.jpg)
លោក ថុល តូម៉ា (អាវខ្មៅ) នាពេលជួបសំណេះសំណាលជាមួយនឹងរដ្ឋមន្រ្តីក្រសួងព័ត៌មានឯកឧត្តម ខៀវ កាញារីទ្ធ។ រូបថត សហការី
ភ្នំពេញ៖ បើតាមពិតទៅអាណត្តិនៃការងារថ្មីមានតួនាទីជាទីប្រឹក្សាអគ្គរដ្ឋទូតស្វ៊ីស ទទួលបន្ទុកផ្នែកអប់រំ និងវប្បធម៌ របស់អនុបណ្ឌិតចិត្តវិទ្យានយោបាយវ័យក្មេង រៀនចប់ពីប្រទេសស្វ៊ីស ជាកូនខ្មែរអ្នកសៀមរាប លោក ថុល តូម៉ា ចាប់ផ្តើមតាំងពីដើមឆ្នាំ ២០២០ នេះមកម្ល៉េះនៅនេប៉ាល់។
អតីតជានិស្សិតខ្មែរដំបូងគេ ដែលបានអាហារូបករណ៍ថ្នាក់បរិញ្ញាបត្រជាន់ខ្ពស់ សិក្សានៅសាកលវិទ្យាល័យ Zurich University នៃប្រទេសស្វ៊ីស ផ្នែកចិត្តវិទ្យានយោបាយ ដែលបានបញ្ចប់នៅចុងឆ្នាំ ២០១៥ និងជានាយកប្រតិបត្តិនៃប្រទេសស្វ៊ីស ទទួលបន្ទុកកិច្ចការអប់រំ និងប្រយុទ្ធប្រឆាំងគ្រឿងញៀន នៅក្នុងតំបន់អាស៊ី រូបនេះ បើតាមគម្រោងគឺត្រូវផុតអាណត្តិការងារចាស់នៅត្រឹមថ្ងៃទី ១២ ខែ មករា ឆ្នាំ ២០២០ ផងដែរ។
លោក ថុល តូម៉ា កូនខ្មែរដែលមានតួនាទីជាទីប្រឹក្សាអគ្គរដ្ឋទូតស្វ៊ីស។ រូបថត សហការី
ខណៈលោក ថុល តូម៉ា ជាកូនខ្មែរដំបូង មានស្រុកកំណើតនៅភូមិត្របែក ឃុំដំដែក ស្រុកសូទ្រនិគម ខេត្តសៀមរាប មានបងប្អូនប្រុសស្រី ៦ នាក់ ហើយគ្រួសារមានជីវភាពលំបាកបង្ហើបប្រាប់ពីប្រវត្តិការងារថា៖ «បច្ចុប្បន្ន ខ្ញុំជានាយកប្រតិបត្តិនៃប្រទេសស្វ៊ីស ទទួលបន្ទុកកិច្ចការអប់រំ និងប្រយុទ្ធប្រឆាំងគ្រឿងញៀននៅតំបន់អាស៊ីនៅឡើយទេ។ តាមពិតទៅអាណត្តិនេះ ត្រូវចប់តាំងពីថ្ងៃទី ១២ ខែ មករា ឆ្នាំ ២០២០ មកម្ល៉េះ ហើយខ្ញុំនឹងត្រូវផ្លាស់ទៅប្រទេសនេប៉ាល់ ចុងខែមករា ក្នុងតួនាទីជាទីប្រឹក្សាអគ្គរដ្ឋទូតស្វ៊ីសនៅទីនោះ ទទួលបន្ទុកអប់រំ និងវប្បធម៌ ជំនួសវិញ។ តែដោយសារបញ្ហាកូវីដ ទើបខ្ញុំមិនអាចចាកចេញភ្លាមៗបានស្របពេលវាកាន់តែរីករាលដាលយ៉ាងធ្ងន់ធ្ងរលើសកលលោក។ ម្យ៉ាងទៀតប្រព័ន្ធការពាររាងកាយខ្ញុំខ្សោយងាយនឹងឆ្លងវីរុសនេះណាស់ បើតាមដំបូន្មានគិលានុបដ្ឋាយិកា របស់ខ្ញុំ ដែលប្រទេសស្វ៊ីស បានចាត់មកតាមដាន និងមើលថែទាំសុខភាពខ្ញុំយ៉ាងពិសេស ព្រោះកន្លងមកខ្ញុំធ្លាប់មានប្រវត្តិវះកាត់ប្តូរខួរឆ្អឹង ដោយជំងឺមហារីកគ្រាប់ឈាម»។
