The Phnom Penh Post Search

Search form




Logo of Phnom Penh Post newspaper Phnom Penh Post - ក្រមសីលធម៌​នៃ​ការ​ទទួលទាន​ល្មូន​មាន​ស្នូក​ពិបាក​នឹង​ប្រកាន់ខ្ជាប់

ក្រមសីលធម៌​នៃ​ការ​ទទួលទាន​ល្មូន​មាន​ស្នូក​ពិបាក​នឹង​ប្រកាន់ខ្ជាប់

សត្វកន្ធាយ​ចិញ្ចឹម​នៅក្នុង​អាង​សម្រាប់​ចម្អិន​លក់​នៅ​ភោជនីយដ្ឋាន​ក្នុង​រាជធានី​ភ្នំពេញ​។
សត្វកន្ធាយ​ចិញ្ចឹម​នៅក្នុង​អាង​សម្រាប់​ចម្អិន​លក់​នៅ​ភោជនីយដ្ឋាន​ក្នុង​រាជធានី​ភ្នំពេញ​។ រូបថត Eli Meixler

ក្រមសីលធម៌​នៃ​ការ​ទទួលទាន​ល្មូន​មាន​ស្នូក​ពិបាក​នឹង​ប្រកាន់ខ្ជាប់

ភ្នំពេញ: ហាង​បោះដុំ​គ្រឿងសមុទ្រ L&F Seafood ដ៏ធំ​នៅលើ​ផ្លូវ​លេខ​៩៥ ដែល​មាន​លក់​គ្រឿងសមុទ្រ​គ្រប់​ប្រភេទ​ចាប់ពី​ក្ដាម​រហូត​ដល់​ត្រី​តុកកែ​។ នៅក្នុង​អាង និង​ធុង​ស្ដុក​នានា ត្រីសមុទ្រ កំពុង​ហែល​ឆ្វែលឆ្វាត់ ខណៈ​ប្រភេទ​អណ្ដើក​កន្ធាយ​រាប់​សិប​ក្បាល​បណ្ដែត​ខ្លួន​ឃើញ​ស្នូក​ឡឹមៗ​។

លោក វៃ វ៉ាត់ (Wei Vat) ជា​បេឡាករ​បាន​ពន្យល់​ថា ទាំងនេះ​គឺជា​ប្រភេទ​កន្ធាយ​ទឹកសាប ដែល​លោក​អាច​លក់​ដោយ​ស្រប​ច្បាប់។

បុគ្គលិក L&F Seafood រៀបចំ​ដួស​កន្ធាយ​ចេញ​ពី​អាង​។
បុគ្គលិក L&F Seafood រៀបចំ​ដួស​កន្ធាយ​ចេញ​ពី​អាង​។ រូបថត Eli Meixler

អតិថិជន​របស់​លោក​ភាគច្រើន​ជា​ជនជាតិ​ខ្មែរ និង​វៀតណាម ពេល​ខ្លះ​បាន​សួរ​រក​ប្រភេទ​អណ្ដើក​ផ្សេង​ទៀត ជាពិសេស អណ្ដើក​ក្រមួន ដែល​ក្បួន​ឱសថ​ចិន​ចែង​ថា​អាច​ប៉ូវ​ក្រលៀន។

លោក​បាន​អះអាង​ថា​៖ «​ទេ! រដ្ឋបាល​ជលផល​មក​ត្រួតពិនិត្យ​ពី​២​ទៅ​៣​ដង​ក្នុង​មួយ​ឆ្នាំ ហើយ​ពួកគេ​នឹង​រឹបអូស​យក​ទាំងអស់​ក្រៅ​ពី​ប្រភេទ​កន្ធាយ​ចិញ្ចឹម​»។

