.jpg)
សកម្មភាពហាត់សមក្រុមសៀកហ្វារពន្លឺសិល្បៈ ត្រៀមសម្តែងរួមគ្នានឹងក្រុមសៀកប្រទេសអូទ្រីស ដើមខែក្រោយ។ រូបថត សហការី
ក្រុងបាត់ដំបង៖ ទស្សនីយភាពសម្តែងសៀកដែលបង្កើតថ្មីមួយមានឈ្មោះថា «Fence-របង» នឹងចាប់ដៃគ្នាសម្តែងសៀកចែកជូនទស្សនិកជនចូលរួមដោយសេរីនៅរោងសៀកសាលាហ្វារពន្លឺសិល្បៈក្នុងខេត្តបាត់ដំបង គឺជាការសម្តែងរវាងក្រុមសិល្បៈសៀករបស់សិស្សសាលាហ្វារពន្លឺសិល្បៈ និងក្រុមសៀករបស់ក្រុងបវីយែន មកពីប្រទេស អូទ្រីស នៅថ្ងៃទី ៤ ខែ តុលា ឆ្នាំ ២០១៩ ខាងមុខ។
ការសម្តែងថ្មីមួយនេះ គឺជាសមិទ្ធផលនៃកិច្ចសហប្រតិបត្តិការថ្មីរវាងសាលាទស្សនីយភាពហ្វារ និងក្រុមសិល្បៈល្ខោនមកពីទីក្រុងវីយែន ប្រទេស អូទ្រីស ដែលមានក្រុមសិល្បករ-សិល្បការិនី ទាំង ២ ប្រទេសមួយនៅតំបន់អាស៊ី និងមួយនៅតំបន់អឺរ៉ុប អាចមានឱកាសរួមសម្តែងជាមួយគ្នាលើកដំបូងផងដែរ។
បើតាមសម្តីរបស់លោក អេនឌ្រាស៍ ចាហ្វណឺត (Andreas Jaehnert) ដែលជានាយកគម្រោងថ្មីរបស់មហោស្រព the theater der sprachfehler នៅអាស៊ីបានឲ្យដឹងថា៖ «ទស្សនិយភាពសម្តែងសៀកដែលមានឈ្មោះថា Fence- របង នេះគឺជាការបង្កើតថ្មីមួយ ដោយចង់ឲ្យក្រុមសៀករបស់សាលាហ្វារពន្លឺសិល្បៈនៃតំបន់អាស៊ី និងក្រុមសៀកមកពីទីក្រុងវីយែន ប្រទេស អូទ្រីស ដែលនៅតំបន់អឺរ៉ុប អាចមានការរួមស្មារតីគ្នានៅលើឆាកសិល្បៈសម្តែងសៀក នាឱកាសថ្ងៃទី ៤ ខែ តុលា ខាងមុខនេះ។ តាមដឹងកន្លងមកនៅសាលាហ្វារពន្លឺសិល្បៈតែងតែបែងចែកទីកន្លែងគ្នា ក្រុមសិល្បករ-សិល្បការិនី និងវ័យផងដែរ។
ការសម្តែងនេះ យើងក៏ចង់ឲ្យមានការបង្កើតនិមិត្តសញ្ញា និងប្រពៃណីរវាងប្រជាជនខ្មែរ និងអឺរ៉ុប ក៏ដូចជាការបង្កើតប្រវត្តិសាស្រ្តនៃមនុស្សជាតិ តាមរយៈសហគមន៍ និងសង្គមមនុស្ស រហូតបង្កើតបានជាស្ថាប័នច្បាប់រដ្ឋ និងរដ្ឋាភិបាល»។
ក្រុមសៀកហ្វារពន្លឺសិល្បៈនឹងសម្តែងទស្សនីយភាពថ្មីឈ្មោះ «Fence»។ រូប សហការី
លោកបន្តថា៖ «តាមរយៈការសម្តែងសៀកនេះ នឹងបង្ហាញឲ្យឃើញនូវផ្ទាំងទស្សនិយភាពនៃការបង្កើតរចនាសម័្ពន្ធ និងបង្កើតជាចម្ងល់សួរនាំឡើងថា តើវាចាំបាច់ទេក្នុងការបោះបង់ចោលនូវការប្រើបញ្ញត្តិគំនិតប្រកាន់គ្នាថា ល្អ និងអាក្រក់ ដរាបណាយើងចង់បានភាពរុងរឿងនោះ»។
លោក អេនឌ្រាស៍ ចាហ្វណឺត ក៏បានឲ្យដឹងទៀតដែរថា៖ «សម្រាប់អ្នកនៅលោកខាងលិច ប្រទេស កម្ពុជា ត្រូវបានគេចាត់ទុកថា ជាប្រទេសកំពុងអភិវឌ្ឍន៍ ហើយយើងមានការចាប់អារម្មណ៍ទៅលើទំនាក់ទំនងនៃអន្តរភាពរបស់មនុស្សថា តើមានលក្ខណៈយ៉ាងណា?
ដោយឡែកខ្ញុំ ក៏ធ្លាប់បានមករស់នៅ និងធ្វើការនៅក្នុងខេត្តបាត់ដំបងរយៈពេល ៣ ខែ កាលពីឆ្នាំ ២០១២ ហើយខ្ញុំក៏ចាប់អារម្មណ៍នឹងអង្គការហ្វារពន្លឺសិល្បៈផងដែរ។ នេះអាចនិយាយបានថា ជាហេតុផលមួយនៃការបង្កើតឲ្យមានការសម្តែងរួមគ្នាមួយរវាងក្រុមសៀកទាំង ២ ប្រទេសឡើងជាលើកដំបូង ក្រោមគម្រោងសម្តែងថ្មីមានឈ្មោះថា «Fence-របង» នេះឯង»។
លោក ឃួន ចាន់រស្មី នាយកងផ្នែកសម្តែងសិល្បៈ (Performing Arts School) នៃសាលាហ្វារពន្លឺសិល្បៈបានថ្លែងថា៖ «យើងរំភើបចិត្ត ដែលមានការយល់ព្រមគ្នា ក្រោយពីបានពិភាក្សាទាំង ២ ភាគីមកក៏សម្រេចឲ្យមានការបង្កើតគម្រោងសម្តែងថ្មីមានឈ្មោះថា «Fence-របង» នេះឡើង ដែលជាការសម្តែងលើកដំបូងក្នុងតង់សម្តែងរបស់សាលាហ្វារពន្លឺសិល្បៈនៅវេលាម៉ោង ៤ រសៀល ថ្ងៃទី ៤ ខែ តុលា ឆ្នាំ ២០១៩»៕
