ក្រុងមូស្គូ: អ្នកគាំទ្រក្រុមបាល់ទាត់ស្វ៊ីស មួយក្រុមបានកក់សណ្ឋាគារមួយខុសទីក្រុង ដោយយល់ច្រឡំថា ទីក្រុង Rostov-on-Don ជាទីតាំងក្រុមស្វ៊ីសលេងជាមួយប្រេស៊ីល កាលពីថ្ងៃអាទិត្យ ជាមួយក្រុង Rostov Veliky ចម្ងាយប្រមាណ ១២៨១ គីឡូម៉ែត្រពីគ្នាឯនោះ។
បណ្ដាញផ្សព្វផ្សាយរុស្ស៊ី បានរាយការណ៍ថា ក្រុមអ្នកគាំទ្របានខលហៅប៉ូលិសពេលពួកគេមិនអាចស្វែងរកសណ្ឋាគារ ខណៈដែលបានឃើញឈ្មោះផ្លូវដូចគ្នាក្នុងទីក្រុងរៀបចំព្រឹត្ដិការណ៍បាល់ទាត់ពិភពលោក។
ប៉ូលិសមូលដ្ឋានបានឲ្យដឹងក្នុងសេចក្ដីថ្លែងការណ៍មួយកាលពីថ្ងៃចន្ទថា៖ «ទេសចរបរទេស ដែលមកគាំទ្រក្រុមបាល់ទាត់ស្វ៊ីស បានហៅទូរស័ព្ទមកហើយ ហើយនិយាយថា ពួកគេកក់តសណ្ឋាគារមួយ។ អ្នកបកប្រែបានប្រាប់ពួកគេថា ពួកគេច្រឡំឈ្មោះតំបន់ហើយ ហើយពួកគេបានកក់សណ្ឋាគារនៅទីក្រុងRostov Veliky ឯនោះ»។
ប៉ូលិសក្រុង Rostov Veliky បានប្រាប់សារព័ត៌មានថា ខ្លួនបានជួលអ្នកបកប្រែជំនាញ និងក្រុមស្ម័គ្រចិត្ដដែលនិយាយភាសាអេស្ប៉ា អង់គ្លេស អារ៉ាប់ និងបារាំងក្នុងពេលប្រកួតបាល់ទាត់ពិភពលោកនេះ។
ប៉ូលិសបានបន្ដថា ខ្លួនបានជួយក្រុមអ្នកគាំទ្រច្រឡំអសយដ្ឋាននោះដោយស្វែងរកកន្លែងស្នាក់ត្រឹមត្រូវវិញហើយ។ កាលពីដើមខែ បណ្ដាញផ្សព្វផ្សាយរុស្ស៊ី និងអ៊ុយក្រែន បានរាយការណ៍ស្ដីពីក្រុមអ្នកគាំទ្រស្វ៊ីស ដែលធ្វើដំណើរទៅកាន់ក្រុង Rostov-on-Don តាមរថយន្ដដោយឆ្លងកាត់ភាគខាងកើតអ៊ុយក្រែន ជាទីដែលមានជម្លោះរ៉ាំរ៉ៃរយៈពេល ៤ ឆ្នាំ និងបានសម្លាប់មនុស្សជាង ១ ម៉ឺននាក់ អត់បានដឹងថា វាជាតំបន់សង្គ្រាមពីព្រោះពួកគេធ្វើដំណើរតាមប្រព័ន្ធ GPS។
ទីក្រុង Rostov-on-Don ស្ថិតនៅចម្ងាយប្រមាណតែ ៦០ គីឡូម៉ែត្រពីខ្សែត្រៀមជួរមុខក្នុងតំបន់អ៊ុយក្រែនខាងកើតប៉ុណ្ណោះ។ រុស្ស៊ីបានបន្ថែមកងកម្លាំងសន្ដិសុខពិសេសជាច្រើនទៀតដើម្បីផ្ដល់សុវត្ថិភាពដល់ក្រុមអ្នកគាំទ្រ។
កីឡដ្ឋានក្នុងទីក្រុងនេះ អាចផ្ទុកមនុស្ស ៤៥០០០ នាក់ និងចំណាយប្រាក់សាងសង់ប្រមាណ ៣២០ លានដុល្លារ។ ស្វ៊ីសបានស្មើជាមួយប្រេស៊ីល ១-១ ចំពោះការប្រកួតថ្ងៃអាទិត្យសប្ដាហ៍មុន៕ AFP/HR