ក្រុងសេអ៊ូល៖ នៅលើកម្រាលព្រំបៃតងដ៏សន្ធឹងសន្ធៃនៃតំបន់ភាគខាងត្បូងប្រទេសកូរ៉េខាងត្បូង សត្វក្រសារយក្ស ១ ក្បាល រចនាឡើងពីដើមសន្ទូងស្រូវ ដែលលើកទឹកចិត្ដឲ្យមាន «ភាពស្រស់បំព្រងឡើង» ខណៈប្រទេសកំពុងប្រយុទ្ធប្រឆាំងនឹងវីរុសកូរ៉ូណា។
ពាក្យស្លោកក្នុងក្រុងស៊ុនឈឺន ចម្ងាយ ៣២០ គីឡូម៉ែត្រភាគខាងត្បូងក្រុងសេអ៊ូល ផ្គុំឡើងពីដើមស្រូវច្រើនប្រភេទ ដែលដាំចេញជារូបរាងអក្សរ ពេលទស្សនាពីលើវេហាស៍ ទោះបីជាទស្សនីយភាពដ៏ស្រស់ស្អាតមិនអាចមើលឃើញពីដីយ៉ាងណាក៏ដោយ។
រូបភាពជាច្រើនសន្លឹក ជាកិច្ចខិតខំប្រឹងប្រែងប្រចាំឆ្នាំ ត្រូវបានរៀបចំឡើង និងដាំដោយកុមារ រួមទាំងប្រជាកសិករក្នុងស្រុកជាច្រើននាក់។
អមជាមួយរូបភាពសត្វក្រសារ សត្វអណ្ដើកមាសតំណាងឲ្យកសិកម្មបៃតង ជាចំនួនសត្វដែលមានការធ្លាក់ចុះខ្លាំងពេលកសិករប្រើថ្នាំគីមីច្រើន។
រូបភាពផ្សេងៗ រួមមាន ក្រសារ ១ ក្បាលផ្សេង និងត្រី ១ ក្បាល ដែលជាសត្វតំណាងអ្នកស្រុក ព្រមទាំងរូបកសិករភ្ជួរដីជាមួយគោ ១ នឹម។
ទីងមោងមិនតិចជាង ៥០០ គ្រងឈុតហានប៊ុកប្រពៃណីកូរ៉េ ត្រូវបានដាក់ពង្រាយនៅជុំវិញស្រែ ដើម្បីទប់ទល់នឹងការបំផ្លិចបំផ្លាញរបស់បក្សីស្រែកឃ្លាន។
គម្រោងនេះត្រូវចំណាយពេលជាច្រើនខែ។ នេះបើយោងតាមកសិករវ័យ ៦៣ ឆ្នាំ ឈ្មោះ យុន យ៉ាំងស៊ូ។
លោកនិយាយថា៖ «សិស្សសាលាបឋម និងវិទ្យាល័យ ពលរដ្ឋរស់នៅក្រុង រួមទាំងពាណិជ្ជករជាច្រើនរូបទៀត បានមកជួបជុំគ្នាចាប់ផ្ដើមរចនាសួនវាលស្រែតាំងពីដើមរហូតដល់បញ្ចប់រដូវប្រមូលផល»៕ AFP/HR