.jpg)
លោក ព្រាប សុវត្ថិ ឧបត្ថម្ភប្រាក់ចំនួន ១០ លានរៀល។ លោក ខេមរៈ សិរីមន្ត ឧបត្ថម្ភប្រាក់ចំនួន ៤ លានរៀល។ រូបថត ហុង មិនា, លោក ឆាយ វីរៈយុទ្ធ តារាចម្រៀង និងភរិយា ឧបត្ថម្ភ $១ ២៥០។ រូប ហ្វេសប៊ុក
ភ្នំពេញ៖ ខណៈគេឃើញមានផុសចេញនូវក្រុមសប្បុរសជនខ្មែរទាំងវិស័យរដ្ឋ និងឯកជន ពីរាស្រ្តសាមញ្ញដល់លំដាប់មន្រ្តី និងឧកញ៉ា មានភាពសស្រោកសស្រាំសហការជួយឧបត្ថម្ភប្រាក់ទៅតាមលទ្ធភាពចូលរួមជាមួយរដ្ឋាភិបាល ដើម្បីទិញវ៉ាក់សាំងប្រឆាំងកូវីដ ១៩ កើនចំនួនជាហូរហែនោះ ក្រុមតារាចម្រៀងប្រុសស្រីខ្មែរដែលមកពីផលិតកម្មល្បីផ្សេងៗគ្នា ក៏បានចូលរួមយ៉ាងសកម្មជួយឧបត្ថម្ភប្រាក់តាមធនធានផ្ទាល់ខ្លួនផងដែរ ក្រោមបរិបទឆន្ទៈស្មារតីសាមគ្គីភាពវប្បធម៌នៃការចែករំលែកក្នុងការប្រយុទ្ធប្រឆាំងកូវីដ ១៩។
គួរឱ្យកត់សម្គាល់នាពេលថ្មីៗនេះ គេក៏ឃើញមានក្រុមតារាចម្រៀងប្រុសស្រីមកពីផលិតកម្មធំចំនួន ៣ បានចូលរួមបរិច្ចាគប្រាក់ភ្លាមៗ តាមសេចក្តីប្រកាសចូលរួមរបស់រាជរដ្ឋាភិបាលរួមមានដូចជា តារាចម្រៀងប្រចាំនៅផលិតកម្មហង្សមាស ផលិតកម្មហ្គាឡាក់ស៊ី និងផលិតកម្មសាន់ដេ។
បើតាមសារបង្ហោះឱ្យដឹងពីលោក ហេង ឡុង ជាក្រុមការងាររបស់សមាគមសិល្បៈស្ម័គ្រចិត្តជួយសង្គម ដែលមានគូស្នេហ៍ខ្លួន គឺអ្នកនាង ចន ច័ន្ទលក្ខិណា ដែលជាប្រធានសមាគមបានបរិច្ចាគប្រាក់ចំនួន ១ ០០០ ដុល្លារផងដែរនោះ ក៏បានបង្ហោះសារបង្ហើបឱ្យដឹងឈ្មោះ របស់ក្រុមតារាចម្រៀងប្រុសស្រីខ្មែរនៃផលិតកម្មចម្រៀងទាំង ៣ ថា៖ «តារាចម្រៀង លោក ព្រាប សុវត្ថិ បានឧបត្ថម្ភថវិកាចំនួន ១០ លានរៀល តារាចម្រៀងលោក ខេម ឧបត្ថម្ភ ១០ លានរៀល កញ្ញា តន់ ចន្ទសីម៉ា ឧបត្ថម្ភថវិកាចំនួន ១០ លានរៀល។ តារាចម្រៀង សួស វីហ្សា និងគ្រួសារបានឧបត្ថម្ភ ១ ០០០ ដុល្លារ តារាចម្រៀង ខេមរៈ សិរីមន្ត ឧបត្ថម្ភ ៤ លានរៀល កញ្ញា ឈិន ម៉ានិច្ច ឧបត្ថម្ភ ៥០០ ដុល្លារ កញ្ញា រតនៈ ពិសី ឧបត្ថម្ភថវិកាចំនួន ១២៥ ដុល្លារ ខណៈលោក ឆាយ វីរ:យុទ្ធ និង ភរិយា សែ ចាន់ឌី ព្រមទាំងកូនស្រី ឧបត្ថម្ភថវិកាចំនួន ១ ២៥០ ដុល្លារ កញ្ញា សុខ ពិសី ឧបត្ថម្ភថវិកាចំនួន ៣ ០០០ ដុល្លារ លោក ពែក មី ឧបត្ថម្ភថវិកាចំនួន ១ ០០០ ដុល្លារ លោក នី រតនា ឧបត្ថម្ភថវិកាចំនួន ១ ០០០ ដុល្លារ ជូនសម្ដេចតេជោ ហ៊ុន សែន ដើម្បីទិញវ៉ាក់សាំងកូវីដ ១៩ ចែកជូនប្រជាពលរដ្ឋខ្មែរដោយឥតគិតថ្លៃ»។
តារាចម្រៀងហ្គាឡាក់ស៊ីលោក ខេម និង តន់ ចន្ទសីម៉ា ម្នាក់ៗឧបត្ថម្ភ ១០ លានរៀល និងអ្នកនាង សួស វីសា តារាហង្សមាស ឧបត្ថម្ភ ១ ០០០ ដុល្លារ។ រូបថត ហ្វេសប៊ុក
លើសពីនេះ បើតាមរយៈគណនីហ្វេសប៊ុកលោក ហេង ឡុង ដដែលនេះក៏មានឃើញបង្ហើបឈ្មោះ អ្នកសិល្បៈផ្សេងៗ ដែលមានអាជីពជាតារាសម្តែង អ្នកនិពន្ធចម្រៀង និងពិធីករវិទ្យុ ទូរទស្សន៍ផងដែរថា៖ «លោក មុំ សាម៉េត (ពិធីករវិទ្យុ និងទូរទស្សន៍) ថវិកា ២២២ ដុល្លារ តារាកំប្លែងនាយ ក្រឹម ថវិកា ១០០ ដុល្លារ ខណៈអ្នកនាង កាតុ និងស្វាមី បានឧបត្ថម្ភថវិកាចំនួន ១០០ ដុល្លារ។ ចំណែកឯលោក ឧត្តមសេនីយ៍ត្រី ខេមរៈ ភារុន (អ្នកនិពន្ធទំនុកច្រៀង) បងប្រុសបង្កើតលោក ខេមរៈ សិរីមន្ត បានឧបត្ថម្ភថវិកាចំនួន ១០០ ដុល្លារ»។
សម្រាប់ដំណាក់កាលជួយឧបត្ថម្ភប្រាក់ ដើម្បីទិញវ៉ាក់សាំងកូវីដ ១៩ នេះ ក្រៅពីមានក្រុមអ្នកសិល្បៈ ដែលជាតារាមហាជនបានជួយឧបត្ថម្ភនោះ គេក៏ឃើញមានក្រុមតារាបណ្តាញសង្គមនានាដែលផ្សាយផ្ទាល់តាមហ្វេសប៊ុក ឬផេច បានចូលរួមឧបត្ថម្ភផងដែរ។
ខណៈលោក ហេង ឡុង ក៏បានបង្ហោះឱ្យដឹងឈ្មោះអ្នកទាំងនោះដែរ ដូចជាក្រុមហ៊ុន Happy sweet Oshop បរិច្ចាគ ១ ពាន់ ដុល្លារ និងយាយ ស្រួយ Cambodia co.ltd បរិច្ចាគ ១ ពាន់ដុល្លារ៕