ការ​ជួញដូរ​សត្វអណ្ដើក​គឺជា​ទង្វើ​ខុសច្បាប់​ក្នុង​ប្រទេស​កម្ពុជា ខណៈ​ដែល​អណ្ដើក​៦​ក្នុង​ចំណោម​១៤​ប្រភេទ​កំពុង​ប្រឈម​នឹង​ការ​ផុតពូជ​។ ជម្រើស​ដ៏ល្អ​បំផុត​ដើម្បី​សម្រប​ទៅ​តាម​ច្បាប់​គឺ​ត្រូវ​នាំ​ចូល ឬ​ទិញ​ពី​អ្នក​ចិញ្ចឹម​មាន​អាជ្ញាប័ណ្ណ​។ ជំនួញ​ដ៏​កាក់កប​ដែល​ផ្ដើម​លក់​ពី​ភោជនីយដ្ឋាន​តូចៗ​ក្នុង​ខេត្ដ​បន្ដ​ទៅ​ដល់​ទីផ្សារ​ត្រី​នៅ​ក្រុង​ហុងកុង​បាន​ធ្វើឲ្យ​សត្វល្មូន​ស្នូក​ទាំងនេះ​មាន​តម្លៃ​កាន់តែ​ខ្ពស់។

អង្គការ​សង្គម​អភិរក្ស​សត្វព្រៃ រួម​ជាមួយ​អាជ្ញាធរ​មូលដ្ឋាន ថ្មីៗ​នេះ​បាន​សង្គ្រោះ​អណ្ដើក​២៣​ក្បាល​ជិត​ផុតពូជ​ក្នុង​ខេត្ដ​មណ្ឌលគិរី​។

លោក អាឡិច ឌីមិន (Alex Diment) មន្ដ្រី​សម្របសម្រួល​បច្ចេកទេស​ជាន់ខ្ពស់​ប្រចាំ​នៅ​អង្គការ​នេះ​បាន​ថ្លែង​ថា៖ «​អណ្ដើក​ទាំងនោះ​ទំនង​ជា​ត្រូវ​បាន​គេ​បញ្ជូន​ទៅកាន់​ប្រទេស​វៀតណាម ពីព្រោះ​ពួកវា​ត្រូវ​បាន​សង្គ្រោះ​នៅ​ចម្ងាយ​ប៉ុន្មាន​គីឡូម៉ែត្រ​ពី​ព្រំដែន​ប៉ុណ្ណោះ​»។

នៅក្នុង​កសិដ្ឋាន​ចិញ្ចឹម​អណ្ដើក​ដែល​មាន​ទទួល​អាជ្ញាប័ណ្ណ និង​សិទ្ធិ​បង្កាត់ពូជ​កម្រ​មួយ​ចំនួន សត្វ​ខុស​ច្បាប់​អាច​ត្រូវ​បាន​ដាក់​លក់​បញ្ចូល​គ្នា​ជាមួយ​សត្វ​ចិញ្ចឹម​។ បន្ទាប់មក ពួកវា​ត្រូវ​បាន​រត់ពន្ធ​យក​ទៅ​លក់​នៅ​តាម​បណ្ដា​ទីផ្សារ​នានា​ក្នុង​ទីក្រុង​ហុងកុង ចិនដីគោក និង​ប្រទេស​ផ្សេងៗ​ក្នុង​តំបន់​អាស៊ីប៉ាស៊ីហ្វិក​។

លោក ធីម ម៉ាក់ខ័រម៉ាក់ (Tim McCormack) មន្ដ្រី​សម្របសម្រួល​កម្មវិធី​នៅ​អង្គការ Asia Turtle Programme ប្រចាំ​នៅ​ទីក្រុង​ហាណូយ បាន​និយាយ​ថា​៖ «​ពួកគេ​ប្រហែល​ជា​អាច​បង្កាត់​ពូជ​អណ្ដើក​ស្រប​ច្បាប់​ក្នុង​ចំនួន​តិចតួច​បំផុត ប៉ុន្ដែ​មិន​អាច​ផ្គត់ផ្គង់​តម្រូវការ​ទីផ្សារ​បាន​ឡើយ​»។

លោក​បាន​បន្ដ​ថា កង្វះ​ចន្លោះ​នៃ​ការ​ផ្គត់ផ្គង់​ត្រូវ​បាន​ដោះស្រាយ​ដោយ​ការ​នេសាទ​ខុស​ច្បាប់​។

