.jpg)
ហាងកាហ្វេ Corgi មានឆ្កែជាង ២០ក្បាល និងពូជស្អាតៗគួរឲ្យស្រឡាញ់។ ហេង ជីវ័ន
ភ្នំពេញ៖ របងសំណាញ់ទាបល្មម អាចឱ្យអ្នកដំណើរទាំងឡាយមើលឃើញសម្លាញ់ជើង ៤ រត់លេងលើស្មៅបៃតងក្នុងទីធ្លា ដែលមានទាំងកូនផ្ទះជ័រដូចកន្លែងក្មេងលេង។
សំឡេងឆ្កែតូចធំព្រុសប្រឡែងគ្នាយ៉ាងរញ៉ី ហាក់បន្លឺស្វាគមន៍ភ្ញៀវមកក្រេបភេសជ្ជៈ នឹងលេងជាមួយសត្វឆ្កែដ៏គួរឱ្យស្រឡាញ់នានា មានទាំងពូជឆ្កែហាស្គី (ឆ្កែតំបន់ទឹកកក) ឆ្កែតឿមុខជ្រួញ ឆ្កែស្រមូវរោមក្រញាញ់ ដែលសុទ្ធសឹងតែជាពូជកម្រ មិនសូវឃើញមានចិញ្ចឹមនៅក្នុងស្រុក។
ហាង Corgi In Town-Dog Cafe មិនត្រឹមតែជាហាងកាហ្វេផ្ដល់ការកម្សាន្តដល់អ្នកចូលចិត្តសុនខនោះទេ ថែមទាំងមានលក់ចំណីបរិក្ខារចិញ្ចឹមឆ្កែ ព្រមទាំងកន្លែងស្នាក់នៅមើលថែដល់សត្វឆ្កែចិញ្ចឹមក្នុងកូនបន្ទប់ ដែលម្ចាស់ហាងរៀបចំឡើងដូចជាសណ្ឋាគារមានទាំងពូក ខ្នើយ ភួយ និងកង្ហារទៀតផង។
ភ្ញៀវរីករាយនឹងក្រេបភេសជ្ជៈ ប្រឡែងជាមួយឆ្កែចេះៗជាច្រើនក្បាល។ ហេង ជីវ័ន
គំនិតបើកហាងកាហ្វេ និងសេវាកម្មមើលថែសត្វទាំងនេះ កើតចេញពីទឹកចិត្តស្រឡាញ់សត្វឆ្កែរបស់លោក ឧត្តម ជាម្ចាស់ហាងនេះផ្ទាល់។
លោកបានប្រាប់ ភ្នំពេញ ប៉ុស្តិ៍ ថា៖ «តាំងពីក្មេងខ្ញុំជាមនុស្សស្រឡាញ់ឆ្កែ ស្រឡាញ់សត្វ ខ្ញុំចូលចិត្តចិញ្ជឹមលេងនៅផ្ទះ។ ពេលចិញ្ចឹមយូរទៅ យើងមានកូនឆ្កែច្រើន។ ដល់ពេលយើងងាកទៅបរទេស យើងឃើញពាក់ព័ន្ធទៅនឹង business ហាងកាហ្វេជាមួយឆ្កែ»។
លោកបន្តទៀតថា៖ «ដោយយើងក៏មានដើមទុនស្រាប់ កាហ្វេយើងចេះស្រាប់ កូនឆ្កែក៏យើងមានស្រាប់ទើបយើងយកគំនិតនេះមកធ្វើឱ្យចេញជារូបរាង។ ប៉ុន្តែកូនឆ្កែមួយចំនួនយើងទិញដាក់ថែមពេលបើកហាង»។
បន្ទប់សណ្ឋាគារឆ្កែ ដែលមានកូនពូក កន្លែងដាក់ចំណី និងកូនកង្ហារផងដែរ។ហេង ជីវ័ន
ទីធ្លាហាងត្រូវបានធ្វើឡើងមានលក្ខណៈធំទូលាយ ដោយមានកន្លែងលក់សម្ភារឆ្កែ សួនរត់លេង កូនបន្ទប់សណ្ឋាគារឆ្កែ កន្លែងញ៉ាំកាហ្វេ និងកន្លែងលេងជាមួយឆ្កែក្នុងពេលតែមួយ ក្រោមបរិយាកាសខ្យល់ល្អបរិសុទ្ធបំផុត។
សត្វឆ្កែអស់នេះ ត្រូវបានទទួលការបង្ហាត់ ធ្វើយ៉ាងណាមិនឱ្យជះក្លិនស្អុយដល់អតិថិជន ដែលមកលេងទេ។ លើសពីនេះ សុនខក្នុងហាងថែមទាំងដឹងម៉ោងចេញចូលខ្លួនឯងដោយមិនចាំបាច់មានអ្នកដឹក អ្នកដឹកបញ្ចេរ។
លោក ឧត្ដម បានបញ្ជាក់ថា៖ «ឆ្កែទាំងអស់នេះ គឺខ្ញុំជាអ្នកបង្ហាត់ ដោយខ្ញុំនៅជាមួយពួកគាត់យូរទៅខ្ញុំចាប់ផ្ដើមយល់អារម្មណ៍ពួកគាត់ត្រូវការអី ចង់បានអី។ សម្រាប់ឆ្កែខ្លះ ពួកគាត់នៅបានតែពេលត្រជាក់ ដូចនេះពួកគាត់ចេញមកតែពេលព្រឹក និងល្ងាច ពួកគាត់ខ្លះចេញមកតាមថ្ងៃហេតុនេះពេលខ្លះអតិថិជនមិនបានឃើញកូនឆ្កែទាំងអស់ទេ»។
