.jpg)
ហ្មបាញ់ទឹកងូតឲ្យដំរីនៅជំរំ Pinnawala Elephant Orphanage ប្រទេសស្រីលង្កា។ រូបថត AFP
ក្រុងកូឡុំបូ៖ ក្រុមអ្នកអភិរក្សបានឲ្យដឹងថា ការបិទប្រទេសបំណងទប់ស្កាត់វីរុសកូរ៉ូណារបស់ស្រីលង្កា បានជួយកាត់បន្ថយអត្រាស្លាប់ដែលកើតពីការវាយប្រហារគ្នារវាងមនុស្ស និងសត្វដំរី។
កំណត់ត្រាដំរី ៤០៥ ក្បាល ត្រូវបានសម្លាប់ដោយមនុស្សក្នុងប្រទេសនេះ កាលពីឆ្នាំមុន ដោយបានកើនឡើងប្រមាណ ៣៦០ ករណី ពីឆ្នាំ ២០១៨។ មនុស្សសរុប ១២១ នាក់ ត្រូវបានដំរីសម្លាប់ កើន ៩៦ ករណីពីឆ្នាំកន្លង។ នេះបើយោងតាមទិន្នន័យពីរដ្ឋាភិបាល។
ថ្លែងនៅមុនទិវាដំរីពិភពលោក នៅថ្ងៃពុធ ចាយ៉ាន់ថា ចាយ៉េវ៉ាឌេន ជាអ្នកជំនាញជាន់ខ្ពស់ផ្នែកដំរីនិយាយថា៖ «យើងអាចនិយាយថា ទំនាស់រវាងមនុស្ស និងដំរីបានធូរស្រាលបន្ដិចអំឡុងពេលដាក់បម្រាមគោចរនេះ។ ប៉ុន្ដែវាគ្រាន់តែមួយគ្រាប៉ុណ្ណោះ។ កសិករនឹងចាប់ផ្ដើមការពារដំណាំខ្លួន និងនៅតែបន្ដប្រហារដំរី»។
ដំរីដែលត្រូវបានសម្លាប់ភាគច្រើនរងនូវការបាញ់ប្រហារ ឬស៊ីថ្នាំបំពុលរបស់ប្រជាកសិករដែលព្យាយាមលុកលុយដែនដីរបស់ពួកគេ។
ដំរីត្រូវបានចាត់ទុកជាសត្វពិសិដ្ឋក្នុងដែនកោះដែលប្រជាពលរដ្ឋប្រណិប័តន៍ព្រះពុទ្ធសាសនាភាគច្រើន និងរមែងត្រូវបានការពារ តែការកាត់ទោសក៏កម្រត្រូវបានធ្វើដែរ។
ជាមធ្យម ដំរី ២៤០ ក្បាលត្រូវបានសម្លាប់រៀងរាល់ឆ្នាំ។ រូបថត AFP
មនុស្សភាគច្រើនត្រូវបានដំរីសម្លាប់ដោយសារជម្រកធម្មជាតិកាន់តែរួមតូច ដែលធ្វើឲ្យពួកវាត្រាច់ចរតាមភូមិឋានរបស់ប្រជាពលរដ្ឋ ដើម្បីស្វែងរកចំណី។
ស៊ូមីត ភីឡាភីទីយ៉ា ជាអ្នកអភិរក្ស និងអគ្គនាយនៃអគ្គនាយកកដ្ឋានសត្វព្រៃរបស់រដ្ឋាភិបាល បានប៉ាន់ប្រមាណថា ចំនួនដំរីស្លាប់បានថយចុះ ៤០ ភាគរយ អំឡុងពេលរឹតបន្ដឹងដោយសារកូរ៉ូណា ដែលចាប់ផ្ដើមតាំងពីខែមីនា និងបញ្ចប់នៅចុងខែមិថុនា។
ភីឡាភីទីយ៉ា បាននិយាយថា ជាមធ្យមដំរី ២៤០ ក្បាល ត្រូវបានសម្លាប់រៀងរាល់ឆ្នាំចន្លោះឆ្នាំ ២០១០ និងឆ្នាំ ២០១៧ ហើយអត្រានេះបានកើនឡើងជាប់រហូត។
លោកឲ្យដឹងថា៖ «ដំរីអាស៊ីត្រូវបានចាត់ទុកជាសត្វកម្រ។ ដូច្នេះ យើងមិនអាចឲ្យបាត់បង់ពួកវាបន្ថែមទៀតទេ»។
យោងតាមជំរឿនចុងក្រោយ ចំនួនដំរីស្រីលង្កា បានថយចុះមកត្រឹមប្រមាណ ៧ ពាន់ក្បាល ដែលធ្លាក់ពីចំនួន ១២ ០០០ ក្បាល កាលពីដើមទសវត្សរ៍ឆ្នាំ ១៩៩០។ លោក ភីឡាភីទីយ៉ា បានបន្ដថា ក្រុមជំនាញថ្មីដែលបង្កើតឡើងដើម្បីកាត់បន្ថយទំនាស់រវាងមនុស្ស និងដំរី នឹងកោះប្រជុំលើកដំបូងនៅទិវាដំរីពិភពលោក៕ AFP/HR
ឆ្នាំ២០១៩ មនុស្ស ១២១នាក់ត្រូវបានដំរីសម្លាប់។ រូបថត AFP
