.jpg)
ក្រពើ Saturn បានរួចជីវិតការបំផ្ទុះគ្រាប់នៅសួនសត្វក្រុងប៊ែរឡាំង ឆ្នាំ១៩៤៣ និងរងរបួសអំបែងគ្រាប់សង្គ្រាមលោកលើកទី ២។ រូបថត AFP
ក្រុងមូស្គូ : ក្រពើមួយក្បាល ដែលរួចជីវិតការបំផ្ទុះគ្រាប់នៅសួនសត្វក្រុងប៊ែរឡាំង ក្នុងឆ្នាំ១៩៤៣ និងរងរបួសត្រូវអំបែងគ្រាប់ ក្រោយពីសង្គ្រាមលោកលើកទី ២ បានងាប់នៅអាយុ ៨៤ ឆ្នាំ។ នេះបើយោងតាមរបាយការណ៍ពីសួនសត្វក្រុងមូស្គូ។
សួនសត្វបានឲ្យដឹងក្នុងសេចក្ដីថ្លែងការណ៍ថ្ងៃសៅរ៍ថា ការស្លាប់របស់ក្រពោះ Saturn បានកំណត់នូវ «អវសាននៃសម័យកាល» ហើយអាយុ ៨៤ ឆ្នាំ គឺជា «អាយុដ៏គួរឲ្យគោរព» ចំពោះក្រពើមីសស៊ីស៊ីពី ជាពូជក្រពើ ដែលកម្ររស់តាមធម្មជាតិលើស ៥០ ឆ្នាំ។
កើតនៅសហរដ្ឋអាមេរិកឆ្នាំ១៩៣៦ Saturn ត្រូវបានប្ដូរមកសួនសត្វក្រុងមូស្គូ ជាទីដែលវាបានរត់គេចនៅថ្ងៃទី ២៣ ខែវិច្ឆិកា ឆ្នាំ១៩៤៣ ក្រោយពីការទម្លាក់គ្រាប់បែងដែលបានសម្លាប់ក្រពើគូកនជាច្រើនក្បាល។
ក្នុងឆ្នាំ១៩៤៦ ក្រពើនេះ ត្រូវបានប្រទះឃើញដោយទាហានអង់គ្លេស ដែលបានប្រគល់ទៅឲ្យអាជ្ញាធរសូវៀត។
ខាងសួនសត្វបានឲ្យដឹងថា ទីកន្លែងដែលវារស់នៅអំឡុងពេលមានសង្គ្រាមពិតជាអាថ៌កំបាំង។
វារស់បានដល់អាយុ ៨៤ ឆ្នាំ ខណៈក្រពើមីសស៊ីស៊ីពី ជាពូជក្រពើ ដែលកម្ររស់តាមធម្មជាតិបានលើស ៥០ ឆ្នាំ។ ។ រូបថត AFP
នៅពេល Saturn ត្រូវបាននាំមកកាន់ក្រុងមូស្គូវិញនៅខែកក្កដា ឆ្នាំ១៩៤៦ ពាក្យចចាមអារាមជាច្រើនបានលើកឡើងថា វាជាផ្នែកមួយនៃការរក្សាទុករបស់មេដឹកនាំផ្ដាច់ការ អាដុលហ្វ ហ៊ីត្លែរ។
យោងតាមមន្ត្រីសួនសត្វ បានឲ្យដឹងថា ការចិញ្ចឹមក្រពើ Saturn ដែលជាសត្វរើសចំណី និងចូលចិត្ដឲ្យគេម៉ាស្សាដោយប្រើច្រាស នោះគឺជាកិត្ដិយស របស់សួនសត្វ។
ប្រភពដដែលបានបន្ដថា៖ «វាបានមករកយើងក្រោយរំដោះលើរបបណាហ្ស៊ី និងប្រារឰខួបជ័យជម្នះ ៧៥ ឆ្នាំ»។
សេចក្ដីថ្លែងការណ៍បានចាត់ទុកកិច្ចការមើលថែក្រពើប្រវត្តិសាស្ត្រនេះ ថាជាឱកាសដ៏រីករាយមួយ ហើយមន្ត្រីសួនសត្វក៏បានបន្ថែមថា៖ «យើងរំពឹងថា យើងមិនធ្លាប់ធ្វើឲ្យក្រពើនេះខកចិត្តឡើយ»៕ AFP/HR
