The Phnom Penh Post Search

Search form

Logo of Phnom Penh Post newspaper Phnom Penh Post - កូនៗ អ៊ុំ គន្ធា អង្គុយ​ឱប​គ្នា​យំបាត់​ម្ដាយ​មុន​ត្រូវ​ប៉ូលិស​ចាប់

កូនៗ អ៊ុំ គន្ធា អង្គុយ​ឱប​គ្នា​យំបាត់​ម្ដាយ​មុន​ត្រូវ​ប៉ូលិស​ចាប់

Content image - Phnom Penh Post
អតីតតារា​ចម្រៀង អ៊ុំ គន្ធា និង​កូន​ប្រុស​ទាំង​ពីរ​។ វុទ្ធី

កូនៗ អ៊ុំ គន្ធា អង្គុយ​ឱប​គ្នា​យំបាត់​ម្ដាយ​មុន​ត្រូវ​ប៉ូលិស​ចាប់

ភ្នំពេញ: កាល​ពី​រសៀល​ថ្ងៃទី ២៤ ខែ​តុលា ព័ត៌មាន​ស្រាប់​តែ​ផ្ទុះ​ឡើង​ថា អតីត​អ្នក​ចម្រៀង អ្នកនាង អ៊ុំ គន្ធា ត្រូវ​បាន​កង​កម្លាំង​នៃ​គណៈបញ្ជាការ​ឯកភាព​ខណ្ឌ​ឫស្សីកែវ ចាប់​ឃាត់ខ្លួន និង​នាំ​យក​ទៅ​ធ្វើការ​សាកសួរ​ពាក់ព័ន្ធ​នឹង​ករណី​ប្រើប្រាស់​គ្រឿង​ញៀន។ ខណៈ​បណ្តាញ​សង្គម ដែល​មាន​ផ្សព្វផ្សាយ​ភ្ជាប់​នឹង​រូបភាព​កម្លាំង​សមត្ថកិច្ច​នាំខ្លួន​អតីត​តារា​ចម្រៀង ដែល​កំពុង​តែ​ញាំញី​ដោយ​រោគ​សង្គម អ្នកនាង អ៊ុំ គន្ធា ក្រៅ​ពីការ​ពោល​ដោយ​ក្តី​អាណិត​អាសូរ​ថា ហេតុអ្វី​បំផ្លាញ​ខ្លួនឯង និង​អនាគត​កូន​ផ្ទួនៗ​នោះ។

ឲ្យដឹង​ពី​មូលហេតុ​ដែល​ត្រូវ​សមត្ថកិច្ច​ឃាត់​ខ្លួន និង​ល្បី​ជាប់​ពាក់ព័ន្ធ​គ្រឿង​ញៀន​នោះ អ្នកនាង អ៊ុំ គន្ធា បាន​បង្ហាញ​ទាំង​ទឹកភ្នែក​ថា៖ «ដំបូង​ឡើយ នា​យប់​មុន​ថ្ងៃ​កើត​ហេតុ ខ្ញុំ​ផឹកស្រា​នៅ​ផ្ទះ។ ពេល​នោះ កូនខ្ញុំ​មិន​ឲ្យ​ខ្ញុំ​ផឹក គេ​យក​ស្រា​នោះ​ទៅ​ចាក់​ចោល ហើយ​ខ្ញុំខឹង ក៏ដើរ​ចេញ​ពីផ្ទះ។ ចៃដន្យ ជួប​នឹង​អ្នក​រើស​អេត​ចាយ​ម្នាក់ ដោយ​និយាយ​ត្រូវរ៉ូវ​គ្នា ក៏​បបួល​ខ្ញុំ​ទៅ​ផឹកស្រា​នៅ​ផ្ទះ​របស់​គេ តែ​ពេល​ទៅ​ដល់​មិនមែន​ជា​ផ្ទះ​ទេ ជា​អគារ​ចាស់​ដែល​គេ​ចោល។ ពួក​ខ្ញុំ​ក៏នាំ​គ្នា​ដើរ​រើស​អេតចាយ​លក់បាន​លុយ​ទិញ​ស្រា និង​ម្ហូប​ក្លែម រួច​ក៏ដេក​នៅ​ទីនោះ។ តែ​មិន​បាន​ដឹងថា នៅ​លើ​អគារ​នោះ​នៅ​មាន​ក្មេងៗ ជក់​ថ្នាំ​នៅ​លើ​នោះ​ទេ»។

