.jpg)
ខាត់ សុឃីម ចេញបទថ្មីនៅទ្រនំហង្សមាស ក្រោយពីល្បីថាមានផលិត-កម្មថ្មីសន្លាងមួយទៅចែចូវចង់បាន។ រូបថត YouTube
ភ្នំពេញ៖ នាពេលថ្មីៗនេះ តារាចម្រៀងស្រីពហុជំនាញអ្នកនាង ខាត់ សុឃីម បដិសេធរឿងចេញទៅទ្រនំថ្មីសន្លាងមួយ ដែលចែចូវចង់បានទៅច្រៀង ដោយអះអាងថា សុខចិត្តនៅរួមសុខរួមទុក្ខជាមួយទ្រនំចាស់ហង្សមាស ក្នុងនាមជាតារាចម្រៀងស្រីឯករាជ្យមិនមានជាប់កុងត្រា។
ការអះអាងដោយបដិសេធបែបនេះ ដោយសារតែកាលពីប៉ុន្មានខែមុន មានដំណឹងលេចឮថា ផលិតកម្មថ្មីសន្លាងមួយមានឈ្មោះថា Davitra Media ចែចូវចង់បានខ្លួនទៅច្រៀងជាមួយតារាចម្រៀងចាស់ៗ បានប្រឡូកសិល្បៈស្របាលៗគ្នាដូចជាលោក ណូយ វ៉ាន់ណេត លោក ឈឿន ឧត្តម អ្នកនាង ម៉េង កែវពេជ្ជតា និងអ្នកនាង ហ៊ឹម ស៊ីវន ជាដើមនោះ។
ខណៈប៉ុន្មានខែចុងក្រោយនេះ ស្រាប់តែតារាចម្រៀងស្រីរៀមច្បងត្រកូលខាត់ អ្នកនាង ខាត់ សុឃីម ក៏ឃើញមានចេញបទចម្រៀងថ្មីៗជាហូរហែនៅផលិតកម្មហង្សមាស គឺស្របពេលដែលលេចវត្តមានតារាចម្រៀងកន្រ្ទឹមប្រុសលោក ចាន់ មករា មានដូចជាបទថ្មីគូ «ប្រពន្អល្អសម្លឆ្ងាញ់» និងបទទោល «ត្រីរ៉ស់ក៏រួចទន្សាយក៏រួច» នៅចុងឆ្នាំ ២០២០ នេះ។
តារាចម្រៀងស្រីល្បីប្រពៃណី និងសម័យ អ្នកនាង ខាត់ សុឃីម។ រូបថត សហការី
តារាចម្រៀងស្រីពហុជំនាញអ្នកនាង ខាត់ សុឃីម បញ្ជាក់ប្រាប់ ភ្នំពេញ ប៉ុស្តិ៍ ថា៖ «ជាការពិតណាស់ នាពេលកន្លងមកថ្មីៗនោះ ពិតជាមានផលិតកម្មថ្មី បានទាក់ទងរឿងឱ្យទៅច្រៀងមែន តែនាងខ្ញុំបានបដិសេធ។ នាងខ្ញុំមិនព្រមចេញទៅ ដោយសារចិត្តខ្លួនមិនចង់ចេញពីផលិតកម្មចាស់ហង្សមាស ដែលខ្លួនធ្លាប់នៅរួមសុខរួមទុក្ខ បើទោះបីជា នាពេលបច្ចុប្បន្ន ខ្ញុំបានផុតកុងត្រានៅផលិតកម្មហង្សមាសក្តី តែខាងផលិតកម្មក៏មានជម្រើសល្អ សម្រាប់នាងខ្ញុំផងដែរ ដោយទុកជម្រើសតាមពេលរបស់នាងខ្ញុំ ខណៈពេលណាខាងផលិតកម្មហង្សមាស មានបទចម្រៀងឱ្យច្រៀងខ្ញុំនឹងច្រៀង ប្រសិនបើមិនមានក៏មិនជាអ្វីដែរសម្រាប់ខ្ញុំ»។
អ្នកនាង ខាត់ សុឃីម ក៏បានបន្តថា៖ «សម្រាប់ហេតុផលផ្ទាល់ខ្លួន គឺនាងខ្ញុំមិនចង់ចេញចូលពីផលិតកម្មមួយទៅផលិតកម្ម ១ ទៀត ព្រោះកាលណាមាន ១ ប្រាកដជាអាចមាន ២ មិនខាន ហើយម្យ៉ាងទៀត នាងខ្ញុំចង់ប្រើពេលដើម្បីផលិតបទចម្រៀងខ្លួនឯង បំពេអារម្មណ៍នៅតាម Channel YouTube ផ្ទាល់ខ្លួនដូចជាកាលពីពេលកន្លងមកដែរ។ ដូច្នេះ ទោះបីជាយ៉ាងណា នាងខ្ញុំនឹងមិនចេញទៅផលិតកម្មថ្មីណាមួយទៀតឡើយ»។
ទោះបីជាការងារសិល្បៈចម្រៀងប្រពៃណីក្នុងរដូវកាលរៀបចំពិធីមង្គលការអាចចាត់ទុកថា ជាឱកាសមាសឱកាសប្រាក់សម្រាប់ការកើបលុយរបស់តារាចម្រៀងប្រពៃណី និងសម័យរបស់ក្រុមគ្រួសារអ្នកនាង ខាត់ សុឃីម ត្រូវរាំងស្ទះដោយសារជំងឺកូវីដមែនក្តី តែគេសង្កេតឃើញថា តារាចម្រៀងស្រីរូបនេះ ហាក់មានការងារសិល្បៈផ្សេងបណ្តើរៗមិនកកស្ទះឡើយ ដូចជាបានក្លាយជាតារាសុច្ឆន្ទៈក្រុមហ៊ុនផលិតចង្រ្កាន CESPA ហើយក៏មានការប្រកបអាជីវកម្មក្រៅសិល្បៈដែរ ពេលជួបវិបត្តិជំងឺនេះ៕
