.jpg)
កូរ៉ូណា ជាឈ្មោះដាក់ឲ្យកូនជីរ៉ាហ្វ ដើម្បីរំឭកថា វាកើតចំពេលការរីករាលដាលជាសកលនៃជំងឺកូវីដ-១៩។ រូបថត AFP
ក្រុងហ្សាការតា: សួនសត្វនៅបាលីមួយបានដាក់ឈ្មោះកូនជីរ៉ាហ្វ ឬសត្វកវែង ដែលទើបនឹងកើតថា «កូរ៉ូណា» ជាការឧទ្ទិសដល់កំណើតរបស់សត្វញីនេះ អំឡុងពេលវិបត្ដិរោគរាតត្បាតសកល។
កូនសត្វកវែងកើតនៅថ្ងៃទី ៩ ខែមេសា ពីពោះមេឈ្មោះ សូភា និងបាឈ្មោះ ម៉ាតាឌី រួមជាមួយបងប្អូនកវែងពីរក្បាលទៀតនៅសួនសត្វ Bali Safari Park ស្ថិតនៅកោះវិស្សមកាលឥណ្ឌូនេស៊ី។
វីដេអូឃ្លីបមួយ ដែលត្រូវបានផ្សាយដោយសួនសត្វ បានបង្ហាញកូនសត្វកវែងកើតចេញពីមេវា ក្នុងបរិវេណតូចមួយ។
កូរ៉ូណា មានសុខភាពល្អ និងនៅបៅដោះមេ ហើយវាត្រូវបានបន្តតាមដានរយៈពេល ៣ ខែទៀត។ រូបថត AFP
អ្នកនាំពាក្យសួនសត្វ លោក អាណាក អាខ្វាំង ងូរ៉ះ អាលីត ស៊ូចាណា បាននិយាយថា៖ «កូនសត្វកវែងញីនេះកើតចំពេលកូវីដ ១៩ រាតត្បាត ដូច្នេះរដ្ឋមន្ដ្រីបរិស្ថាន បានដាក់ឈ្មោះវាថា កូរ៉ូណា។ កូរ៉ូណា មានសុខភាពល្អ និងនៅបៅដោះមេ។ យើងបន្ដឃ្លាំមើលរយៈពេល ៣ ខែទៀត»។
សួនសត្វ Bali Safari Park បានបិទទ្វារផ្អាកទទួលភ្ញៀវ កាលពីចុងខែមីនា ជាផ្នែកមួយនៃកិច្ចខិតខំប្រឹងប្រែងទប់ស្កាត់ការរីករាលដាលនៃវីរុសកូរ៉ូណា៕ AFP/HR
