.jpg)
ស្ថានភាពចរាចរណ៍ក្នុងក្រុងនៅកុងហ្គោជាបញ្ហាចោទដ៏ស្មុគស្មាញបំផុត។ រូបថត AFP
ក្រុងគីនសាសា: ស្ទើរតែគ្រប់ក្រុងសុទ្ធតែជួបបញ្ហាការដឹកជញ្ជូន។ តែការធ្វើដំណើរប្រចាំថ្ងៃរបស់ពលរដ្ឋទីក្រុងគីនសាសានៃសាធារណរដ្ឋប្រជាធិបតេយ្យកុងហ្គោ ទំនងជាអាចគ្រងតំណែងក្រុងដឹកជញ្ជូនដ៏អាក្រក់បំផុតក្នុងលោក។
ក្នុងទីក្រុងដែលមានប្រជាជន ១៣ លាននាក់ការធ្វើដំណើរទៅបំពេញការងារគឺជាកិច្ចការដ៏ស្មុគស្មាញមួយដោយពួកគេត្រូវជម្នះលើដងវិថីរន្ធបាយខុម និងការកកស្ទះពីសំណាក់ឡានក្រុង រថយន្ដតាក់ស៊ីពណ៌លឿង និងម៉ូតូឆ្វេកឆ្វាច រួមទាំងសំឡេងស៊ីផ្លេកងរំពង បរិស្ថានកខ្វក់ និងគ្រោះថ្នាក់ដ៏ញឹកញយ។
សរុបមកវាជានរកនៃការដឹកជញ្ជូន និងស្ថិតក្នុងឡកម្ដៅ។ ពេលស្ទះខ្លាំង អ្នកដំណើរថាំចិត្ដនឹងជិះឡានក្រុង និងឡានតាក់ស៊ីពណ៌លឿងដែលប្រជ្រៀតគ្នា និងហិតក្លិនខ្លួនគ្នាពេញឡាន។
និស្សិតច្បាប់ អេស្ពេរ៉េន កាសាម៉ា បាននិយាយថា៖ «រៀងរាល់ថ្ងៃយើងប្រជ្រៀតគ្នាសំប៉ែតដូចសាំងវីច។ គ្រាន់តែធ្វើដំណើរហត់ចង់ដាច់ខ្យល់»។ នៅម៉ោងមមាញឹកបំផុត រថយន្ដលើដងវិថីមិនអាចបង្កើនល្បឿនលើសពី ១០ គីឡូម៉ែត្រក្នុង ១ ម៉ោងឡើយ។
មិនខុសពីទីក្រុងធំរបស់ប្រទេសអាហ្វ្រិក ២ ទៀត គែរ និងឡាហ្គូស ទីក្រុងគីនសាសា មិនអាចដោះស្រាយបញ្ហាប្រឈមទាំង ២ គឺកំណើនប្រជាជន និងហេដ្ឋារចនាសម្ព័ន្ធដ៏អន់ខ្សោយ។
កិច្ចការនេះកាន់តែលំបាកនៅប៉ុន្មានឆ្នាំខាងមុខ អំឡុងឆ្នាំ ២០៣០ ក្រុងគីនសាសានឹងក្លាយជាទីក្រុងយ៉ាប់យ៉ឺនបំផុតទី ១០ ក្នុងលោក។
កង្វះបណ្ដាញប្រព័ន្ធរថភ្លើង ទីក្រុងនេះត្រូវពឹងអាស្រ័យលើផ្លូវថ្នល់ទាំងស្រុង។ លោកប្រធានាធិបតី Felix Tshisekedi បានបង្ហាញគម្រោងយក្សចំពោះការកសាងផ្លូវអាកាសបណ្ដែតលើទន្លេកុងហ្គោ តែប្រែជារងនូវការរិះគន់ដោយចោទពីការរំលោភសម្បត្ដិសាធារណៈ៕ HR
