.jpg)
ក្រុមអ្នកគាំទ្របាល់ទាត់ជប៉ុនអបអរពេលជម្រើសជាតិខ្លួនឈ្នះក្រុមកូឡុំប៊ី៕ AFP
ក្រុងតូក្យូ: ក្រុមអ្នកគាំទ្របាល់ទាត់ពីចម្ងាយ របស់ជប៉ុន ដែលបានឈ្នះក្រុម កូឡុំប៊ី ២-១ បានធ្វើឲ្យប្រព័ន្ធទឹកស្អាតហូរអត់ទាន់ពេលមនុស្សរាប់លាននាក់សម្រុកទៅបន្ទប់ទឹក ក្រោយសម្រាកពាក់កណ្ដាលតង់។
វាជាឱកាសព្រមគ្នា ពេលក្រុមអ្នកគាំទ្រឆ្លៀតចេញពីមុខកញ្ចក់ទូរទស្សន៍ ក្រោយពីការប្រកួតដ៏ព្រឺព្រួចរយៈពេល ៤៥ នាទីដំបូង ដោយការប្រើប្រាស់ទឹកកើនឡើង ២៤ ភាគរយក្នុងក្រុង តូក្យូ អំឡុងព្រឹត្ដិការណ៍ជំនួប ជប៉ុន និង កូឡុំប៊ី នាពេលថ្មីៗនេះ។
មន្ដ្រីធនធានទឹកបានប្រាប់ AFP ថា៖ «យើងសន្មត់ថា ដោយសារតែការប្រកួតជក់ចិត្ដ អ្នកគាំទ្រស៊ូទ្រាំរាន់បត់ដៃបន់ជើង និងបានចូលបន្ទប់ទឹកព្រមគ្នាពេលម៉ោងសម្រាក។ ការប្រើប្រាស់ទឹកអាចប្រែប្រួល ជាពិសេសអំឡុងពេល ប្រកួតបាល់ទាត់ ដែលមួយចប់មានការសម្រាកតែម្ដងប៉ុណ្ណោះ»។
ចុចទឹកបង្គន់ក្នុងទឹកមុខរីករាយ ក្រោយទស្សនាការប្រកួត យូយ៉ា អូសាកុ បានបញ្ចូលទីគូប្រកួតនៅតង់ទីពីរ ក្រុមអ្នកគាំទ្រនៅបន្ដទ្រាំខ្ទប់ខោដែលបង្កឲ្យប្រព័ន្ធទឹកស្អាតហូរលើសសព្វមួយដង ៥០ ភាគរយពេលចប់ការប្រកួត។
បុគ្គលិកធនធានទឹកបានបន្ដថា៖ «យើងត្រៀមទឹកឲ្យមានគ្រប់គ្រាន់សម្រាប់ការប្រកួតលើកក្រោយនៅថ្ងៃអាទិត្យនេះ»។
អត្រាអ្នកទស្សនាការប្រកួតពីចម្ងាយបានកើនឡើង ៤៨,៧ ភាគរយក្នុងប្រទេសជប៉ុន ដោយលើសអត្រា ៣៣,៩ ភាគរយពេលតារាស្គីទឹកកកជប៉ុន យូហ៊្សូរុ ហានយុ បានឈ្នះព្រឹត្ដិការណ៍អូឡាំពិក កាលពីខែកុម្ភៈ៕ HR
