.jpg)
ថ្មីៗនេះ ខាត់ សុឃីម បានចេញវីដេអូប្រកាសទទួលបង្រៀនសិល្បៈប្រពៃណីដល់ក្មេងៗឥតគិតថ្លៃ។ រូបថត ហ្វេសប៊ុក
ភ្នំពេញៈ ទើបតែប្រកាសចង់ជួយដល់កុមារា ២ នាក់ ត្រូវឪពុកម្តាយបំបរបង់ចោលបណ្តោយឲ្យរស់នៅតាមសម្មាអាជីវោនៅក្រុងប៉ោយប៉ែតនោះក៏មកបង្ហើបរឿងចង់ផ្ទេរចំណេះដឹងផ្នែកសិល្បៈប្រពៃណីដែលខ្លួនចេះតពីឪពុកទៅដល់ក្មេងៗចង់រៀនឥតគិតថ្លៃតាមលទ្ធភាពខ្លួនមាន និងចង់បង្កើតមណ្ឌលបណ្តុះបណ្តាលសិល្បៈនេះទៀតផង។
ថ្មីៗនេះតារាចម្រៀងស្រីល្បីទាំងផ្នែកប្រពៃណី និងសម័យអ្នកនាង ខាត់ សុឃីម បានឡាយវីដេអូប្រកាសពីឆន្ទៈចង់បង្រៀនជំនាញសិល្បៈភ្លេងប្រពៃណីបុរាណដែលមានឧបករណ៍ស្គរ ឃឹម តាខេ រនាត ជាដើមនោះ ឥតគិតថ្លៃដល់ក្មេងៗដែលគ្មានលទ្ធភាពរៀនបង់ថ្លៃសិក្សាជារៀងរាល់ថ្ងៃសៅរ៍-អាទិត្យតាមលទ្ធភាពខ្លួនមាន និងចង់ផ្ទេរចំណេះខ្លួនចេះដល់ប្អូនៗជំនាន់ក្រោយ ដែលស្រឡាញ់ទម្រង់សិល្បៈប្រពៃណីបុរាណដែលធ្វើឲ្យមានការភ្ញាក់ផ្អើលមហាជន។
តារាចម្រៀងរៀមច្បងត្រកូលខាត់អ្នកនាង ខាត់ សុឃីម បញ្ជាក់ពីឆន្ទៈនៃការបើកបង្រៀនទម្រង់សិល្បៈប្រពៃណីបុរាណនៅឯផ្ទះខ្លួនផ្ទាល់ស្ថិតនៅឯបុរីជ័យជម្នះក្នុងសង្កាត់លូ៥ នៅខណ្ឌមានជ័យនោះថា៖ «ដោយសារពេលនេះនាងខ្ញុំរាងទំនេរពីការងារសិល្បៈ ហើយក៏នឹកចង់ធ្វើកិច្ចការមួយលើជំនាញសិល្បៈប្រពៃណីនេះក៏ប្រកាសតាមបណ្តាញសង្គមតែម្តង។ ការចង់ផ្ទេរចំណេះដឹងនេះក៏ព្រោះតែមើលឃើញថា សិល្បៈប្រពៃណីបុរាណសឹងគ្រប់ទម្រង់កំពុងតែធ្លាក់ចុះនូវចំណាប់អារម្មណ៍របស់កូនខ្មែរជំនាន់ក្រោយ ហើយនាងខ្ញុំក៏ជាអតីតអ្នកសិល្បៈមានការលូតលាស់មកដល់សព្វថ្ងៃដោយសារចេះសិល្បៈប្រពៃណីបុរាណតពីឪពុក និងអាចជួយគ្រួសារខ្ញុំឲ្យបានរីកចម្រើន ដោយសារចេះជំនាញនេះផងដែរ។ អ៊ីចឹងហើយបានជាធ្វើអ្វីមួយតាមលទ្ធភាព ដែលខ្លួនអាចធ្វើទៅបានដោយដាក់ថ្ងៃបង្រៀន ២ ថ្ងៃក្នុង ១ សប្តាហ៍គឺថ្ងៃសៅរ៍ បង្រៀន ១ ម៉ោង និងថ្ងៃអាទិត្យ ១- ម៉ោង ខណៈជាការបង្រៀនឆ្លាស់ជាមួយប្អូនប្រុសពៅខ្ញុំ ខាត់ សេរី»។
ដោយសារខ្លាចប៉ះពាល់សតិអារម្មណ៍សិល្បកររៀមច្បង ឬត្រូវគេយល់ខុសពីបំណងពិតខ្លួន ខាត់ សុឃីម ក៏បន្ថែមថា៖ «ឆ្លៀតឱកាសនេះ ខ្ញុំក៏សូមការអធ្យាស្រ័យពីបងៗក្រែងលោប៉ះពាល់ការបើកបង្រៀនរកប្រាក់កម្រៃនោះ ព្រោះខ្ញុំគ្រាន់តែចង់ជួយតាមលទ្ធភាពតែប៉ុណ្ណោះ។ បើចិត្តវិញនោះគឺចង់បង្កើតមជ្ឈមណ្ឌលបណ្តុះបណ្តាលជំនាញសិល្បៈប្រពៃណីដល់ក្មេងៗខ្វះលទ្ធភាព និងស្រឡាញ់វិស័យនេះផងដែរ បើអាច»៕
