.jpg)
សៀក ពិសិដ្ឋ និងកញ្ញា ស្រេន ណាស៊ីម៉ះ ក្នុងកម្មវិធី i-ENVEX 2018 នៅម៉ាឡេស៊ី និងកម្មវិធី MENA រកឃើញ។ រូបថត សហការី
ភ្នំពេញៈ ក្រោយពីខិតខំស្រាវជ្រាវបង្កើតកម្មវិធីថ្មីសម្រាប់កុំព្យូទ័រដោយប្រើប្រាស់បច្ចេកវិទ្យា AI (Artificial intelligence) ជាមូលដ្ឋានដើម្បីបង្កើតកម្មវិធីជំនួយពិសេសមួយមានឈ្មោះថា NU Speech Assistance ឬហៅ MENA មានតួនាទីសំខាន់ដែលអាចស្គាល់ពីអារម្មណ៍របស់មនុស្ស និងមានភាពឈ្លាសវៃក្នុងការបង្កភាពងាយស្រួលច្រើនដល់មនុស្សគ្រប់ប្រភេទរួមទាំងជនពិការផងដែរ។
ក្រោមការជួយឧបត្ថម្ភពីសាលាលោក លុយ មិថុនា ជាសាស្ត្រាចារ្យដឹកនាំក្រុមនិស្សិតខ្មែរផ្នែកព័ត៌មានវិទ្យានៃសាកលវិទ្យាល័យន័រតុនចំនួន ៦ គម្រោងទៅចូលកម្មវិធីប្រកួតនៅឯប្រទេសម៉ាឡេស៊ីគឺ i-ENVEX 2018 កាលពីខែមេសា ឆ្នាំ២០១៨ កន្លងមកដែលមាន ១៦ ប្រទេសចូលរួមហើយជាលទ្ធផលបានរង្វាន់ ២ មកវិញ។
លោក លុយ មិថុនា លើកឡើងកាលពេលដឹកនាំក្រុមនិស្សិតព័ត៌មានវិទ្យាឆ្នាំទី ២ សាកលវិទ្យាល័យន័រតុនចូលរួមនោះថា៖ «កម្មវិធី i-ENVEX 2018 មានចំនួន១ ប្រទេស ទូទាំងពិភពលោក និងមាន ៤០៨ គម្រោងនៃសមិទ្ធផលរបស់និស្សិត ខណៈកម្ពុជាយើងដែលខ្ញុំដឹកនាំទៅនោះមានចំនួន ៦ គម្រោង។ ជាចុងក្រោយក្រុមនិស្សិតយើងបានរង្វាន់ ២ ចំពោះកម្មវិធី MENA ដែលបង្កើតឡើងនិស្សិតប្រុសឈ្មោះ សៀក ពិសិដ្ឋ និងនិស្សិតស្រី ស្រេន ណាស៊ីម៉ះ»។
សៀក ពិសិដ្ឋ និង ស្រេន ណាស៊ីម៉ះ ពេលស្រាវជ្រាវកម្មវិធី MENA។ រូបថត សហការី
លោកបន្តថា៖ «កម្មវិធី MENA នេះអាចយល់ពីអារម្មណ៍មនុស្ស ហើយវាអាចដើរតួជាជំនួយការរបស់យើងសម្រាប់ការធ្វើការងារជាច្រើនទៀត ព្រោះ MENA អាចដំណើរការកុំព្យូទ័របានដោយពុំចាំបាច់ប្រើលើក្តារចុច (Keyboard) ឬ Mouse នោះឡើយ។ វាក៏អាចដំណើរការបានដែរដោយគ្រាន់តែប្រាប់ឈ្មោះកម្មវិធីដែលយើងចង់បើក។ លើសពីនេះទៅទៀតវាអាចអានសៀវភៅឲ្យយើងស្តាប់បានគ្រាន់តែដាក់សៀវភៅនៅពីមុខកាមេរ៉ាតែប៉ុណ្ណោះ»។
កញ្ញា ស្រេន ណាស៊ីម៉ះ ជាសហសា្ថបនិកដែលបង្កើតកម្មវិធី MENA ជាមួយនឹង សៀក ពិសិដ្ឋ រៀននៅឯសាកលវិទ្យាល័យន័រតុននោះប្រាប់ពីអារម្មណ៍ផ្ទាល់ខ្លួនចំពោះសមិទ្ធផលដែលទទួលបានពីការប្រកួតនៅប្រទេសម៉ាឡេស៊ី កន្លងមកថា៖ «សប្បាយចិត្តខ្លាំងពេលឃើញមានលទ្ធផលល្អដែលកើតចេញពីការខំប្រឹងស្រាវជ្រាវរបស់ពួកយើងក្រោយពីចំណាយពេលជិត ១ ឆ្នាំ ខណៈមុនពេលប្រកួតយើងមិននឹកស្មានថាបានផលបែបនេះនោះឡើយ»។
ចំពោះកម្មវិធី MENA នេះគឺទទួលបានពានរង្វាន់ចំនួន ២ គឺទី ១ ពានរង្វាន់ Award for Best International Invention ពីប្រទេសថៃ និងរង្វាន់ទី ២ Excellent and Creative Effort គឺជារង្វាន់មេដាយមាសក្នុងកម្មវិធី International Engineering Invention & Innovation Exhibition 2018 (i-ENVEX 2018) ពីប្រទេសម៉ាឡេស៊ី៕