លោក ថុល តូម៉ា ដែលធ្លាប់ធ្វើការជាអ្នកស្ម័គ្រចិត្តនៅតាមគម្រោង និងអង្គការជាច្រើន មានអង្គការស្នាមញញឹមនៃកុមារ គ្រួសារយើង Oxfam KYSD អង្គការឆែមន៍ Unicef និងបានបំពេញការងារនៅមន្ទីរពេទ្យកុមារជាតិចំនួន ៦ ខែ ក៏បានជាប់អាហារូបករណ៍នៅស្វ៊ីស បានបន្តថា៖ «ជាង ១ អាណត្តិ ខ្ញុំបានជួយតម្រង់ទិសដល់សិស្ស និស្សិត និងជួយស្វែងរកអាហារូបករណ៍ទាំងក្នុង និងក្រៅប្រទេសស្របតាមគម្រោងអភិវឌ្ឍន៍ធនធានមនុស្សនៃភ្នាក់ងារស្វ៊ីសផង ខ្ញុំបានជួយនិស្សិតក្រីក្របានចំនួន ១ ៣៨៩ នាក់ ឲ្យទទួលបានអាហារូបករណ៍ក្នុងប្រទេស ដែលម្នាក់ទើបទទួលបានអាហារូបករណ៍ពីរដ្ឋមន្ត្រីក្រសួងវប្បធម៌ នាពេលថ្មីៗនេះ លើជំនាញស្ថាបត្យកម្ម និងចំនួន ១៧ នាក់ទៀត កំពុងបន្តការសិក្សានៅប្រទេសថៃ លើបរិញ្ញាបត្រស្ថាបត្យកម្ម កសិកម្ម សេដ្ឋកិច្ច និងគិលានុដ្ឋាកពីដៃគូផ្តល់មកគម្រោងខ្ញុំ ហើយពី ១ ឆ្នាំទៅ ១ ឆ្នាំ ចំនួនផ្តល់អាហារូបករណ៍បានកើនឡើង។ ជាក់ស្តែង ក្នុង ១ សាកលវិទ្យាល័យផ្តល់ជូនតែ ២ នាក់ទេ ប៉ុន្តែ ២ ឆ្នាំចុងក្រោយនេះ គេជូនថែម ៤ នាក់ទៀត។ ក្រៅពីនេះ ខ្ញុំមានកម្មវិធីផ្លាស់ប្តូរការសិក្សាទៅស្វ៊ីសចំនួន ២ សប្តាហ៍ និងនៅប្រទេសចិន ឡាវ វៀតណាម ថៃ ភូមា ហ្វីលីពីន ជប៉ុន និងឥណ្ឌូនេស៊ី ស្របតាមកម្មវិធីសាមីប្រទេស ហើយខ្ញុំរៀបចំប្រឡងតេស្ត សមត្ថភាពនិស្សិត ជ្រើសរើសមុនចេញទៅចូលរួម»។
លោក ថុល តូម៉ា កូនខ្មែរដែលមានតួនាទីជាទីប្រឹក្សាអគ្គរដ្ឋទូតស្វ៊ីស នាពេលធ្វើបទបង្ហាញពីកម្មវិធីអាហារូបករណ៍ក្រៅប្រទេស។ រូបថត សហការី
ដោយសារធ្លាប់ជាកូនចៅក្នុងគ្រួសារ ដែលមានម្តាយឪពុកពុំចេះអក្សរ តែពួកគាត់មិនចង់ឲ្យកូនលំបាកដូចពួកគាត់ទើបជំរុញកូនឲ្យរៀនបានខ្ពស់ដូចសព្វថ្ងៃ។ ខណៈលោក ថុល តូម៉ា ក៏ធ្លាប់ជួបការលំបាកបំផុតក្នុងជីវិតផងដែរ នៅពេលដឹងថា ខ្លួនមានជំងឺមហារីកគ្រាប់ឈាមនោះ តែលោកនៅមិនបោះបង់ការតស៊ូខិតខំរៀនសូត្ររហូតសម្រេចតាមបំណង ក្រោយពីមានការជួយសង្គ្រោះទាន់ពេល។
