ក្រុងឡុងដ៍: វិទ្យុដើរដោយថាមពលខ្យល់ រូបថតពណ៌ធម្មជាតិប៉ុន្មានសន្លឹក និងសៀវភៅរលោងៗប៉ុន្មានក្បាល ទាំងនេះគឺជាទិដ្ឋភាព ដែលកញ្ញា ម៉ាហ្គារ៉េត ហ្គាល់ឡាហ្គ័រ បន្សល់ទុកដល់សម័យទំនើបនេះ។
ពេញមួយជីវិត ៧៧ ឆ្នាំ កញ្ញា ហ្គាល់ឡាហ្គ័រ រស់នៅក្នុងខ្ទមស្បូវចំណាស់ ២០០ ឆ្នាំ នៅអៀរឡង់ខាងជើង ដោយអត់មានទឹកម៉ាស៊ីន និងអគ្គិសនី ប្រើប្រាស់ក្នុងផ្ទះឡើយ។
វាជាការរស់នៅផ្ទុយពីជីវិតសម័យទំនើប តែកញ្ញា ហ្គាល់ឡាហ្គ័រ បាននិយាយពេលកញ្ញាបង្ហោះថ្មភ្នំពណ៌សថា៖ «ខ្ញុំអត់ដឹងពីអ្វីទាំងអស់ ក្រៅពីអ្វីដែលជីវភាពខ្ញុំកំពុងរស់នៅពេលនេះ។ ដូច្នេះ អ្នកមិននឹកនាដល់អ្វីដែលអ្នកមិនធ្លាប់ឃើញឡើយ»។
ក្រុមគ្រួសារដ៏ជិតដិតបំផុតរបស់កញ្ញា រស់នៅទីនេះតាំងពីជីតាកញ្ញាមកពីទឹកដីអាមេរិកក្នុងឆ្នាំ ១៨៨៧។
ស្ថិតនៅទីជនបទនៃតំបន់ County Fermanagh ខ្ទមទំហំ ១៣ គុណ ៧ ម៉ែត្រ ត្រូវបានបែងចែកជា ៣ បរិវេណ គឺបន្ទប់ដេក ២ និងផ្ទះបាយ ១។ មិនថាមានរឿងអ្វីកើតឡើង ផ្ទះខ្ទមទាំងមូលត្រូវបានផ្ដល់កម្ដៅដោយចង្ក្រានឡសង់ឡើងពីឥដ្ឋ បង្ហុយផ្សែងតាមបំពង់ពណ៌ខៀវ។
រៀងរាល់ព្រឹក កញ្ញាត្រូវបានដាស់ឲ្យភ្ញាក់នៅម៉ោង ៥ ដោយសំឡេងបក្សី ដែលនាំគ្នាមកទំលើគែមមាត់បង្អួចដើម្បីរង់ចាំស៊ីចំណី។
កញ្ញាវ័យជិត ៨០ ឆ្នាំ រូបនេះបានប្រាប់ថា៖ «សំណាងណាស់ ខ្ញុំមិនមែនជាអ្នកពូកែដេក»។
បន្ទាប់មក ស្ដ្រីចំណាស់រូបនេះ ចាប់ផ្ដើមសកម្មភាពប្រចាំថ្ងៃ ដោយទៅដងទឹកពីអណ្ដូងក្បែរខាង ពុះអុស និងប្រើរុក្ខជាតិងាប់រលួយជំនួសប្រេង ព្រមទាំងចម្អិនអាហារមួយថ្ងៃ ៣ ពេលលើឡកម្ដៅពីបរមបុរាណ ដែលផ្ដល់ភ្លើងបំភ្លឺក្នុងផ្ទះបន្ថែមលើពន្លឺចង្កៀងប្រេង និងទៀន។
ក្រោយចំណាយពេលមួយព្រឹកដុតនំ កញ្ញាបានបន្តថា៖ «នេះជាការរស់នៅរបស់ខ្ញុំ។ ខ្ញុំរីករាយនឹងជីវិតបែបនេះ»។ កញ្ញា ហ្គាល់ឡាហ្គ័រ អត់ធ្លាប់បានរៀបការ តែមិនមែនមានន័យថា កញ្ញាជាមនុស្សឯកោនោះទេ។
កញ្ញាបានបញ្ជាក់ថា៖ «វាមានលក្ខណៈខុសគ្នាស្រឡះរវាងរស់នៅឯកោ និងរស់នៅតែឯង។ ខ្ញុំនៅតែឯង តែខ្ញុំមិនឯកោទេ»៕ AFP/HR