.jpg)
លោក ស៊ឹម សត្តា ប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ បន្ទាប់ពីមានចំណាត់ការលើករណីលួចចម្លងស្នាដៃបទចម្រៀងរបស់កវីម្ចាស់ដងស្ទឹងសង្កែលោក គង្គ ប៊ុនឈឿន និងមានការគាំទ្រជាច្រើនពីសំណាក់ប្រជាពលរដ្ឋខ្មែរ នាពេលនេះក្រសួងវប្បធម៌កំពុងរៀបចំដំណើរការក្នុងការកោះហៅគ្រប់បណ្តាផលិតកម្មទាំងអស់មកអប់រំណែនាំពីតម្លៃនៃសិល្បៈខ្មែរក៏ដូចជាបញ្ឈប់ជាបន្ទាន់នូវការចម្លងស្នាដៃមរតកដើមដោយការកែប្រែខ្លឹមសារដើម និងគ្មានការអនុញ្ញាត។
លោក ស៊ឹម សត្តា ប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែលនៃក្រសួងវប្បធម៌ និងវិចិត្រសិល្បៈបានប្រាប់ភ្នំពេញ ប៉ុស្តិ៍ ឲ្យដឹងថា៖ «ជាជំហានដំបូងនេះបើទទួលបានការឯកភាពពីថ្នាក់ដឹកនាំ យើងនឹងកោះហៅរាល់ផលិតកម្មទាំងអស់មកអប់រំឲ្យពួកគាត់ចូលរួមការអនុវត្តឲ្យយល់ថា នរណាជាម្ចាស់សិទ្ធិ នរណាជាអ្នកនិពន្ធក្នុងក្របខ័ណ្ឌ។ ការប្រើប្រាស់ពួកគាត់ត្រូវសុំសិទ្ធិពីអ្នកនិពន្ធ»។
លោកបញ្ជាក់ថា៖ «ក្រសួងនឹងឲ្យពួកគាត់សុំទោសជាសាធារណៈ និងធ្វើកិច្ចសន្យាបញ្ឈប់បន្ទាន់នូវសកម្មភាពរំលោភបំពាន។ ជាពិសេសគាត់បានយកស្នាដៃដែលមានម្ចាស់យកទៅកែប្រែខ្លឹមសារដើមប៉ះពាល់ដល់កេរ្តិ៍ឈ្មោះកិត្តិយសរបស់អ្នកនិពន្ធក៏ដូចជាកេរ្តិ៍ឈ្មោះរបស់ស្ថាប័នដែលជាអ្នកគ្រប់គ្រង»។
ភរិយារបស់លោក គង្គ ប៊ុនឈឿន។ រូបថត យូសុះ អាប់ឌុលរ៉ាស់ហ៊ីម
ទាក់ទងនឹងបញ្ហានេះកញ្ញា រឿន ម៉ាលិះ ជាបុគ្គលិកក្រុមហ៊ុនឯកជនយល់ឃើញថាការកោះហៅគ្រប់បណ្តាផលិតកម្មមកអប់រំកែប្រែគឺជារឿងល្អ។
កញ្ញាលើកហេតុផលថា៖ «ព្រោះនេះគឺជាការផ្តល់តម្លៃទៅដល់សិល្បៈខ្មែរដោយសារតែបទចម្រៀងមរតកដើមទាំងអស់អ្នកនិពន្ធបទភ្លេង និងទំនុកច្រៀងបានចំណាយទាំងកម្លាំងកាយ និងកម្លាំងចិត្តទម្រាំនឹងសម្រេចបានផលិតផលនីមួយៗ»។
រីឯយុវជន ស៊ឺម វាសនា ដែលសិក្សាឧបករណ៍តន្ត្រីបុរាណរនាតឯកនៅសាកលវិទ្យាល័យភូមិន្ទវិចិត្រសិល្បៈបានបញ្ជាក់ថា៖ «ទោះបីខ្ញុំរៀនផ្នែកបុរាណមែន តែខ្ញុំអាចនិពន្ធបទសម័យ ហើយនិងនិពន្ធបទបុរាណមួយចំនួនដែរ។ បើនិពន្ធចេញពីបេះដូងខ្ញុំផ្ទាល់ហើយ ហើយបើមានជនណាមួយចម្លងយកទៅដោយមិនមានសុំការអនុញ្ញាតខ្ញុំពិតជាឈឺចាប់ខ្លាំងណាស់»។
លោក ស៊ឹម សត្តា បង្ហាញជំហរថា៖ «ដើម្បីរួមចំណែកឲ្យប្រទេសជាតិយើងមានការរីកចម្រើនសម្បូរទៅដោយស្នាដៃថ្មី និងផលិតផលស្នាដៃថ្មីៗដាក់លក់នៅទីផ្សារអន្តរជាតិដែលផលិតផលនោះតំណាងឲ្យអត្តសញ្ញាណជាតិ មុខមាត់ប្រទេសជាតិ យើងត្រូវតែចាត់វិធានការឲ្យក្តៅគគុក ដើម្បីឲ្យច្បាប់សិទ្ធិអ្នកនិពន្ធ និងសិទ្ធិប្រហាក់ប្រហែលមានភាពល្អប្រសើរទៅថ្ងៃអនាគត»៕
វីដេអូ