លោក ថុល តូម៉ា បានរំឭកពីស្ថានភាពសុខភាពបច្ចុប្បន្ន និងពេលមានវិបត្តិ និងអ្នកជួយសង្គ្រោះខ្លួនដែរថា៖ «អ្វីដែលលំបាកបំផុត នៅពេលខ្ញុំដឹងថា ខ្ញុំមានជំងឺមហារីកគ្រាប់ឈាមតែម្តង វាស្ទើរតែបញ្ចប់ជីវិតខ្ញុំ នាពេលនោះ។ ដោយមានការយកចិត្តទុកដាក់ពី ឯកឧត្តម Hun Manet បានជួយទៅលើថ្លៃព្យាបាល និងវេជ្ជបណ្ឌិត Chan Samphors ជាអ្នកប្រឹក្សារហូតខ្ញុំចាកចេញទៅស្វ៊ីស ទទួលបានការព្យាបាលនៅទីនោះ។
សព្វថ្ងៃដោយបំពេញការងារនៅកម្ពុជា រដ្ឋស្វ៊ីស បានចេញ Insurance ឲ្យខ្ញុំតាមដានសុខភាពនៅមន្ទីរពេទ្យបាងកក ប្រទេសថៃ និងគិលានុបដ្ឋាយិកា មកពីស្វ៊ីស ១ រូបមើលថែទាំជាប្រចាំ។ ដោយសារស្ថានភាពជំងឺនេះ បូកផ្សំការព្រួយបារម្ភជំងឺកូវីដថ្មី ដែលខ្ញុំងាយឆ្លងបំផុតផង ទើបខ្ញុំមិនអាចចេញទៅកាន់កិច្ចការថ្មីនេះបាន តែនេះ ក៏មិនមែនជាបញ្ហាធ្ងន់ធ្ងរឡើយ»។
កាន់តែពិសេសជាងនេះទៀត កូនខ្មែរដែលមានឆន្ទៈដ៏មោះមុត ក្នុងការងារថ្មីមានតួនាទីជាទីប្រឹក្សាអគ្គរដ្ឋទូតស្វ៊ីស ទទួលបន្ទុកខាងផ្នែកអប់រំ និងវប្បធម៌ លោក ថុល តូម៉ា បានបង្ហាញពីក្តីរំពឹងសម្រាប់ខ្លួនទៅថ្ងៃខាងមុខដែរថា៖ «ថ្ងៃអនាគត ខ្ញុំចង់វិលមកកម្ពុជា និងជួយកម្ពុជាវិញ ក្នុងកិច្ចការកំពូលនៃក្រសួងវប្បធម៌ និងវិចត្រសិល្ប: ព្រោះអាណត្តិរបស់ខ្ញុំត្រូវចប់ឆ្នាំ ២០២៥ តែបើខ្ញុំចង់បន្តគឺត្រូវសិក្សានៅសហរដ្ឋអាមេរិកវិញក្នុងគោលចំណងបន្តថ្នាក់បណ្ឌិតផងដែរ។
ខ្ញុំយល់ឃើញថា វប្បធម៌ដែលជាព្រលឹងជាតិយើង យ៉ាងសំខាន់បំផុត គ្រប់កិច្ចការទំនាក់ទំនង ទាំងអស់ ពិសេសលើការទូតនេះតែម្តង។ វប្បធម៌ជាឈ្មោះដ៏ពីរោះ ងាយឲ្យពិភពលោកបានស្គាល់ និងចងចាំ។ ប្រទេសដែលមានវប្បធម៌ដ៏ចំណាស់ ត្រូវបានកត់ត្រាជាប្រវត្តិសាស្ត្រ ហើយពិភពលោកនឹងកោតស្ញប់ស្ញែង។ សម្រាប់ខ្ញុំមើលឃើញចំណុចត្រូវកែលម្អយ៉ាងច្រើននៅក្នុងស្ថាប័ននេះ ដើម្បីកិត្តិយស និងភាពល្បីល្បាញមុខមាត់ជាតិ ជាពិសេស វិស័យភាពយន្តជាតិឲ្យរស់ឡើងវិញ»៕
