ភ្នំពេញ៖ ផ្ដើមចេញពីការផ្គត់ផ្គង់ជ័រផ្គុំលេងបំផុសគំនិតច្នៃប្រឌិត អ្នកផលិតរបស់ក្មេងលេងក្នុងស្រុក Doydoy បានអភិវឌ្ឍជម្រើសការកម្សាន្តបែបអប់រំដល់កុមាររាប់តាំងពីសៀវភៅរឿងអវកាសដាក់ឈ្មោះតួអង្គតាមម្ចាស់សៀវភៅ និងចេញលក់តុក្កតាឌូឌូ ជាតួអង្គមួយនៅក្នុងសៀវភៅក្នុងខែធ្នូ នេះ។
ចាប់ផ្ដើមដំបូងពីឆ្នាំ ២០១៦ Doydoy ទទួលបានការគាំទ្រពីអាណាព្យាបាល ដោយឃើញថា កុមារមានភាពឈ្លាសវៃ និងរីកចម្រើនឆាប់រហ័សបន្ទាប់ពីលេងឧបករណ៍ផ្គុំលេង។
ការស្រាវជ្រាវជាសកលសុទ្ធតែទទួលស្គាល់ថា កុមាររៀនសូត្រ និងដុះដាលគំនិតប្រាជ្ញាតាមរយៈការលេង។
ដោយយល់ឃើញពីសារៈសំខាន់នៃល្បែងលេងចំពោះការលូតលាស់របស់កុមារ អ្នកជំនួញវ័យក្មេង ឯម ច័ន្ទរិទ្ធិកុរ ក៏ចាប់ផ្ដើមរៀនបង្កើតជ័រផ្គុំ និងព្រីនវាចេញលក់សាកល្បងក្រៅផ្លូវការក្នុងឆ្នាំ ២០១៦។
យុវជនវ័យ ២៤ ឆ្នាំរូបនេះបានរំឭកប្រាប់ ភ្នំពេញ ប៉ុស្ដិ៍ ថា៖ «ដល់ឆ្នាំទី២ ខ្ញុំក៏បានប្រទះនឹងគេហទំព័រមួយដែលគេដាក់ថា Think Global Act Local ដែលបានបង្រៀនកូនខ្មែរពីការធ្វើអាជីវកម្ម និងការកែច្នៃ។ ខ្ញុំក៏ចាប់ផ្ដើមយល់ថា តាមពិត ទោះបីជាមិនមានរោងចក្រក៏គេអាចព្រីនចេញជា 3D បានយ៉ាងណាក៏ដោយ»។
លោកតែងលើកទឹកចិត្តខ្លួនឯងថា៖ «ពេលចាប់ផ្ដើមមិនងាយស្រួលទេ តែបើដាក់ចុះស្មើនឹងយើងបរាជ័យទៅចាប់ផ្ដើមថ្មីរឹតតែពិបាក»។
ក្រោយហែលឆ្លងការលំបាកក្នុងការស្វែងរកដៃគូជំនួញនៅឆ្នាំ ២០១៩ ទើប Doydoy មានឈ្មោះម៉ូដែលត្រឹមត្រូវមានបុគ្គលិកបម្រើការ និងការិយាល័យរបស់ខ្លួន។
លោក ច័ន្ទរិទ្ធិកុរ បានប្រាប់ថា៖ «ខ្ញុំបានសម្រេចចិត្តធ្វើការជាមួយនឹងបរទេស តែសម្រាប់សៀវភៅគឺយើងធ្វើនៅខ្មែរទាំងអស់ខ្ញុំពិតជាមានមោទនភាពមែនទែន»។
សព្វថ្ងៃនេះ Doydoy មានហាងជាដៃគូសហការ ១០ និងសាលារៀនធំៗជ្រើសរើសធ្វើជាកម្មវិធីសិក្សាក្រៅម៉ោងបន្ថែមជូនដល់កុមារនៅចុងសប្ដាហ៍ ប៉ុន្តែក៏ត្រូវបានបិទជាបណ្ដោះអាសន្នដោយសារកូវីដ។
ឧបករណ៍ជ័រផ្គុំមាន ៦ ប្រភេទផ្សេងៗគ្នា ដូចជា រូបរ៉ុក្កែត ឧទ្ធម្ភាគចក្រ រថក្រោះ រូបអង្គរវត្ត ឡានក្រុង និងយន្តហោះ។
លោក ច័ន្ទរិទ្ធិកុរ រៀបរាប់ពីគុណសម្បត្តិ Doydoy ថា៖ «សម្រាប់ឧបករណ៍ផ្គុំលេងវាធ្វើពីស៊ីលីកូន វាទន់ និងអាចបត់បែនបាន។ វាគ្មានសារធាតុ បង្កការគ្រោះថ្នាក់ដោយប្រការណាមួយដល់ក្មេងទេ»។
លោកលើកពីលក្ខណៈប្លែកនៃជ័រផ្គុំទៀតថា៖ «មួយវិញទៀត ជាជាងដែលដាក់ក្រដាសណែនាំដូចរូបផ្គុំដទៃ Doydoy បានដាក់គំរូផ្ទាល់តែម្ដង ហេតុនេះកុមារអាចចាប់ផ្ដើមពីចំណុច ដែលគាត់ចាប់បាន មិនបាច់ត្រូវតែផ្ដើមដូចគ្នាទេ សំខាន់ឱ្យតែអាចចេញមកដូចរូបគំរូ។ ធ្វើបែបនេះក្មេងនឹងមានភាពជាម្ចាស់ការលើខ្លួនឯងហើយប្រើខួរក្បាលបានច្រើន»។
