.jpg)
ទិដ្ឋភាពពីលើអាកាសនៃឆ្នេរក្នុងទីក្រុងរីយ៉ូកាលពីខែមីនា។ រូបថត AFP
ក្រុងរីយ៉ូ៖ បំណងទប់ស្កាត់កូវីដ ១៩ អភិបាលក្រុងរីយ៉ូ បានប្រកាសកាលពីថ្ងៃចន្ទថា ក្រុងឆ្នេរនិមិត្តរូបប្រេស៊ីល នឹងតម្រូវឲ្យអ្នកដេកសំដិលថ្ងៃរក្សាគម្លាតសុវត្ថិភាព និងកក់ចន្លោះបរិវេណរវាងគ្នានៅលើឆ្នេរជាមុនតាមរយៈកម្មវិធីទូរស័ព្ទ។
លោក ម៉ាសេឡូ គ្រីវេលឡា និយាយថា ឆ្នេរល្បីៗលំដាប់ពិភពលោករបស់ទីក្រុងរីយ៉ូ អាចត្រូវបើកដំណើរការពេញលេញឡើងវិញបាន លុះត្រាតែទីកម្សាន្ដទាំងនេះ មានការបែងចែកភ្ញៀវឲ្យឃ្លាតឆ្ងាយពីគ្នា។
ប៉ុន្ដែការអនុវត្ដវិធានការអាចបង្កការលំបាកក្នុងទីក្រុងដែលឆ្នេរធ្លាប់ពោរពេញដោយក្រុមមនុស្សនាប៉ុន្មានសប្ដាហ៍ចុងក្រោយ ទោះមានការគំរាមពិន័យប្រាក់ ២០ ដុល្លារក្ដី។
លោក គ្រីវេលឡា ថ្លែងក្នុងសន្និសីទកាសែតថា៖ «មនុស្សម្នានឹងអាចមកលេងតំបន់នោះ ដោយអាស្រ័យលើពេលវេលាដែលបានកក់ទុកតាមរយៈកម្មវិធីទូរស័ព្ទ។ យើងអាចរៀបចំឲ្យកាន់តែមានសុវត្ថិភាព»។
អាជ្ញាធរក្រុងរីយ៉ូ បានបិទឆ្នេរនានាកាលពីខែមិនា ដើម្បីប្រយុទ្ធប្រឆាំងនឹងការរីករាលដាលនៃវីរុសកូរ៉ូណា ដែលបានសម្លាប់មនុស្សជាង ១០ ម៉ឺននាក់ ក្នុងប្រទេសប្រេស៊ីល ជាអត្រាស្លាប់ច្រើនបំផុតលំដាប់ទី២ បន្ទាប់ពីអាមេរិក។
ទិដ្ឋភាពភ្ញៀវមកលេងឆ្នេរអុីប៉ាណេម៉ា ក្រុងរីយ៉ូ កាលពីខែធ្នូ ឆ្នាំ ២០១៩។ រូបថត AFP
អភិបាលរដ្ឋ រីយ៉ូ លោក វីលសុន វីតហ្សេល បានសារភាពថា វិធានការសុវត្ថិភាពនេះបានប្រឆាំងនឹងក្រុមអ្នកស្រឡាញ់ឆ្នេរ។ ជាមួយអត្រាមរណៈជាង ១៤ ០០០ នាក់ រដ្ឋរីយ៉ូ បានរងនូវផលប៉ះពាល់ខ្លាំងពីវីរុសច្រើនជាងតំបន់ផ្សេងៗ លើកលែងតែក្រុងសៅប៉ូឡូ។ កាលពីថ្ងៃទី ៣១ ខែកក្កដា លោក គ្រីវេលឡា បើកមហាសមុទ្ររីយ៉ូឡើងវិញសម្រាប់អ្នកនិយមហែលទឹក តែការអង្គុយលើឆ្នេរត្រូវមានកំណត់។
ទោះយ៉ាងណា មនុស្សម្នាជាច្រើននាំគ្នាសម្រុកមកឆ្នេរនានា ដូចជា ឆ្នេរ កូប៉ាកាបាណា និងអ៊ីប៉ាណេម៉ា ប៉ុន្មានសប្ដាហ៍ចុងក្រោយនេះ បំណងដេកសំដិលថ្ងៃ និងទស្សនាភ្នំបៃតងចាំងឆ្លុះផ្ទៃសមុទ្រខៀវខ្ចី។
លោកមិនបានកំណត់កាលបរិច្ឆេទបើកទទួលភ្ញៀវឡើងវិញឡើយ ដោយនិយាយថា មន្ដ្រីនឹងផ្ដល់ព័ត៌មានលម្អិតបន្ថែម។ ខែកក្កដា អភិបាលក្រុងឲ្យដឹងថា លោកអនុញ្ញាតឲ្យតែភ្ញៀវមកលេងឆ្នេរនេះវិញពេលមានវ៉ាក់សាំងប៉ុណ្ណោះ។
គោលដៅឆ្នេរធ្វើពិសោធជាមួយបច្ចេកវិទ្យាដើម្បីបើកដំណើរការវិញ។ អេស្ប៉ាញកំពុងប្រើដ្រូន បែលហ្ស៊ិក ប្រើសេនស័រ និងប្រព័ន្ធតាមដានទីតាំងទូរស័ព្ទ ហើយប្រទេសផ្សេងៗទៀតស្នើឲ្យទេសចរកក់កន្លែងតាមវេបសាយ ឬកម្មវិធីទូរស័ព្ទ៕ AFP/HR
ឪពុកមានកូនស្លាប់ដោយសារកូវីដ រៀបចំកម្មវិធីកាន់ទុក្ខលើឆ្នេរ។ AFP
