កំពង់ធំ: កុមារី ហៀង គីមហួយ បច្ចុប្បន្នអាយុ ៦ ឆ្នាំ បានរៀបរាប់ប្រាប់ក្នុងវីដេអូឃ្លីបមួយ ដែលត្រូវបានបង្ហោះលើបណ្ដាញសង្គមរបស់តេជគុណព្រះភិក្ខុ កក្កដា សុភ័ណ្ឌ ថា៖ «ជាតិមុន ខ្ញុំជាសត្វស្វា ពុកខ្ញុំបាញ់ហើយទៅកាត់ម្រាមដៃ ម្រាមជើងយកទៅក្លែម ទើបកើតមកបែបនេះ។ ខ្ញុំស្គាល់មនុស្សទាំង ៣ នាក់ ពុកខ្ញុំ ពូប៊ីន និងអ៊ំធីម»។
នៅក្នុងសម្ដីបង្កប់ដោយ ភាពក្រៀមក្រំ កុមារី គីមហួយ ប្រសូតមកមានដៃជើងមិនពេញលក្ខណៈ ដោយដៃស្ដាំមានប្រអប់ដៃតូច និងម្រាមមិនគ្រប់ចំនួន ដៃឆ្វេងមានត្រឹមកែងដៃ ខណៈជើងទាំងសងខាងមានសភាពស្ដួចចាប់ពីត្រឹមជង្គង់ចុះ។
បើទោះបីជាកុមារី រស់នៅក្នុងភូមិអូររំចេក ឃុំច្រនៀង ស្រុកបារាយណ៍ ខេត្ដកំពង់ធំ រូបនេះ អះអាងថា ខ្លួនដឹងជាតិ ដែលមានកំណើតកើតជាសត្វស្វា ត្រូវបានឪពុក និងសាច់ញាតិសម្លាប់យ៉ាងណាក៏ដោយ ក៏ គីមហួយ មិនបានបង្ហាញពីកំហឹងចងអាឃាតទេ។ កុមារីអភ័ព្វរូបនេះបានត្រឹមតែរំលេចក្ដីប្រាថ្នាចង់បានការសិក្សាឆ្ពោះទៅមុខជានិច្ច។
កុមារី ហៀង គីមហួយ បាននិយាយនៅក្នុងវីដេអូឃ្លីបដែលត្រូវបានសាកសួរពីក្ដីបំណងរបស់ខ្លួនថា៖ «ខ្ញុំចង់រៀន។ ចង់បានរៀនពូកែ ចង់បានរៀនឡើងថ្នាក់»។
ព្រះសង្ឃ ដែលតែងតែនិមន្ដធ្វើសកម្មភាពមនុស្សធម៌នៅគ្រប់ច្រកល្ហក និងបានផ្សព្វផ្សាយស្វែងរកកុមារីអភ័ព្វនេះតាមបណ្ដាញសង្គមជាច្រើនខែ តេជគុណ កក្កដា សុភ័ណ្ឌ បាននិមន្ដទៅដល់ផ្ទះកុមារីផ្ទាល់ដើម្បីយកបច្ឆ័យសប្បុរសចំនួន ១០០ ដុល្លារ និង ២០ ម៉ឺនរៀលសម្រាប់ជួយផ្គត់ផ្គង់ជីវភាពដ៏ក្រខ្សត់។
ព្រះភិក្ខុ កក្កដា សុភ័ណ្ឌ មានសង្ឃដីកាថា៖ «គ្រួសារប្អូនស្រី គីមហួយ មានជីវភាពក្រីក្រណាស់។ ឪពុកម្ដាយប្អូនស្រីជាអ្នកស្រែចម្ការ ហើយប្អូនស្រីមានប្អូនម្នាក់ ដែលមានកាយសម្បទាល្អបរិបូណ៌»។
ព្រះតេជគុណ បានបន្ដថា៖ «បើសិនជាដល់ពេលចូលរៀន ប្អូនស្រី គីមហួយ អាចដើរដោយខ្លួនឯងបាន ជាមួយនឹងជើងសិប្បនិម្មិតរបស់គាត់។ ប៉ុន្ដែដោយសារគ្រួសារមិនសូវធូរធារ ប្អូនស្រីនៅត្រូវការសម្ភារសិក្សាជាច្រើនទៀត»។
ជាអ្នកបង្ហោះរូបកុមារី ហៀង គីមហួយ ដើរដោយប្រើជើងសិប្បនិម្មិត និងការបរិច្ចាគពីសប្បុរសជនទាំងក្នុង និងក្រៅប្រទេស គណនីហ្វេសប៊ុកឈ្មោះ Rose Jack បានរៀបរាប់លើបណ្ដាញសង្គមថា៖ «ខ្ញុំបាននាំក្មួយ ហៀង គីមហួយ ទៅចាក់ពុម្ពដៃនៅអង្គការក្នុងទីក្រុងភ្នំពេញ ហើយដៃនេះ គឺបានមកពីសប្បុរសជនរស់នៅប្រទេសអូស្ដ្រាលី និង Mr Barry Tennent & Nita Samatan»។
ស្ដ្រីរូបនេះ បានបន្ដថា៖ «នាងខ្ញុំសូមអរគុណចំពោះទឹកចិត្ដសប្បុរសធម៌របស់បងប្អូន ជនរួមជាតិខ្មែរ និងបរទេស។ សូមជូនពរឲ្យជួបតែសេចក្ដីសុខ និងមានសុភមង្គលក្នុងគ្រួសារជារៀងរហូត»។
ព្រះភិក្ខុ កក្កដា សុភ័ណ្ឌ បានឆ្លើយនឹងចម្ងល់ដែលអះអាងពីការដឹងជាតិរបស់កុមារី ហៀង គីមហួយ នូវការរៀបរាប់អំពីហេតុការណ៍អកុសលពីជាតិមុនថា៖ «ចំពោះបញ្ហានេះ អាត្មាមិនប្រាកដថា វាយ៉ាងដូចម្ដេចទេ គឺថា អាត្មាជឿ ៥០ និង ៥០»៕