.jpg)
ការកុម្ម៉ង់ខ្មុកតូចៗសម្រាប់ដាក់តាំងលម្អ អតិថិជនត្រូវរង់ចាំរយៈពេល ១ ខែ។ រូបថត សហការី
ភ្នំពេញ៖ ស្ថិតក្នុងកែវថ្លាមូលទ្រវែង ពន្លឺអំពូលភ្លើងចែងចាំងរំលេចកូនខ្មុកល្ខោនខោលតូចៗរូបហនុមាន យក្សទសកណ្ឌ និងលោកតាឥសី ស្អាតប្លែកភ្នែកគួរឱ្យគយគន់ ខុសពីមុខខ្មុកធំៗ ដែលត្រូវបានពាក់សម្ដែងលើឆាកទស្សនីយភាពសិល្បៈល្ខោនខោលនានា។
ស្នាដៃច្នៃខ្មុកល្ខោនខោលជារូបតូចៗ សម្រាប់តាំងលម្អលើកស្ទួយសិល្បៈវប្បធម៌ខ្មែរនេះ គឺជាគំនិតច្នៃប្រឌិតរបស់សមាជិកក្រុមរបាំខ្មែរ ដែលត្រូវបានបង្កើតឡើងជាងកន្លះទសវត្សរ៍មកហើយ ក្នុងចក្ខុវិស័យផ្ដោតទៅលើការថែរក្សា ការការពារលើវិស័យសិល្បៈគ្រប់ទម្រង់ ព្រមទាំងចូលរួមអភិវឌ្ឍមានទាំងភ្លេងបុរាណ សម័យ ចម្រៀង និងរបាំ។
លោក ស៊ូ វណ្ណៈ អ្នកដឹកនាំក្រុមរបាំខ្មែរ និងជាអតីតសិល្បកររបាំប្រពៃណីខ្មែរផងដែរ រំឭកប្រាប់ពីការកកើតក្រុមថា៖ «ក្រុមរបាំខ្មែរយើងកើតឡើងក្នុងឆ្នាំ ២០១៥ ក្នុងនោះយើងមានសមាជិក ១៨ នាក់។ ក្រុមរបស់យើងមានប្រភពកើតចេញពីសមាគមចលនាវប្បធម៌ជាតិ ដែលមានការទទួលស្គាល់ពីក្រសួងមហាផ្ទៃ ក្រសួងវប្បធម៌វិចិត្រសិល្បៈ និងសាលារាជធានីភ្នំពេញ។ សមាជិករបស់យើងមួយៗសុទ្ធតែបានឆ្លងកាត់ការបណ្ដុះបណ្ដាលខាងសមាគមដូចៗគ្នា»។
ខ្មុកដែលក្រុមរបាំខ្មែរបានធ្វើ និងដាក់ឱ្យអតិថិជនជាវមានរូប ហនុមាន យក្សទសកណ្ឌ និងលោកតាឥសី ព្រះរាម ព្រះលក្សណ៍ ព្រះនាងសីតា យក្សរាមសូ ស្វាសុគ្រីព ស្វាមហាជម្ពូ យក្សក្រុងរាពណ៍ និងតួអង្គដទៃទៀត ដោយត្រូវបានរចនាគួរជាទីទាក់ទាញ។
ការបង្កើតខ្មុកនេះត្រូវបានលោក វណ្ណៈ បានប្រាប់ពីគោលបំណងថា៖ «យើងមានគោលគំនិតធំៗចំនួន។ ទី១ គឺយើងផ្ដោតទៅលើការថែរក្សា និងផ្សព្វផ្សាយ យើងចង់ឱ្យទូលំទូលាយទៅលើការផ្សព្វផ្សាយល្ខោនខោល»។
ខ្មុករូបតាឥសី រំលេចសោភណភាពក្នុងកែវតាំងលម្អ។ រូបថត សហការី
ខ្មុកធំដែលអាចពាក់បាន ជាស្នាដៃអ្នកជំនាញសិល្បៈនៃក្រុមរបាំខ្មែរ (Robam Khmer)។ រូបថត សហការី
អ្នកដឹកនាំក្រុមវ័យ ៣២ ឆ្នាំ រូបនេះបានបន្តទៀតថា៖ «ខ្មុកមានប្រភពមកពីល្ខោនខោលមានមុខធំៗតែយើងធ្វើតូច ដើម្បីឱ្យមានលក្ខណៈងាយស្រួលក្នុងការទុកដាក់ឬក៏ស្រួលក្នុងការដឹកជញ្ជូន និងមើលទៅគួរឱ្យស្រឡាញ់សម្រាប់មនុស្សគ្រប់វ័យ។ ទី២ គឺគាត់អាចយកជូនជាកាដូទៅដល់ភ្ញៀវជាតិ និងអន្តរជាតិ ដើម្បីឱ្យគេស្គាល់ពីអត្តសញ្ញាណជាតិ និងទី៣ គឺគាត់អាចយកទៅធ្វើជាទីសក្ការៈ ឬក៏យកដាក់តាំងក្នុងផ្ទះ ឬក្នុងការិយាល័យ»។
លោក វណ្ណៈ បានឱ្យដឹងថា ដំណើរការធ្វើខ្មុកបានចាប់ផ្ដើមយូរដែរហើយ តែសម្ទុះគាំទ្រទើបតែកើនឡើងកាលពីចុងឆ្នាំ ២០១៩។
