.jpg)
ក្រុមសិល្បករ BBAND របស់ក្រុមសៀកហ្វារពន្លឺសិល្បៈ នឹងចេញវីដេអូចម្រៀងដំបូង។ រូបថត សហការី
ក្រុងសៀមរាប៖ ខណៈដែលតំបន់រមណីយដ្ឋានទេសចរណ៍ប្រវត្តិសាស្រ្ត និងវប្បធម៌ខ្មែរ ដ៏ល្បីនៃទឹកដីខេត្តសៀមរាប កំពុងតែជួបការស្ងាត់ភ្ញៀវទេសចរបរទេស ដោយសារវិបត្តិកូវីដ ១៩ នោះ ហើយបច្ចុប្បន្នការឆ្លងជំងឺនេះ ក៏មានស្ថានភាពស្បើយបណ្តើរៗហើយក្រុមសិល្បករ BBAND របស់ក្រុមសៀកហ្វារពន្លឺសិល្បៈ ប្រចាំនៅក្រុងសៀមរាប បានផលិតវីដេអូចម្រៀងដំបូងមានចំណងជើងថា «តោះមកទស្សនាក្រុងសៀមរាប» ចេញផ្សាយតាមបណ្តាញសង្គមនៅថ្ងៃទី ១១ ខែ កក្កដា ឆ្នាំ ២០២០ ខាងមុខនេះ។
លោក ទេស វិជ្ជា ជំនួយការផ្នែកទីផ្សារនៃអង្គការហ្វារពន្លឺសិល្បៈនៅក្រុងសៀមរាប បានបង្ហើបពីគោលបំណងនៃការផលិតវីដេអូចម្រៀងឈ្មោះថា «តោះមកទស្សនាក្រុងសៀមរាប» នោះថា៖ «ក្នុងវីដេអូនេះ ក្រុមចម្រៀង BBAND-ប៊ីបេន នឹងបង្ហាញពីស្ទីលប្លែករបស់វង់តន្រ្តីខ្មែររីហ្គេ។ សម្រាប់បទចម្រៀង «តោះមកទស្សនាក្រុងសៀមរាប» នេះ និយាយពីយុវជនម្នាក់ខំបញ្ចុះបញ្ចូលស្រ្តីជាសង្សារខ្លួនឲ្យនាងធ្វើដំណើរជាមួយគាត់ទៅលេង នៅខេត្តសៀមរាប ដើម្បីទទួលបានបទពិសោធ និងទស្សនាបណ្តុំទេសភាពគ្រប់បែបយ៉ាងនៅតំបន់អង្គរ ដោយជឿជាក់ថា រូបនាងនឹងចង់វិលត្រឡប់មកទស្សនាវិញម្តងទៀត។
ជាការពិតទៅនោះ អត្ថន័យគឺចង់ឲ្យមានការចូលរួមពីសំណាក់ក្រុមទេសចរក្នុងស្រុកខ្មែរយើងមកទស្សនាតំបន់រមណីយដ្ឋាននានានៅក្នុងខេត្តសៀមរាប ឲ្យបានច្រើនតាមរបៀបថ្មីដែលរក្សាសុវត្ថិភាព និងដើម្បីចូលរួមបង្កើតឲ្យមានការងារឡើងវិញដែរទៅដល់ក្រុមសម្តែងនានារបស់ក្រុមសិល្បករហ្វារពន្លឺសិល្បៈនៅក្នុងខេត្តសៀមរាប ដែលកំពុងតែជួបវិបត្តិអត់ការងារផ្នែកអាជីពរបស់ពួកគាត់នោះ។ ម្យ៉ាងទៀត ការងារសម្តែងនានារបស់ក្រុមសិល្បករហ្វារពន្លឺសិល្បៈ ក៏បានរួមចំណែករកប្រាក់សម្រាប់មូលនិធិជួយទៅដល់ក្រុមសិស្សានុសិស្សក្រីក្រ កំពុងរៀននៅឯសាលាហ្វារពន្លឺសិល្បៈ ក្នុងខេត្តបាត់ដំបងជារៀងរាល់ឆ្នាំ ដែលមានចំនួនជាង ១ ពាន់នាក់ផងដែរ»។
ក្រុមសៀកហ្វារពន្លឺសិល្បៈសម្តែងនៅសៀមរាប។ រូបថត សហការី
ជំនួយការផ្នែកទីផ្សារនៃអង្គការហ្វារពន្លឺសិល្បៈបានបន្តថា៖ «ហើយការចេញវីដេអូចម្រៀងនេះ ក៏ចង់បង្ហាញដែរថា ក្រុមសិល្បៈសៀករបស់ហ្វារពន្លឺសិល្បៈ មិនត្រឹមតែចេះលេងសិល្បៈសម្តែងនៅលើឆាកសៀកប៉ុណ្ណោះទេ ក៏ចេះសម្តែងសិល្បៈបែបចម្រៀងទៀតផងដែរ។ ខណៈចម្រៀង «តោះមកទស្សនាក្រុងសៀមរាប» នេះគឺជាវីដេអូសម្តែងដំបូងរបស់ពួកគេ ដោយមានលោក វឿត វុត ជាអ្នកចម្រៀង លោក លី វណ្ណថាន ជាប្រធានក្រុម និងអ្នកនិពន្ធទំនុកច្រៀង ក្រុមតន្រ្តីករនានារួមមានលោក ឆម សុវណ្ណារិទ្ធ ឡាប ម៉ាលីស រី វណ្ណៈ សំពន្លឺ សែ ឡង់ឌី ឯតួសម្តែងវិញ គឺមានកញ្ញា ជួប កញ្ញា និងលោក គង់ ទីដា»។
លោក ទេស វិជ្ជា បញ្ជាក់ឲ្យដឹងទៀតដែរថា៖ «បន្ទាប់ពីការបញ្ចាំងវីដេអូ យើងក៏នឹងមានការប្រគំតន្រ្តីផ្ទាល់របស់ក្រុមប៊ីបេនដែរ ( BBAND live) តាមយូធូប និងហ្វេសប៊ុកនៅថ្ងៃទី ១១ ខែ កក្កដា ឆ្នាំ ២០២០ ខាងមុខនេះ។ ខណៈតំណភ្ជាប់ទៅកាន់ការផ្សាយផ្ទាល់ ក៏នឹងត្រូវបានផ្តល់ជូនមុន រយៈពេល ១ សប្តាហ៍។ សូមពិនិត្យកន្លែង និងពិភាក្សា សម្រាប់ព័ត៌មានថ្មីៗ»៕