លោក​បាន​បន្ថែម​ថា​៖ «​វា​ពិតជា​ពិបាក​ណាស់​ក្នុង​ការ​អនុវត្ត​ច្បាប់​លើ​កសិដ្ឋាន​ចិញ្ចឹម​សត្វ​ទាំងនេះ​ពីព្រោះ​វា​មិន​ងាយ​សម្គាល់​លើ​សត្វ​នីមួយៗ​ក្នុង​កសិដ្ឋាន​នោះ​ទេ លុះត្រាតែ​មាន​អ្នក​ស្គាល់​ពី​ពូជ​អណ្ដើក​ច្បាស់​»។

ដូច្នេះ​ហើយ​លោក​ក៏​បាន​បង្ហាញ​ទស្សនៈ​ថា៖ «គួរ​កុំ​បរិភោគ​អណ្ដើក ឬ​កន្ធាយ​គ្រប់​ប្រភេទ​។ បើ​មាន​ការ​លក់​ដូរ​សត្វ​ទាំងនេះ មនុស្ស​អាច​យល់​ថា គ្រប់​ពូជអណ្ដើក កន្ធាយ​ទាំងអស់​សុទ្ធតែ​អាច​បរិភោគ​បាន»។

លោក ស៊ុន យឿង ប្រធាន​គម្រោង​នៃ​អង្គការ​អភិរក្ស​អន្ដរជាតិ បាន​ឲ្យ​ដឹង​ថា បើ​ទោះបី​ជា​សត្វ​កន្ធាយ​អាស៊ី​ដែល​លក់​លើ​ទីផ្សារ​មាន​ចំនួន​សន្ធឹកសន្ធាប់​យ៉ាង​ណា​ក៏ដោយ ក៏​យ៉ាង​ហោច​ណាស់​ពូជ​ប្រភេទ​នេះ​ត្រូវ​បាន​បាត់បង់​។ នៅ​មជ្ឈមណ្ឌល​អភិរក្ស​សត្វ​អណ្ដើក​ទន្លេ​មេគង្គ​របស់​លោក​ក្នុង​ខេត្ដ​ក្រចេះ លោក យឿង បាន​សហការ​ជាមួយ​អារាម​មួយ​ដើម្បី​សង្គ្រោះ និង​លែង​កន្ធាយ កង្កែប ដែល​គេ​សន្និដ្ឋាន​ថា​បាន​ផុត​ពូជ​ពី​កម្ពុជា​រហូត​ពួក​វា​ត្រូវ​បាន​រកឃើញ​ក្នុង​ឆ្នាំ​២០០៧​។

លោក ណៅ ធួក ប្រធាន​រដ្ឋបាល​ជលផល បាន​ថ្លែង​ថា ការ​ចាប់​សត្វអណ្ដើក​ព្រៃ​អាច​ជាប់​ទោសទណ្ឌ​រហូត​ដល់​១​ឆ្នាំ និង​ពិន័យ​ជា​ប្រាក់​ជាង​៥​លាន​រៀល​។ យ៉ាងណា​មិញ លោក​ទទួល​ស្គាល់​ថា ច្បាប់​ការពារ​សត្វ​ទាំងនេះ​កម្រ​ត្រូវ​បាន​អនុវត្ដ​ណាស់​។

ត្រឡប់​ទៅ​កាន់​ហាង​លក់​គ្រឿងសមុទ្រ L&F Seafood ឯ​ភ្នំពេញ​វិញ លោក វ៉ាត បាន​បន្ដ​ថា លោក​តែងតែ​ព្យាយាម​ចង្អុល​បង្ហាញ​អតិថិជន​ពី​កន្លែង​ចិញ្ចឹម​ផ្ទាល់​នៅពេល​ពួកគេ​កុម្ម៉ង់​សត្វ​ខុស​ច្បាប់​។

លោក​បញ្ជាក់​ថា​៖ «​នៅពេល​ភ្ញៀវ​មក​សួរ​រក​ទិញ ហើយ​ខ្ញុំ​បាន​ប្រាប់​វិញ​ថា យើង​មាន​លក់​តែ​កន្ធាយ​ចិញ្ចឹម​បែប​ធម្មជាតិ​ប៉ុណ្ណោះ»៕ HR

អត្ថបទគួរចាប់អារម្មណ៍