ក្រុងប៉េកាំង៖ ពាក់វ៉ែនតាគែមរង្វង់ខ្មៅ និងអាវយឺតពណ៌ក្រហម កុមារាចិនអាយុ ៨ ឆ្នាំ ចុះឈ្មោះកម្មវិធីរៀនសរសេរកូដអនឡាញ ក្នុងនាមជាគ្រូបង្រៀន។ វីតា បានបង្កើត ឆាណែល (Channel) បង្រៀនសរសេរកូដលើវេបសាយចិន Bilibili តាំងពីខែសីហា និងមានអ្នកគាំទ្រជិត ៦ ម៉ឺននាក់ និងអ្នកទស្សនាជាង ១ លានដង។
កុមារារូបនេះ ស្ថិតក្នុងចំណោមកុមារចិនក្នុងប្រទេស ចិន ដែលរៀនសរសេរកូដតាំងពីមុនពេលខ្លួនចូលរៀនថ្នាក់បឋមសិក្សា។ ទំនោរថ្មីនេះ ត្រូវបានឪពុកម្ដាយជឿថា ជំនាញសរសេរកូដពិតជាសំខាន់សម្រាប់យុវវ័យចិន ដែលជួយជំរុញដល់វិស័យបច្ចេកវិទ្យារបស់រដ្ឋាភិបាលចិន។
កុមារតូចបានប្រើឆាណែលវីដេអូរបស់ខ្លួន ដើម្បីទាក់ទាញសិស្ស ដែលភាគច្រើនមានអាយុច្រើនជាងខ្លួន និងឈានដល់វ័យជំទង់បន្ដិចម្ដងតាមរយៈកម្មវិធីសរសេរកូដបង្កើតឡើងដោយ Apple ឈ្មោះ Swift Playgrounds។
វីតា បានពន្យល់ថា ជួនកាលខ្លួនបង្កើតកំហុសដើម្បីបង្រៀនសិស្សឲ្យចេះបញ្ចេញបញ្ហាខុសឆ្គងទូទៅ ១ ចំនួន។ កុមារី អាយុ ៨ ឆ្នាំ រស់នៅក្នុងក្រុងស៊ាងហៃ បាននិយាយថា៖ «ពេលខ្ញុំបង្រៀន ខ្ញុំក៏រៀនអ្វីថ្មីៗស្របពេលគ្នានេះដែរ»។
ចិនបានធ្វើការវិនិយោគយ៉ាងសម្បើមលើបច្ចេកវិទ្យារ៉ូបូត និងវៃឆ្លាត (AI) ដោយរដ្ឋាភិបាលបានចេញគម្រោងអភិវឌ្ឍន៍បច្ចេកវិទ្យា (AI) ក្នុងឆ្នាំ ២០១៧ ដែលបានស្នើថា វគ្គសិក្សាអាចត្រូវដាក់បង្ហាញទាំងនៅសាលាបឋមសិក្សា និងវិទ្យាល័យ។
តម្លៃទីផ្សារអប់រំផ្នែកសរសេរកូដប្រូក្រាម សម្រាប់កុមារមាន ៧,៥ ពាន់លានយ័ន (ជាង ១ ពាន់លានដុល្លារ) ក្នុងឆ្នាំ ២០១៧ តែបន្ថែមដល់ ៣៧,៧ ពាន់លានយ័ន នៅឆ្នាំ ២០២០ ខាងមុខ។ នេះបើយោងតាម Analysys ជាក្រុមហ៊ុនវិភាគអ៊ីនធឺណិតនៅប្រទេស ចិន។
លោក ផាន ហ្គុងបូ នាយកគ្រប់គ្រងទូទៅឈ្មោះ Tongcheng Tongmei មូលដ្ឋាននៅប៉េកាំង ជាមជ្ឈមណ្ឌលអប់រំកូដ បាននិយាយថា៖ «ការអប់រំសរសេរកូដចិន ចាប់ផ្ដើមរាងយឺតយ៉ាវបើធៀបនឹងបណ្ដាប្រទេសដទៃ។ ដូច្នេះទីភ្នាក់ងារបង្រៀនគួរក្រោយម៉ោងរដ្ឋត្រូវបានបង្កើតសម្រាប់បញ្ហាខ្វះខាត»។
កុមារា ជី យីនហ្សេ អាយុ ១០ ឆ្នាំ បានរៀនភាសាកូដ Python រយៈពេលកន្លះឆ្នាំនៅទីភ្នាក់ងារនេះ។ វីតា បាននិយាយថា ខ្លួនមានក្ដីរីករាយដែលមានអ្នកគាំទ្រ។
កុមារារូបនេះ បានបញ្ជាក់ថា៖ «ការសរសេរកូដជាកិច្ចការដ៏លំបាករយៈពេលយូរ។ ប៉ុន្ដែងាយស្រួល គ្រាន់តែដោនឡូតកម្មវិធី ហើយអ្នកអាចចាប់ផ្ដើមរៀនបានភ្លាម»៕ AFP/HR