អតីត​តារាចម្រៀង​ល្បី​កាល​ពី​អំឡុង​ជាង ១០ ឆ្នាំមុន​ហើយ​ក៏ជា​តារា​ម្ចាស់​ពាន​កំពូល​តារា​សិចស៊ី អ្នកនាង អ៊ុំ គន្ធា បាន​ឲ្យដឹង​បន្តថា៖ «នៅ​ថ្ងៃ​សមត្ថកិច្ច​ចូល​ចាប់​ឃាត់​ខ្លួន​នោះ ខ្ញុំក៏​មិន​បាន​ដឹង​ដែរ។ គេ​ឃាត់​អ្នក​នៅ​ខាងលើ។ ពេល​នោះ ខ្ញុំ​កំពុង​ដេក​នៅ​ក្រោម មិន​ដឹង​ខ្លួន​ទេ ស្រាប់​តែ​ប៉ូលិស​គេ​ចូល​ឆែកឆេរ​ចាប់​ខ្ញុំ​តែម្តង។ ប៉ុន្តែ​ក្រោយ​ពី​នាំ​ទៅ​ខណ្ឌ សួរនាំ​ខ្ញុំ ហើយ​ទើប​ដឹង​ថា ខ្ញុំ​មិន​បាន​ជាប់​ពាក់ព័ន្ធ ក៏​ដោះ​លែង​ខ្ញុំ​មក​ផ្ទះ​វិញ ដែល​ពេល​នោះ​កូនៗ​ខ្ញុំ​ទៅ​រក​ខ្ញុំ​ឃើញ​នៅ​ខណ្ឌ ក្រោយ​ពី​ល្បី​ថា ម៉ែ​ត្រូវ​គេ​ចាប់ខ្លួន»។

បន្ថែម​ពីការ​ស្រាយ​ចម្ងល់​មហាជន​ដែល​ថា «ជា​ម្តាយ​ម្នាក់ ហេតុ​អី​មិន​ចេះ​ជួយ​ខ្លួនឯង? ចេះ​តែ​នាំទុក្ខ​ឲ្យកូនៗ កើត​ក្តីកង្វល់ និង​ភាព​អាម៉ាស់។ ឥឡូវ​មក​ធ្លាយ​ដំណឹង​ញៀន​ថ្នាំ​ទៀត​នោះ កូន​ប្រុស​ច្បង អ្នកនាង អ៊ុំ គន្ធា បាន​ឲ្យ​ដឹង​ថា៖ «ខ្ញុំ​មិន​នឹកស្មាន​ថា មាន​រឿង​បែប​ហ្នឹង​កើត​លើ​ម្តាយ​ខ្ញុំ ដែល​ថា ត្រូវ​ប៉ូលិស​ឃាត់​ខ្លួន​ពាក់ព័ន្ធ​គ្រឿង​ញៀន​ទេ»។

កូនប្រុស​ច្បង ដែល​មាន​មាឌ​ធំ​ឈ្មោះ ពេជ្រ បន្តថា៖ «មុន​កើត​រឿង​ហេតុនេះ​ពីរ​ថ្ងៃ ម្តាយ​ខ្ញុំ​គាត់​នៅ​ផ្ទះ​ធម្មតា តែ​គាត់​ទិញ​ស្រា​មក​ផឹក។ ខ្ញុំ​បារម្ភ​គាត់​ស្រវឹង​និយាយ​មិន​ដឹង​ខុសត្រូវ ហើយ​គាត់​ដើរ​ចេញ​ពីផ្ទះ​ដោយសារ ខ្ញុំ​យក​ស្រា​ចាក់​ចោល គាត់​ខឹង​កូន​ក៏ដើរ​ចេញ​ពីផ្ទះ។ តែ​ក្រោយ​មក ខ្ញុំ​ក៏​ដើររក តែ​រក​មិន​ឃើញ។ លុះ​ស្អែក​ឡើង​រក​គាត់​ទៀត​ហើយ​នៅ​តែ​មិន​ដឹង​គាត់​ទៅណា។ ពេល​នោះ​ខ្ញុំ​ក៏​បារម្ភ​ពីរ​នាក់​ប្អូន រហូត​អង្គុយ​យំ ប្អូន​បាត់​ម្តាយ​មិនដឹង​ទៅរក​ទីណា»។

កូនប្រុស​ច្បង អ្នកនាង អ៊ុំ គន្ធា រួម​តំណក់​ឈាម ជាមួយ​លោក ផាន សុផាត រូបនេះ​បាន​បញ្ជាក់​ថា៖ «ម្សិលមិញ​ខ្ញុំ​អស់​សង្ឃឹម​មិន​ដឹង​ទៅរក​ម្តាយ​នៅ​ឯណា​ក៏ ស្រាប់​តែ​ឃើញ​ព័ត៌មាន​ថា ម៉ែ​ត្រូវ​ប៉ូលិស​ចាប់។ ខ្ញុំ​ទៅ​ជួប​គាត់ និង​ធ្វើ​កិច្ចសន្យា​យក​គាត់​មក​ផ្ទះ​វិញ»៕

អត្ថបទគួរចាប់អារម្មណ៍