ក្រុងបាត់ដំបង៖ នាពេលថ្មីៗនេះ សង្កេតឃើញថា តាមបណ្តាញសង្គមហ្វេសប៊ុកកំពុងតែនាំគ្នាលើកយករូបចម្លាក់ឈើ ដែលរំលេចរូបក្រុមកងទ័ពជើងទឹកខ្មែរដ៏អង់អាច ដោយការប្រើប្រាស់ទូកធ្វើចម្បាំង ទៅកម្ចាត់ខ្មាំងសត្រូវ នាសម័យអង្គរ ក្រោយពីលេចចេញរូបភាពនេះ (ទូកធ្វើចម្បាំង) នៅលើយន្តហោះក្រុមហ៊ុនហោះហើរមួយនៃប្រទេសជិតខាងកម្ពុជានោះ។
ភាពលេចធ្លោនៃបណ្តុំចម្លាក់ឈើ បានធ្វើឲ្យមានការចាប់អារម្មណ៍ខ្លាំងនោះ គឺជាស្នាដៃរបស់សិល្បករចម្លាក់វ័យ ៤៥ ឆ្នាំ លោកគ្រូ គឹម សិលា មានបទពិសោធ ២០ ឆ្នាំ និងបច្ចុប្បន្ន ជានាយករងរបស់មជ្ឈមណ្ឌលបណ្តុះបណ្តាលវិជ្ជាជីវៈសិល្បៈសូនរូបមត៌កអង្គរ នៅភូមិវត្តរំដួល ឃុំចម្ការសំរោង ក្រុង និងខេត្តបាត់ដំបង។ នាពេលសព្វថ្ងៃមជ្ឈមណ្ឌលនេះកំពុងទទួលបន្ទុកបណ្តុះបណ្តាលសិស្ស ២៥ នាក់ ដែលមករៀនសូត្រជំនាញចម្លាក់ចម្លាក់ឈើ ដែលលោក គឹម សិលា បានបង្រៀន និងផ្តល់ការងារមានប្រាក់ឈ្នួលឲ្យសិស្សទាំងនោះទៀតផង ទម្រាំដល់ពួកគេអាចមានចំណេះជំនាញស្ទាត់អាចប្រកបជាអាជីវកម្មបានចន្លោះពី ៣ ខែ ទៅ ៦ ខែ។
លោកគ្រូជំនាញចម្លាក់ឈើមានវ័យ ៤៥ ឆ្នាំរូបនេះឲ្យដឹងថា៖ «ជំនាញចម្លាក់ឈើនេះ ប្រសិនបើសិស្សគាត់មានភាព ឆា្លតវៃនោះ គឺអាចចំណាយពេលរៀនសូត្រចន្លោះពេលពី ៣ ខែ អាចចេះយកទៅប្រកបរបររកស៊ីបានហើយ តែចំពោះសិស្សមិនសូវឆ្លាតវិញទាល់តែចំណាយពេលកន្លះឆ្នាំ ទើបអាចចេះយកជំនាញទៅប្រកបជាមុខរបររកស៊ីបាន»។
ចម្លាក់ឈើ ដែលលោក គឹម សិលា ជាគ្រូនៃមជ្ឈមណ្ឌលបណ្តុះបណ្តាលវិជ្ជាជីវៈសិល្បៈសូនរូបមត៌កអង្គរ បានឆ្លាក់ក្បាច់ក្បូរជាច្រើនតាមក្បួនខ្នាតនៃចម្លាក់ពីបរមបុរាណខ្មែរ ជាពិសេសចម្លាក់ដកស្រង់ចេញពីជញ្ជាំងនៃប្រាង្គប្រាសាទបុរាណខ្មែរមានដូចជាប្រាសាទបាយ័ន និងប្រាសាទអង្គរវត្ត ជាដើមដោយមានរូបសត្វ មនុស្ស និងក្រុមកងទ័ពខ្មែរ នាសម័យអង្គរ និងរូបចម្លាក់ផ្សេងៗទៀត កំពុងតែមានភាពលេចធ្លោ និងបានទាក់ទាញចំណាប់អារម្មណ៍ពីមហាជនខ្លាំង និងបានកោតសរសើរពីទឹកដៃដ៏ល្អប្រណីតនៃក្បាច់ក្បូរនៃចម្លាក់ពោរពេញដោយទេពកោសល្យសិល្បៈចម្លាក់។ របរចម្លាក់ឈើនេះដែរ លោកគ្រូ គឹម សិលា បានប្រកបជាមុខរបរចិញ្ចឹមជីវិតអស់រយៈពេល ២០ ឆ្នាំមកហើយដែរ តែក៏មិនបានធ្វើឲ្យលោកមានជីវភាពធូរធារឡើយ ដោយសារទទួលបន្ទុកចឹញ្ចឹមកូនបង្កើតចំនួន ៤ នាក់ផង និងសិស្ស ២៥ នាក់ មករៀនជំនាញ មិនត្រឹមតែអត់បង់ប្រាក់ទេ និងថែមទាំងផ្តល់ប្រាក់ឈ្នួលដល់សិស្សទាំងនោះផងដែរ ខណៈការឆ្លាក់ក្បាច់ក្បូរលើឈើក៏មិនមានភាពងាយស្រួលទេហើយត្រូវប្រើពេលវេលាយូរទៀតផង។
លោក គឹម សិលា បានបន្តឲ្យដឹងថា៖ «សម្រាប់ផ្ទាំងឈើខ្នាតតូច ដែលមានប្រវែងទទឹងទំហំ ០,៨ ម៉ែត្រ x បណ្តោយ ២ ម៉ែត្រ និងកម្រាស់ ១ តឹក យើងត្រូវចំណាយកម្លាំងមនុស្សធ្វើការប្រមាណ ១២-១៦ នាក់ ក្នុងការឆ្លាក់ ដោយសារយើងបែងចែកការរចនាក្បាច់ផ្សេងៗគ្នាជាក្រុម ហើយត្រូវចំណាយពេលចំនួន ៣ ខែ កន្លះឯណោះទើបរួច។ ឯតម្លៃពលកម្មវិញ ប្រសិនបើភ្ញៀវមានឈើខ្លួនឯងមកធ្វើនោះ យើងគិតប្រាក់ឈ្នួលត្រឹមតែ ៣ ៥០០ ដុល្លារ ខណៈប្រសិនបើភ្ញៀវទិញវិញតម្លៃ ៨ ៥០០ ដុល្លារ។
ចំណែកផ្ទាំងឈើខ្នាតធំ ដែលមានប្រវែងទទឹង ១ ម៉ែត្រ x បណ្តោយ ៣ ម៉ែត្រ និងមានកម្រាស់១,៥ តឹក វិញត្រូវប្រើពេលកន្លះឆ្នាំ ប្រសិនបើភ្ញៀវមានឈើខ្លួនឯងមកធ្វើនោះ យើងគិតប្រាក់ឈ្នួលចន្លោះប្រមាណ ៧ ០០០-៨ ០០០ ដុល្លារ ខណៈប្រសិនបើភ្ញៀវគាត់ទិញវិញតម្លៃ ១៥ ០០០ ដុល្លារ។ ចំពោះចម្លាក់រូបភាពផ្សេងៗទៀត ក៏-អាចរចនាបានផងដែរ តាមតម្រូវការរបស់អតិថិជន ហើយមានទាំងខ្នាតតូចទាំងខ្នាតធំ ហើយតម្លៃឈ្នួលវិញគឺមានចាប់ពី ៣០ ដុល្លារ រហូតដល់ ម៉ឺនដុល្លារ»៕