ក្រុងបាត់ដំបង៖ ដោយសារតែមានគោលបំណងចង់លើកស្ទួយ និងថែរក្សាវប្បធម៌ខ្មែរ ក៏ដូចជាដើម្បីឲ្យកូនខ្មែរជំនាន់ក្រោយអាចស្វែងយល់អំពីសម្បត្តិវប្បធម៌របស់ខ្លួន និងអាចទទួលចំណេះដឹងទូទៅ ផ្នែកសិល្បៈទាំងបុរាណ និងសម័យ ក្រុមយុវជននៅឯខេត្តបាត់ដំបង ក៏បានផ្តួចផ្តើមគំនិតរៀបចំបើកពិព័រណ៍ដំបូងមួយ ឈ្មោះថា «ពិព័រណ៍វប្បធម៌» ដែលប្រារព្ធធ្វើនៅថ្ងៃទី ១៤-១៥ ខែ ធ្នូ ឆ្នាំ ២០១៩។
យុវជន សេង ពិទូរ អ្នកគ្រប់គ្រងនៃគម្រោងរៀបចំកម្មវិធីពិព័រណ៍វប្បធម៌លើកដំបូងនេះ ដែលប្រារព្ធធ្វើនៅក្នុងបរិវេណសាកលវិទ្យាល័យបាត់ដំបងនោះថា៖ «កម្មវិធីពិព័រណ៍វប្បធម៌នេះ គឺជាកម្មវិធីដ៏អស្ចារ្យមួយ ដែលបង្កើតឡើងនៅក្នុងគោលបំណងលើកស្ទួយវប្បធម៌ជាតិខ្មែរ និងថែរក្សា ដើម្បីឲ្យកូនខ្មែរជំនាន់ក្រោយបានមើល និងស្វែងយល់ពីសម្បត្តិវប្បធម៌ខ្លួន ថែមទាំងទទួលបានចំណេះដឹងទូទៅទាំងសិល្បៈបុរាណ និងសម័យ ដែលនឹងមានរូបរាងទ្បើងតាមរយៈពិព័រណ៍»។
យុវជន សេង ពិទូរ បន្តឲ្យដឹងពី ទម្រង់នៃការរៀបចំពិព័រណ៍វប្បធម៌នេះទៀតថា៖ «ឧបករណ៍ភ្លេងបុរាណ សម្លៀកបំពាក់ប្រពៃណី ទំនៀមទម្លាប់ សាសនា គំនូរបុរាណ គំនូរសម័យ ការតាំងស្នាដៃច្នៃប្រឌិត គំនូរប្រេង គំនូរពណ៌ទឹក គំនូរខ្មៅដៃ សិល្បៈកែច្នៃ និងសិល្បៈចម្រុះជាច្រើនទៀតនឹងត្រូវបានយកមកតាំងបង្ហាញជាផ្ទាំងទស្សនីយភាព ប្លែកភ្នែកដែលអ្នកទាំងអស់គ្នា ធ្លាប់ប៉ងប្រាថ្នាចង់ឲ្យមានកម្មវិធីនេះកើតទ្បើង។ ជាពិសេសទៅទៀតនោះ ពិព័រណ៍វប្បធម៌នេះ ក៏មានទស្សនីយភាពលើឆាកដូចជារបាំប្រពៃណីល្ខោនយីកេ បន្ថែមជាមួយការប្រគំតន្រ្តីកំដរអារម្មណ៍ផងដែរ»។
កម្មវិធីពិព័រណ៍វប្បធម៌ ក្រោមប្រធានបទថា «វប្បធម៌ និងការបង្កើតថ្មី» នឹងរៀបចំធ្វើចំនួន ២ ថ្ងៃ គឺនៅថ្ងៃទី ១៤-១៥ ខែ ធ្នូ ឆ្នាំ ២០១៩ ដោយយកទីតាំងបរិវេណនៃសាកលវិទ្យាល័យបាត់ដំបង ខណៈក្រុមអ្នករៀបចំដែលជាក្រុមយុវជនជានិស្សិត និងសិស្សវិទ្យាល័យនានា នៅខេត្តបាត់ដំបង និងមានការសហការពីសំណាក់សាកលវិទ្យាល័យបញ្ញាសាស្រ្ត និងសាលាហ្វារពន្លឺសិល្បៈផងដែរ។យុវជន សេង ពិទូរ បានបង្ហើបថា៖ «ពួកយើង គឺសុទ្ធតែជានិស្សិត និងសិស្ស ដែលមានគ្នាចំនួន ២៤ នាក់ ក្នុងនោះមាននិស្សិត និងសិស្សស្រីចំនួន ១០ នាក់ ដោយពួកយើងស្ម័គ្រចិត្ត និងតាំងចិត្តរៀបចំកម្មវិធីនេះឲ្យដំណើរទៅបាន និងបន្តសម្រាប់លើកក្រោយៗទៀតផង»។
ដោយឡែកដោយសារការរៀបចំនេះជាការធ្វើឡើងលើកដំបូង និងមានសមាជិកសុទ្ធតែជានិស្សិត និងសិស្ស ហើយមានទំហំធំ គឺចាំបាច់ត្រូវចំណាយច្រើន និងត្រូវការជំនួយឧបត្ថម្ភពីខាងក្រៅផងដែរ ទើបអាចជួយជំរុញដំណើរទៅតាមគម្រោងការបានដោយរលូនទៅបាន។
ខណៈអ្នកគ្រប់គ្រងនៃការរៀបចំពិព័រណ៍វប្បធម៌យុវជន សេង ពិទូរ ក៏បង្ហាញពីក្តីបារម្ភភ័យអរចំពោះដំណើររៀបចំពិព័រណ៍វប្បធម៌នេះផងដែរថា៖ «ចាប់តាំងពីបានជូនដំណឹងមកដល់ពេលនេះ យើងទទួលបានការជួយឧបត្ថម្ភគាំទ្រពីម្ចាស់ស្ពនស័រ ឬសប្បុរសជននានា នៅក្នុងកម្រិតតិចតួចប៉ុណ្ណោះ ព្រោះទំហំការងារធំណាស់។ ដូច្នេះ ប្រសិនបើនៅមិនទាន់មានការជួយឧបត្ថម្ភបានគ្រប់គ្រាន់ទេនោះ កម្មវិធីទំនងជាអាចនឹងត្រូវប្តូរពេល ឬពន្យារពេលផងដែរ ឬអាចបន្ថយទំហំនៃការរៀបចំនេះផងក៏មិនដឹង។ តែយ៉ាងណាយើងក៏មិនចង់ប្តូរពេលឡើយ គឺរឹតតែមិនចង់ឲ្យអ្នកទន្ទឹងរង់ចាំមានការខកចិត្តទៀតផង»។
ដោយសម្រាប់ការទំនាក់ទំនងឧបត្ថម្ភគាំទ្រក្រុមរៀបចំកម្មវិធីពិព័រណ៍វប្បធម៌នេះ តាមរយៈលេខទូរស័ព្ទ ៣ ខ្សែ មាន 096 905 3332/ 011 971 791/ 081 419 393 និងតាមរយៈសារអេឡិចត្រូនិក: wapatoaexhibition19@gmail.com និងអាចចូលតាមគេហទំព័រឈ្មោះថា ពិព័រណ៍វប្បធម៌-Wapatoa ExhibitionLike Page៕