ក្រុងបាត់ដំបង៖ សិល្បករ-ការិនីចំនួនប្រមាណ ៧០ រូប មានច្រើនជំនាន់ និងជំនាញ នឹងជួបជុំគ្នាដាក់តាំងពិព័រណ៍ស្នាដៃសិល្បៈខ្លួន ដើម្បីបង្ហាញសាធារណជនចំនួន ២ ថ្ងៃ ដែលប្រារព្ធធ្វើនៅលើកំណាត់ផ្លូវ 2.5 នៃក្រុងបាត់ដំបង ខេត្តបាត់ដំបង នាចុងសប្តាហ៍នេះ គឺថ្ងៃទី ២១-២២ ខែ ធ្នូ ឆ្នាំ ២០១៩។
ដោយមានការជំរុញ និងជួយផ្តួចផ្តើមពីសំណាក់អង្គការហ្វារពន្លឺសិល្បៈផងដែរនោះ ទើបបានក្រុមសិល្បករ-ការិនីជាច្រើនជំនាញរួមមានដូចជា គំនូរ រូបថត ចម្លាក់ គូរហាន់ណា ផាត់ដំបៅ របួស បង្ហាញម៉ូដ សម្លៀកបំពាក់កែច្នៃពីសំរាមប្លាស្ទិក អ្នករចនាម៉ូដ តារាបង្ហាញម៉ូដស្នាដៃសិល្បៈ ក្រុមសម្តែងសៀករាំ Hip Hop ជាដើមនោះ នឹងនាំយកស្នាដៃសិល្បៈរបស់ខ្លួនតាមជំនាញ និងចំណេះនៃសិល្បៈខ្លួនជាលក្ខណៈទ្រង់ទ្រាយធំ ដែលរៀបចំដោយក្រុមការងារខ្មែរជាលើកដំបូងនោះ។
លោក ប៉ោយ ឈុនលី ជាអ្នករៀបចំនូវព្រឹត្តិការណ៍តាំងពិព័រណ៍ចម្រុះលើកដំបូងនេះបង្ហើបឲ្យដឹងថា៖ «តាមពិតទៅ កាលពី ១-២ ឆ្នាំមុន យើងក៏មានការរៀបចំបង្ហាញស្នាដៃសិល្បៈខ្លួនដែរ គឺជាទ្រង់ទ្រាយមិនធំ ហើយមានបរទេសជាអ្នកជួយរៀបចំឲ្យ។ តែឆ្នាំនេះ លែងធ្វើឲ្យទើបយើងសម្រេចរួបរួមគ្នា ដោយមានការជួយជ្រោមជ្រែងពីអង្គការហ្វារពន្លឺសិល្បៈផងនោះ ទើបយើងបានសម្រេចរួមគ្នាធ្វើកម្មវិធីនេះដោយក្រុមសិល្បករ-ការិនីខ្មែរខ្លួនឯងជាលើកដំបូងតែម្តង។ សម្រាប់ក្រុមសិល្បករ-ការិនីខ្មែរ ដែលនឹងចូលរួមនោះ គិតមកដល់ពេលនេះ មានចំនួនប្រមាណ ៧០ នាក់ ហើយបានស្នើសុំចូលរួមនាំយកស្នាដៃខ្លួនមកដាក់តាំងបង្ហាញសាធារណជនទស្សនា និងអាចជាវបានផងដែរ នៅថ្ងៃទី ២១-២២ ខែ ធ្នូ ឆ្នាំ ២០១៩»។
អ្នករៀបចំព្រឹត្តិការណ៍តាំងពិព័រណ៍ចម្រុះលោក ប៉ោយ ឈុនលី ដែលអតីតជាគ្រូផ្នែកសិល្បៈគំនូរជីវចល នៅសាលាហ្វារពន្លឺសិល្បៈ ខណៈលោកមានមុខមាត់ស្រដៀងគ្នានឹងកីឡាករប្រដាល់ល្បីលំដាប់ពិភពលោកជាតិហ្វីលីពីនគឺ ម៉ានី ប៉ាកគីអៅ បានបន្តឲ្យដឹងទៀតផងដែរថា៖ «ដោយសារចង់ឲ្យមហាជនទូទៅបានចូលរួមទស្សនាបានគ្រប់ស្រទាប់ និងជាឱកាសល្អសម្រាប់ក្រុមសិល្បករ-ការិនី យើងគ្រប់ជំនាញ អាចបង្ហាញស្នាដៃ និងទេពកោសល្យខ្លួនជូនបងប្អូនបានឃើញ និងស្គាល់ផងដែរ»៕