.jpg)
បម្រាមរឹតបន្តឹងការដើរហើរតម្រូវឲ្យពលរដ្ឋនៅផ្ទះ ដែលប៉ះពាល់ដល់អ្នកមានប្រពន្ធច្រើន។ រូបថត AFP
ក្រុងកូវែត: អាប៊ូ អូតមេន មិនខុសពីបុរសកូវែតរាប់ពាន់នាក់ទៀតទេបានព្យាយាមបែងចែកពេលវេលារវាងភរិយាទាំង ២ ដោយការរស់នៅបែកផ្ទះអំឡុងពេលការបិទប្រទេសក្នុងឈូងសមុទ្រមួយនេះដើម្បីប្រយុទ្ធប្រឆាំងនឹងកូវីដ១៩។
បុរសអាយុ ៤៥ ឆ្នាំដែលមានកូន ១០ នាក់ជាតំណក់ឈាមជាមួយភរិយាទាំង ២ បានប្រាប់ AFP ថា៖ «ជីវិតខ្ញុំកាន់តែស្មុគស្មាញ។ ខ្ញុំតែងតែបែងចែកពេលវេលាជួបពួកគេឲ្យបានស្មើភាពគ្នា»។
លោកនិយាយដោយសង្កត់ធ្ងន់ថា លោកមិនដែលស្រឡាញ់ភរិយាលម្អៀងឡើយ។
ប្រទេសស្ដេចប្រេងនេះបានដាក់ចេញនូវវិធានការតឹងរ៉ឹងបំផុតក្នុងឈូងសមុទ្រពែរ្ស៍ដើម្បីប្រយុទ្ធប្រឆាំងនឹងការរីករាលដាលនៃជំងឺឆ្លងសកលដែលបានកើតឡើងប្រជាជនកូវែតជាង ១៥ ០០០ នាក់ និងឆក់យកជីវិត ១១៨ នាក់។
សប្ដាហ៍មុន កូវែត បានប្រកាសបិទប្រទេសទាំងស្រុងរហូតដល់ថ្ងៃទី ៣០ ខែឧសភាដោយផ្អាកទាំងអស់ លើកលែងតែសកម្មភាពឯកជន និងរដ្ឋចាំបាច់មួយចំនួនប៉ុណ្ណោះ។
ប្រទេសកូវែតអនុញ្ញាតឲ្យបុរសអាចរៀបការភរិយាបាន ៤ នាក់។ រូបថត AFP
អ្នកល្មើសបម្រាមដែលរួមទាំងការមិនពាក់ម៉ាស់ពេលចេញក្រៅផ្ទះ អាចរងនូវការពិន័យរហូតដល់ ១៦ ០០០ ដុល្លារ និងជាប់គុករហូតដល់ ៣ ខែ។ ប៉ុន្ដែឆ្លើយតបនឹងការអំពាវនាវយ៉ាងច្រើនពីក្រុមបុរសប្រពន្ធច្រើនដូចជា រូបលោក អាប៊ូ អូតមេន ឲ្យមានការបន្ធូរបន្ថយបម្រាមលើការធ្វើដំណើរ អាជ្ញាធរកូវែត កាលពីថ្ងៃអាទិត្យ សប្ដាហ៍មុនបានណែនាំពីការសុំសិទ្ធិពិសេសលើបណ្ដាញអេឡិចត្រូនិកចំពោះបុរសៗរៀបការប្រពន្ធលើសពីម្នាក់សម្រាប់ការធ្វើដំណើរសួរសុខទុក្ខក្រុមគ្រួសាររយៈពេល ១ ម៉ោង ឬ ២ ម៉ោងក្នុង ១ សប្ដាហ៍។
នីតិសាស្ដ្រអ៊ិស្លាមតាមបែបប្រពៃណីបានអនុញ្ញាតឲ្យបុរសរៀបការភរិយាចំនួន ៤ នាក់ដែលជាទំនៀមទម្លាប់ធ្លាប់ធានាដល់ជីវភាពរស់នៅរបស់ស្ដ្រីមេម៉ាយ និងក្មេងកំព្រាដោយឪពុកជាកងទាហានត្រូវបានសម្លាប់ក្នុងសង្គ្រាមការពារអ៊ិស្លាម។
ការរៀបការភរិយាច្រើនមិនមែនបំពេញចំណង់ផ្លូវភេទទេ ដោយលក្ខខណ្ឌតម្រូវការដ៏តឹងរ៉ឹងគឺ បុរសៗត្រូវមើលថែភរិយាទាំងអស់ឲ្យស្មើភាព និងប្រកបដោយយុត្ដិធម៌។
លោក អាប៊ូ អូតមេន បានរៀបការភរិយាដំបូងក្នុងឆ្នាំ ២០០១ និងភរិយាទី ២ ក្នុងឆ្នាំ ២០០៦។ ស្ដ្រីទាំង ២ រស់នៅបែកផ្ទះគ្នា ដែលមានចម្ងាយប្រមាណ ៤០ គីឡូម៉ែត្រភាគខាងលិចក្រុងកូវែត។
ប្រទេសកូវែតមានអត្រាបុរសប្រពន្ធច្រើនបំផុតមួយនៅឈូងសមុទ្រពែរ្ស៍ ចន្លោះឆ្នាំ ២០១០ និងឆ្នាំ ២០១៥ លើអាពាហ៍ពិពាហ៍ជាង ៨ ភាគរយ។ នេះបើយោងតាមការសិក្សាពីសំណាក់វិទ្យាស្ថានគ្រួសារអន្ដរជាតិដូហា។
លោក អាប៊ូ អាតមេន បាននិយាយថា លោកព្យាយាមយ៉ាងខ្លាំងដើម្បីធានាថា ភរិយាទាំង ២ មិនរងនូវអារម្មណ៍ឯការជាពិសេស អំឡុងពេលវិបត្ដិដែលបណ្ដាប្រទេសជាច្រើនក្នុងពិភពលោកប្រកាសបិទ។
មុនពេលអាជ្ញាធរអនុញ្ញាតឲ្យបុរសប្រពន្ធច្រើនស្នើសុំសិទ្ធិធ្វើដំណើរទៅមើលថែទាំប្រពន្ធនៅផ្ទះផ្សេង លោកបាននិយាយថា៖ «កាលពីមុនប៉ូលិសល្បាតហើយខ្ញុំត្រូវស្នើសុំច្បាប់ថាគ្រួសារមានអាសន្នទើបអាចចេញពីផ្ទះទៅជួបប្រពន្ធម្នាក់ទៀតបាន»៕ HR
