ឆ្នាំម្នាក់ឲ្យបន្ដដង្ហើមរស់គ្មានទីពំនាក់។
ព្រះតេជគុណភិក្ខុ កក្កដា សុភ័ណ្ឌ ព្រះជន្ម ២១ វស្សាគង់នៅវត្ដសារាវ័ន្ដតេជោ រាជធានីភ្នំពេញ ដែលបាននិមន្ដទៅធ្វើបុណ្យឲ្យម្ដាយមីងកុមារី ធំ សុខឡា ផ្ទាល់ មានសង្ឃដីកាថា៖ «កុមារីសុខឡា មានបងប្អូនទាំងអស់ ៧ នាក់។ កូនច្បងម្នាក់រៀបការ និងកូនៗដទៃរស់នៅជាកូនចិញ្ចឹមរបស់អ្នកស្រុកភូមិ។ សុខឡា រស់នៅជាមួយម្ដាយមីងដែលធ្លាក់ខ្លួនឈឺ និងទើបស្លាប់ដោយសារជំងឺ និងបញ្ហាកង្វះជីវជាតិអាហារ។ ម្ដាយមីងស៊ីឈ្នួលគេ ដោយជ្រកក្រោមដំបូលខ្ទម។ សំខាន់ខ្ទមនោះ មិនមែនជារបស់គាត់ផ្ទាល់នោះទេ គាត់សុំគេរស់នៅទៀត»។
ព្រះភិក្ខុអំពាវនាវរកម្ដាយធម៌ទទួលចិញ្ចឹម សុខឡា។ ហ្វេសប៊ុក
ដោយមានសំណេរសារជាច្រើនលើហ្វេសប៊ុកចង់ចិញ្ចឹមបីបាច់កុមារីកម្សត់នេះ ភិក្ខុដែលតែងតែធ្វើសកម្មភាពមនុស្សធម៌គ្រប់ខេត្ដក្រុងអង្គនេះ នឹងជួយស្វែងរកម្ដាយធម៌ចិត្ដបុណ្យ ដែលមានបំណងចង់យកសុខឡាធ្វើជាកូន និងផ្ដល់ចំណេះវិជ្ជាដូចកុមារដទៃ។
ព្រះតេជគុណ បានបន្ដថា៖ «យើងត្រូវរកម្ដាយធម៌ណា ដែលផ្ដល់អនាគតឲ្យគ្នាបានភ្លឺស្វាង។ ម្ដាយធម៌គួរតែមានជីវភាពធូរធារ ស្រឡាញ់ និងមានបំណងចង់ឲ្យសុខឡា បានចូលរៀន»។
ថ្លែងអំពីអារម្មណ៍កុមារី ធំ សុខឡា ក្រោយពីបាត់បង់អ្នកមើលថែចុងក្រោយ ព្រះភិក្ខុ កក្កដា សុភ័ណ្ឌ មានសង្ឃដីកាថា៖ «គាត់ចង់តែរៀន គាត់ប្រាប់អាត្មាថា ធ្វើយ៉ាងម៉េចក៏បានដែរ ឲ្យតែខ្លួនបានរៀនសូត្រ។ គាត់មិនបារម្ភ និងភ័យខ្លាចនឹងការរស់នៅនឹងម្ដាយណាម្នាក់នោះទេ ពោលសំខាន់ គឺគាត់ចង់ចូលសាលារៀន។ គាត់មានពាក្យអរគុណ និងសប្បាយរីករាយ»។
ក្រៅពីការជួយជ្រោមជ្រែងដល់កុមារី ធំ សុខឡា ព្រះសង្ឃគង់នៅវត្ដសារាវ័ន្ដអង្គនេះ ក៏មានបំណងចង់ជួយដល់បងប្អូននាងទាំងអស់ ខណៈឪពុកម្ដាយចិញ្ចឹមពួកគេនៅស្រុកកំណើតក៏ក្រីក្រតោកយ៉ាក។
ព្រះតេជគុណអំពាវនាវថា៖ «ចង់ឲ្យសប្បុរសជនទាំងអស់ជួយក្រុមគ្រួសារគាត់ទាំងអស់ មិនមែនតែ សុខឡា ម្នាក់នោះទេ ពីព្រោះបងប្អូន សុខឡា ៦ នាក់ទៀតក៏រស់នៅមិនធូរធារឡើយ។ បើសប្បុរសជនណាមានខោអាវចាស់ថ្មីអី សូមបរិច្ចាគមក ពីព្រោះសម្លៀកបំពាក់ពួកគាត់ចាស់រខេករខាកស្ទើរតែដូចក្រណាត់ឆុងកាហ្វេទៅហើយ»៕