សភេសជ្ជៈប្រចាំហាង ៥ មុខដូចជា ឡាតេ Corgi តែក្រហមទឹកដោះគោ តែក្រូចឆ្មារ តែទឹកដោះគោអូរីអូ និងទឹកដោះគោស្ករត្នោត ក្នុងតម្លៃចាប់ពី ២ ទៅ ៣,៥ ដុល្លារ។ ហេង ជីវ័ន
ហាងមានឆ្កែដល់ទៅជាង ២០ ក្បាល ប៉ុន្តែពេលខ្លះពួកវាមិនបានចេញមកទទួលភ្ញៀវទាំងអស់ទេ។
ចំពោះសេវាកម្មសណ្ឋាគារឆ្កែ អតិថិជនដែលចង់យកកូនឆ្កែមកផ្ញើ បុគ្គលិកនឹងមើលថែយ៉ាងចិត្តទុកដាក់ក្នុងតម្លៃ ១ យប់ គិតចាប់ពី ៨ ដុល្លារឡើងតាមទំហំតូចធំនៃសត្វ។
ឆ្កែស្រមូវ ឆ្កែតឿ ឆ្កែពូជហាស្គី នៅក្នុងហាងកាហ្វេ Corgi in Town-Dog cafe ម្ដុំវត្តសំរោងអណ្ដែត។ ហេង ជីវ័ន
ការផ្ដល់សម្ភារដេកមានពូក និងខ្នើយ ត្រូវបានម្ចាស់ហាងបញ្ជាក់ថា៖ «សម្រាប់ឆ្កែខ្លះខាងហាងមិនអាចដាក់ជូនបានទេ ព្រោះពេលពួកគាត់មិនស៊ាំទម្លាប់នឹងរូបភាពបែបហ្នឹងគាត់ខាំដាច់រហែកអស់ដូច្នេះខាងហាងនឹងមើលតាមការជាក់ស្ដែង»។
ក្រៅពីមានការទាក់ទាញដោយសារកូនឆ្កែឃ្យូតៗហាង Corgi In Town-Dog Cafe ក៏មានបម្រើទឹកឆ្ងាញ់ៗផងដែរ ពិសេសភេសជ្ជៈប្រចាំហាង ៥ មុខដូចជា Latte Corgi, Corgi Milk red tea, Corgi lemon tea, Corgi milk red tea oreo និង Brown sugar fresh milk ក្នុងតម្លៃចាប់ពី ២ ទៅ ៣,៥ ដុល្លារ។
ទីធ្លារសម្រាប់សត្វឆ្កែរត់លេង នៅហាងកាហ្វេ Corgi In Town-Dog Café។ហេង ជីវ័ន
ក្នុង ១ ថ្ងៃ ភ្ញៀវខ្មែរ និងបរទេសចន្លោះពី ៣០ ទៅ ១០០ នាក់ ខណៈចុងសប្ដាហ៍អតិថិជនត្រូវរង់ចាំបន្តិចទើបមានកន្លែងអង្គុយ។
ម្ចាស់ហាងវ័យ ២៧ ឆ្នាំរូបនេះ ក៏បានរំឭកពីពេលបើកហាងកាលពីថ្មីៗនៅថ្ងៃទី ៧ ខែមករា ផងដែរថា៖ «ថ្ងៃដំបូងរបស់យើងនៅពេលនោះ គឺភ្ញៀវមកច្រើនហួសពីការរំពឹងទុក។ យើងមិនពេញចិត្តចំពោះសេវាកម្មរបស់យើងក្នុងការទទួលភ្ញៀវទេ។ ប៉ុន្តែក្រោយៗមកយើងអាចសម្របបាន»។
ហាងក៏មានលក់សម្ភារៈ និងចំណីអាហារសម្រាប់ចិញ្ចឹមឆ្កែផងដែរ។ហេង ជីវ័ន
លោកបន្តទៀតថា៖ «ពេលយើងបើកដំបូងយើងនៅមានចំណុចខ្វះខាតច្រើន ភ្ញៀវបានផ្ដល់មតិយោបល់ថា ហាងយើងរាងក្ដៅ ពេលនេះយើងបានកែសម្រួលរួចរាល់អស់ហើយ។ យើងរីករាយក្នុងការទទួលស្វាគមន៍គ្រប់មតិយោបល់របស់ពួកគាត់»។
មានទីតាំងនៅម្តុំវត្តសំរោងអណ្តែត ហាង Corgi In Town-Dog Cafe បើកពីម៉ោង ១១ ព្រឹក ដល់ម៉ោង ៦ កន្លះ នៅថ្ងៃចន្ទ និងអង្គារ ហើយចាប់ពីថ្ងៃពុធ ដល់អាទិត្យ ហាងបើកពីម៉ោង ៩ ព្រឹកដល់ម៉ោង ៦ កន្លះ៕
ទីធ្លារសម្រាប់សត្វឆ្កែរត់លេង នៅហាងកាហ្វេ Corgi In Town-Dog Café។
ភ្ញៀវអាចរីករាយនឹងក្រេបកាហ្វេ ហើយលេងជាមួយសត្វឆ្កែស្អាតៗ និងចេះៗជាច្រើនក្បាល។ហេង ជីវ័ន
វីដេអូ៖