ក្រៅពីជ័រផ្គុំ Doydoy មានលក់សៀវភៅអវកាសជាភាសាខ្មែរ និងអង់គ្លេស ដោយឪពុកម្ដាយអាចកុម្ម៉ង់ដាក់ឈ្មោះ និងរូបកូនៗធ្វើជាតួអង្គក្នុងសៀវភៅផ្ទាល់ ដើម្បីជំរុញឲ្យកុមារមានក្ដីស្រមៃធំដូចតួអង្គអវកាសយានិកនេះដែរ។
រីឯតុក្កតាឌូឌូ ដែលជាតួអង្គមួយនៅក្នុងសៀវភៅ ក៏នឹងត្រូវបានបង្កើតចេញជាតុក្កតាមួយប្រភេទទៀតសម្រាប់កុមារក្នុងខែធ្នូ នេះផងដែរ។
លោកនិយាយថា៖ «តុក្កតាឌូឌូវិញ ចំណុចពិសេសវា គឺក្រៅពីជាតុក្កតាឱបបានហើយអាចសង់រូបលើក្បាលវាបានទៀតផង»។
លោក ច័ន្ទរិទ្ធិកុរ សម្គាល់ឃើញថា ជោគជ័យរបស់ Doydoy គឺដោយសារតែអាណាព្យាបាលកុមារតែងតែត្រឡប់មកទិញម្ដងហើយម្ដងទៀត ដោយចែករំលែកមតិយោបល់ថា កូនៗរបស់ពួកគាត់មានការរីកចម្រើនជាងមុនមែន។
លោករំឭកសម្ដីអ្នកម្ដាយម្នាក់ ដែលកូនគាត់មានជំងឺអូទីសឹមកម្រិតមួយ ហើយមិនសូវហ៊ាននិយាយ ឬលេងជាមួយក្មេងដទៃឡើយ។
លោកបានឲ្យដឹងថា៖ «ថ្ងៃទីមួយគាត់ [ម៉ូនីកា] លាក់ខ្លួននៅតែក្រោមតុ យើងព្យាយាមបញ្ចុះបញ្ចូលគាត់ ៣ ម៉ោង ទម្រាំគាត់ហ៊ានមកចូលរួមជាមួយនឹងក្មេងដទៃ។ យើងបានយកឧបករណ៍លេង Doydoy មកឲ្យគាត់លេង»។
ស្ថាបនិក Doydoy បានបន្តថា៖ «ម្ដាយ ម៉ូនីកា ប្រាប់ថា ម៉ូនីកា ផ្លាស់ប្ដូរច្រើនណាស់ នាងចាំផ្កាឈូករ័ត្នដែលរៀនបាន ហើយហ៊ានសម្រេចចិត្តចង់ដាំនៅផ្ទះ។ នេះជាមតិដែលយើងចាំជាប់ចិត្តមែនទែន»។
តម្លៃរបស់រូបផ្គុំនីមួយៗផ្ដើមពី ១០ ទៅ ៦០ ដុល្លារ ដែលតម្រូវសម្រាប់កុមារអាយុចាប់ពី ៣ ដល់ ១២ ឆ្នាំ។
ទន្ទឹមនឹងការរីករាយជាមួយផ្លែផ្កាអាជីវកម្មដែលជួយបណ្ដុំគំនិតប្រាជ្ញាក្មេងៗ លោក ច័ន្ទរិទ្ធិកុរ បានប្រាប់ថា លោកមានបំណងបង្វឹក និងរើសបុគ្គលិកមានលក្ខណសម្បត្តិ ព្រមទាំងបទពិសោធជាមួយក្មេង ដើម្បីកែប្រែ និងអភិវឌ្ឍបន្ថែមទៅលើកម្មវិធីសិក្សាក្រៅម៉ោង។
ក្នុងដំណើរផ្ដើមពីការលក់ជ័រផ្គុំរហូតដល់វិវឌ្ឍជាកម្មវិធីអប់រំតាមរយៈការលេង លោកបានសម្ដែងចំណាប់អារម្មណ៍ថា៖ «ខ្ញុំមិនគិតថា យើងនឹងមានគ្រប់យ៉ាងនៅពេលចាប់ផ្ដើមទេ តែសូមឱ្យមានខ្លះ ហើយខ្លះទៀតយើងអាចរៀនបាន។ ធ្វើម្ដងមួយដល់ពេលនោះបើទោះជាយើងជោគជ័យ ឬក៏បរាជ័យយើងដឹងថា យើងបានធ្វើវាអស់ពីសមត្ថភាពហើយ។ យើងនឹងមិនចាំបាច់មកអង្គុយស្ដាយក្រោយ»។
Doydoy អាចទាក់ទងតាមហ្វេសប៊ុក @Doydoycompany និងអ៊ីនស្តាក្រាម @doydoycambodia។
សម្រាប់ព័ត៌មានបន្ថែម និងការទិញ អាចធ្វើបានតាមរយៈវេបសាយ៖ doydoyplay.com៕