.jpg)
លោក សុខ រក្សា បង្ហើរសប្បាយចិត្ត ដែលភរិយាខ្លួនតារាស្រី កុល ដាវី មានបុត្រដំបូង។ រូបថត ហ្វេសប៊ុក
ភ្នំពេញ៖ ខណៈដល់ពាក់កណ្តាលឆ្នាំ ២០២០ នេះ ប្តីប្រពន្ធ តារាសម្តែងស្រីសិចស៊ី សាច់សខ្ចី អ្នកនាង កុល ដាវី និងតារាចម្រៀងប្រុសលោក សុខ រក្សា ទទួលបានលាភ ២ នៅដើម និងចុងខែមិថុនា ដែលធ្វើឲ្យគូស្នេហ៍អ្នកសិល្បៈដូចគ្នាសប្បាយចិត្តខ្លាំងរហូតបង្ហើបប្រាប់មហាជនតាមបណ្តាញសង្គម។
ពីហ្វេសប៊ុកផ្ទាល់លោក សុខ រក្សា បានបង្ហោះសារត្រេកអរឥតឧបមា គ្មានអ្វីប្រៀបផ្ទឹមក្នុងចិត្តចេញមកថា៖ «អរគុណប្រពន្ធសម្លាញ់ បងពិតជាសប្បាយចិត្តខ្លាំង កាដូសម្រាប់បងមួយនេះ ធំមែនទែនហ្មង!» ជាមួយឧបករណ៍ពិនិត្យទឹកនោម ដែលអាចបញ្ជាក់ពីផលវិជ្ជមាននៃការមានគភ៌ចំនួន ២ ឆ្នូត និងរូបផ្អែមល្ហែមប្តីប្រពន្ធខ្លួនផងដែរ។
បន្ថែមសេចក្តីត្រេកអរខ្លាំងនេះ តារាចម្រៀងប្រុសជ្រកនៅផលិតកម្មសាន់ដេ ហើយក៏ជាមន្រ្តីរាជការបម្រើការនៅក្រសួងមហាផ្ទៃផ្នែកភ័ស្តុភារ មានស័ក្តិ ៤ ពាក់លើស្មាលោក សុខ រក្សា បញ្ជាក់ប្រាប់ពីលាភទាំង ២ របស់ប្តីប្រពន្ធ ដែលទទួលបានក្នុងខែមិថុនា ឆ្នាំ ២០២០ ថា៖ «ពិតជាត្រេកអរខ្លាំងណាស់ ដែលយើងបានលាភធំដល់ទៅ ២ នៅខែមុននេះ [ខែមិថុនា] គឺនៅដើមខែ យើងទើបតែបានដូររថយន្តទំនើបថ្មីដូចក្តីប្រាថ្នា ខណៈនៅចុងខែ ឬអាចនិយាយបានថានៅដើមខែកក្កដានេះ យើងបានដំណឹងធំមួយទៀត គឺមានកូនដំបូង»។
ដោយឡែកប៉ុន្មានខែមុននេះ មហាជនក៏កត់សម្គាល់តាំងពីដើមឆ្នាំនេះថា អ្នកនាង កុល ដាវី អាចនឹងពពោះកូនដំបូង ហើយទំនងសម្រាលនៅចុងឆ្នាំ ២០២០ ឬក៏អាចថតរឿងចប់ឲ្យប៉ុស្ដិ៍ភីអិនអិនក្នុងរយៈពេលដ៏ខ្លីខាងមុខ ក៏អាចថាបានដែរមើលទៅ ជាមួយនឹងស្វាមី ដែលជាអតីតតារាចម្រៀងនៅទ្រនំផលិតកម្មហង្សមាស និងបច្ចុប្បន្ន នៅសាន់ដេ លោក សុខ រក្សា តាមការសង្កេតឃើញថា អ្នកនាងមានអាការដូចជាចាញ់កូន។
ជាទូទៅ នាពេលមានដំណឹងថា មានបុត្រដំបូង មិនថាជាប្តីប្រពន្ធសាមញ្ញជន ឬជាអ្នកសិល្បៈទេ រមែងចង់បានកូនប្រុស ឬកូនស្រី តាមសេចក្តីប្រាថ្នា ខណៈលោក សុខ រក្សា ក៏បង្ហើបពីអារម្មណ៍ខ្លួន និងភរិយា នាពេលមានបុត្រដំបូងនេះថា៖ «សម្រាប់ខ្ញុំ មិនប្រកាន់ឡើយថា ជាកូនប្រុស ឬកូនស្រី ឲ្យតែកូនគឺស្រឡាញ់ទាំងអស់។ ចំណែកប្រពន្ធខ្ញុំវិញ គាត់ចង់បានកូនស្រីច្រើនជាង ដោយសារគាត់យល់ថា មានកូនស្រីច្បង ពេលធំអាចជំនួសដៃជើងម្តាយបាន ស្របពេលដែលបច្ចុប្បន្នគាត់មានរបរលក់ដូរគ្រឿងតុបតែងកាយ និងសម្លៀកបំពាក់តាមអនឡាញផងនោះ»។
គួរបញ្ជាក់ផងដែរថា អ្នកនាង កុល ដាវី បានរៀបការជាមួយលោក សុខ រក្សា កាលពីថ្ងៃទី ៨ ខែមីនា ឆ្នាំ ២០១៩ ក្រោយពីបានស្វែងយល់ចិត្តថ្លើមគ្នា ៥ ឆ្នាំ។ បន្ទាប់ពីរៀបការតារាស្រីសាច់សខ្ចីរូបនេះហាក់ប្ដូរស្ទីលស្លៀកពាក់ខុសពីមុន គឺមិនសូវបញ្ចេញភាពសិចស៊ីខ្លាំងទៀតទេ ហើយម្យ៉ាងទៀត គូស្នេហ៍តារាដូចគ្នាក៏រកស៊ីធូរធារ មានផ្ទះដល់ ២ ល្វែង និងជិះរថយន្ដថ្មីទំនើបៗផងដែរ៕