គិតត្រឹមដើមខែកុម្ភៈ ក្រុមរបាំខ្មែរទទួលបានការជាវ ៦២ ខ្មុក ដែលនេះមិនទាន់រាប់បញ្ចូលអ្នកមិនទាន់បានកក់ប្រាក់ និងអ្នកកុម្ម៉ង់ក្នុងផេចជាបន្តបន្ទាប់។
ខ្មុកស្នាដៃក្រុមរបាំខ្មែរមាន ២ ទំហំ គឺទំហំតូចសម្រាប់ដាក់លម្អ និងទំហំធំអាចពាក់បាន។
ខ្មុកតូចៗ អ្នកចូលរួមធ្វើចំនួន ៣ នាក់ ហើយសមាជិកក្រុមលោកគ្រាន់តែបានទៅមើលរៀមច្បងធ្វើខ្លះៗ គួបផ្សំនឹងទេពកោសល្យ និងគំនិតច្នៃប្រឌិត ដោយមិនបានរៀនជំនាញនេះតែម្ដងទេ។
អតីតសិល្បកររបាំប្រពៃណីដែលទទូចឱ្យអ្នកជំនាញ និងអ្នកមិនជំនាញក្នុងវិស័យសិល្បៈចេះគាំទ្រ ឱ្យតម្លៃ ជួយស្ថាបនា និងសិក្សាស្វែងយល់ពីគ្នា ជាជាងធ្វើការប្រៀបធៀបនោះ បានរៀបរាប់ថា៖ «សម្រាប់ទំហំតូចវាមានទំហំប៉ុនទូរស័ព្ទអាយហ្វូនប៉ុណ្ណោះ វាត្រូវបានដាក់ក្នុងក្រឡថ្លាដ៏ស្អាតរួមទាំងមានភ្លើងផងដែរ។ រាល់ការកុម្ម៉ង់ខាងយើងនឹងកំណត់រយៈពេល ១ ខែ មិនថាគាត់កុម្ម៉ង់តិច ឬច្រើន»។
លោកបន្តថា៖ «សម្រាប់តម្លៃខ្មុកគិតទៅតាមទំហំក៏ដូចជាភាពពិបាកនៃរូប។ ខ្មុកធម្មតា ឬរូបដែលមានភាពងាយស្រួលធ្វើដូចជាព្រះរាម ព្រះលក្សណ៍ គឺតម្លៃ ៦០ ដុល្លារ សម្រាប់តួអង្គយក្ស ឬតួអង្គតាឥសី គឺគិតចាប់ពី ៨០ ដុល្លារឡើងទៅ»។
ក្រៅពីខ្មុក ក្រុមរបាំខ្មែរក៏មានរចនាសម្លៀកបំពាក់ និងទម្រង់សិល្បៈផ្សេងៗប្រកបដោយគុណភាព និងប្រណីតភាពដ៏គួរឱ្យស្ញប់ស្ញែងផងដែរ។
លោក វណ្ណៈ បានរៀបរាប់ពីស្នាដៃសម្លៀកបំពាក់ក្រុមលោកថា៖ «យើងមិនមានច្នៃម៉ូដទេ យើងប្រើប្រាស់ទម្រង់ដើម ប្រើប្រណីតភាពដើម្បីឱ្យវានៅតែថ្មី។ យើងប្រើមកុដមាសឱ្យមានពន្លឺ សំពត់យើងប្រើសំពត់សូត្រ ស្បៃយើងប្រើប៉ាក់ឌិនរំស័រ។ របាំប្រពៃណី របាំបុរាណផ្សេងៗយើងគ្រាន់តែធ្វើការអាប់ឌែតខ្លះ»។
លោកបានបន្តថា៖ «យើងបានច្នៃម៉ូដឈុតតំណាងជាតិទម្រង់បុរាណសម្រាប់ការថតហ្វេសសិន ហើយបច្ចុប្បន្នយើងទើបតែទទួលបានជយលាភីលេខ ១ ហើយយើងនឹងបានយកឈុតទៅបង្ហាញវត្តមាននៅលើឆាកអន្តរជាតិនៅក្នុងកម្មវិធី Miss World 2021 នាពេលខាងមុខនេះ»។
ទន្ទឹមនឹងការគាំទ្រច្រើនពីប្រិយមិត្ត ក្រុមរបាំខ្មែរក៏ទទួលបានទាំងការសរសើរ និងមតិរិះគន់ តែលោករីករាយនឹងទទួលគ្រប់មតិយោបល់ ដើម្បីជាទុនក្នុងការអភិវឌ្ឍខ្លួន។
អ្នកដឹកនាំក្រុមរបាំខ្មែររូបនេះបានលើកឡើងថា៖ «ដោយមានការផ្ដល់មតិយោបល់ពីអតិថិជនពេលនេះយើងបានដាក់រូបទង់ជាតិអមសងខាងអត្ថន័យរបស់តួអង្គមួយៗ ដែលជាអត្តសញ្ញាណជាតិខ្មែរ។ នៅថ្ងៃអនាគតយើងមានគម្រោងបោះត្រា Made in Cambodia លើក្រឡក៏ដូចជាលើខ្មុកតែម្ដង»។
ព័ត៌មានបន្ថែមពីស្នាដៃនានារបស់ក្រុមរបាំខ្មែរអាចទាក់ទងតាមគេហទំព័រហ្វេសប៊ុក @MyCountryMyCulture៕
